Paipel EKISTOS 19
19
Chon Israel ra nom fäsonun ewe chuk Sinai
19.1-25
Iwe, lon aeuin ränin ewe aülüngatin maram mürin än ekewe aramasen Israel towu seni Isip, lon ewe chök rän ra tolong lon ewe fanüapön Sinai. Iwe, lupwen ra sai seni Refitim, ra tori ewe fanüapön Sinai o nom ie. Ikenan chon Israel ra aüetä imwer imw mangaku sasape ngeni ewe chuk. Mürin, Moses a feitä won ewe chuk ren Kot, nge ewe Samol mi Lapalap a kökköri Moses me won ewe chuk o üreni, “Iei usun mine kopwe üreni ekewe mwirimwirin Jakop ir ekewe aramasen Israel, ‘Oua fen küna mine üa föri ngeni chon Isip, pwal usun üa uweekemi usun eman ikel a uwei nöün won pöükässin o uweekemiito rei. Iei mine ika oupwe aleasochisi aloi o apwönüetä ai we pwon, mürin oupwe wesewesen nei aramas. Inamwo ika unusen fanüfan ai, nge üa filikemiitä me lein aramas meinisin, Tut 4.20; 7.6; 14.2; 26.18; Tit 2.14 pwe oupwe eu mwichen souasor me eu mwü mi pin fan itei.’ Ikkei ekei kapas kopwe asile ngeni ekewe aramasen Israel.” 1.Pet 2.9; Pwär 1.6; 5.10
Iwe, Moses a feitiu o körifengeni ekewe souakomwen ekewe aramas, a apworausa ngeniir ekewe kapas meinisin mine ewe Samol mi Lapalap a allük ngeni. Mürin, ekewe aramas ra pälüenipökü o apasa, “Meinisin mine ewe Samol mi Lapalap a apasa aipwe föri.” Nge Moses a asile ngeni ewe Samol mi Lapalap alon ekewe aramas. Iwe, ewe Samol mi Lapalap a üreni Moses, “Üpwe feito reöm lon eu kuchuchol, pwe ekewe aramas repwe rongorong lupwen üpwe kapas ngonuk, repwe pwal lükuk fansoun meinisin.” Mürin, Moses a asile ngeni ewe Samol mi Lapalap alon ekewe aramas.
10 Iwe, ewe Samol mi Lapalap a üreni Moses, “Kopwe feila ren ekewe aramas o apiniir ikenai me lesor. Repwe sopuni üfer 11 o amoleretä ngeni ewe aülüngatin rän. Pun lon ewe aülüngatin rän ngang ewe Samol mi Lapalap üpwe feitiu won ungen ewe chuk Sinai mwen mesen ekewe aramas meinisin. 12 Iwe, kopwe föri eu kiä pwelin ünükün ewe chuk o üreniir, ‘Oupwe afälikemi pwe ousap feitä won ewe chuk ika arap ngeni kiännin. Pun iö epwe ipwetä won ewe chuk epwe fokun mäla. 13 Esap wor eman epwe atapa ätewe mi ipwetä won ewe kiä, nge repwe chök monei ngeni fau ika likapichi, ese lifilifil ika man ika aramas, esap tongeni manau. Nge lupwen ewe rappwa epwe tikitam, aramas repwe tongeni feitä won ewe chuk.’ ” Ipr 12.18-20 14 Mürin än Moses feitiu seni ewe chuk ren ekewe aramas, a apiniir, nge ir ra sopuni üfer. 15 Iwe, Moses a üreni ekewe aramas, “Oupwe amolakemi ngeni ewe aülüngatin rän, ousap kon ren eman fefin.”
16 Nge lesosorun ewe aülüngatin rän a fis chopulap me fifi. A wor eu kuchuchol won ewe chuk, a pwal tik eu rappwa mi tikimong. Iwe, ekewe aramas mi nom lon ewe leni ra chechech ren ar niuokus. Pwär 4.5 17 Mürin, Moses a emwenawu ekewe aramas seni lon lenier pwe repwe churi Kot. Iwe, ra ütä fäsonun ewe chuk. 18 Ewe chuk Sinai a pwölüla ren ötüöt, pun ewe Samol mi Lapalap a feitiu won lon ekkei. Nge ötün a ötütä usun ötün eu lenien um mi watte o unusen ewe chuk a fokun chechech. Tut 4.11-12 19 Iwe, ewe rappwa a chök titikimongola. Mürin Moses a kapas, nge Kot a pälüeni ren chopulap. 20 Mürin, ewe Samol mi Lapalap a feitiu won ungen ewe chuk Sinai o kökkörätä Moses won. Iwe, Moses a feitä won ungen ewe chuk. 21 Nge ewe Samol mi Lapalap a üreni Moses, “Kopwe feitiu o fönöü ekewe aramas, pwe resap tolong lon kiännin ewe chuk ren ar mochen nenengeniei, pwe chomong rete mäla. 22 Pwal ekewe souasor mi kanoto rei repwe apiniir, pwe üsap afeiengaueer.” 23 Nge Moses a kapas ngeni ewe Samol mi Lapalap, “Ekewe aramas resap tongeni feitä won ewe chuk Sinai. Pun en ka püsin allük ngenikem pwe aipwe föri kiännin ewe chuk o apini.” 24 Iwe, ewe Samol mi Lapalap a üreni Moses, “Kopwe feitiu o emwenätä Aaron. Nge kosap mwüt ngeni ekewe souasor me ekewe aramas ar repwe tolong lon ewe kiä o feitä rei, pwe ngang üsap afeiengaueer.” 25 Iwe, Moses a feitiu ren ekewe aramas o apworauseer.

19:5: Tut 4.20; 7.6; 14.2; 26.18; Tit 2.14

19:6: 1.Pet 2.9; Pwär 1.6; 5.10

19:13: Ipr 12.18-20

19:16: Pwär 4.5

19:18: Tut 4.11-12