Paipel PWÄRÄTÄ 5
5
Ewe toropwe mi numunumula me ewe Lam
5.1-14
Iwe, üa küna echö toropwe mi numunumula lon pöüifichin ewe mi mot won ewe lenien motun king. A kula ren mak lepekin me rüepek, nge a pwau ren fisu pwau. Is 1.18; 10.12; Ais 29.11 Mürin üa küna eman chon läng mi pöchökül a kökkö ren mwelian mi leüömong, “Iö a fich ngeni an epwe ülei ekewe pwau o suki ewe toropwe?” Nge esap wor eman lon läng ika won fanüfan ika lon lenien sotup a tongeni suki ewe toropwe mi numunumula o nenelong lon. Iwe, üa fokun kechü, pun resap küna eman mi fich ngeni an epwe suki ewe toropwe ika nenelong lon. Mürin eman me lein ekewe souakom a üreniei, “Kosap kechü! Nengeni, ewe Laion seni ewe ainangen Juta, ewe mwirimwirin Tafit mi iteföüla a pwora o win, i epwe tongeni ülei ekewe fisu pwau o suki ewe toropwe.” Ken 49.9; Ais 11.1,10
Mürin üa küna eman Lam a ütä lukalapan mwen ewe lenien motun king, nge ekewe föman mönümanau me ekewe rüwe me föman souakom ra pweli ünükün. Ewe Lam a usun itä nge a ninnila. A wor füfoch mächän me füföü föün mesan, ir ekewe füman Ngünün Kot ra titila won unusen fanüfan. Ais 53.7; Sek 4.10 Iwe, ewe Lam a feila o a angei ewe toropwe seni pöüifichin ewe mi mot won ewe lenien motun king. Lupwen a föri iei usun, ekewe föman mönümanau me ekewe rüwe me föman souakom ra chapetiu mwen ewe Lam. Eman me eman a wor an pisekin ettik me eu sepi mi ur ren apach mi pwokus, iei än ekewe chon pin iotek. Kölf 141.2 Iwe, ra kölü echö köl mi fö:
“En ka fich ngeni om kopwe angei ewe toropwe mi numunumula,
ka pwal fich ngeni om kopwe ülei pwaun kewe.
Pun en ka ninnila,
nge ren chaom ka möni aramas fän iten Kot,
ekewe aramas seni ekewe ainang me kapas me mwü
me sokopaten aramas meinisin. Kölf 33.3; 98.1; Ais 42.10
10 Ka för seniir eu mwün souasor, pwe repwe angang ngeni ach Kot,
nge repwe nemenem won fanüfan.” Eks 19.6; Pwär 1.6
11 Mürin üa nenengeni o rongorong möngüngün chomong ngeröün chon läng. Ra ütä pwelin ünükün ewe lenien motun king, pwal ünükün ekewe föman mönümanau me ekewe souakom, Tan 7.10 12 ra köl ren ngingi mi leüömong:
“Ewe Lam mi ninnila a fich ngeni
an epwe angei manaman, wöü, tipachem me pöchökül, iteüöch, ling me ingemwar.”
13 Iwe, üa rongorong pwe förien Kot meinisin lon läng pwal won fanüfan, lon lenien failol pwal lon matau ra kölü ei köl:
“Ingemwar me iteöch me ling me manaman
ngeni ewe mi mot won ewe lenien motun king me ewe Lam tori feilfeilachök.” 14 Iwe, ekewe föman mönümanau ra apasa, “Amen!” Nge ekewe souakom ra chapetiu o fel ngeni Kot me ewe Lam.

5:1: Is 1.18; 10.12; Ais 29.11

5:5: Ken 49.9; Ais 11.1,10

5:6: Ais 53.7; Sek 4.10

5:8: Kölf 141.2

5:9: Kölf 33.3; 98.1; Ais 42.10

5:10: Eks 19.6; Pwär 1.6

5:11: Tan 7.10