Paipel KÖLFEL 141
141
Iotekin tüngor tümwün seni ngau
141.1-10
Echö än Tafit köl.
Ai Samol mi Lapalap, üa kökköruk, kopwe kaito rei.
Kopwe aü selingom ngeni mweliei, lupwen üa kökköruk.
Ai iotek epwe wewe ngeni eu asoren apach mi pwokus me mwom,
ai aitietä pei epwe wewe ngeni eu asoren lekuniol. Pwär 5.8
Ai Samol mi Lapalap, kopwe awora eman chon masen awei,
kopwe tümwünü asamen tinawei.
Kopwe tümwünüei pwe üsap föri mine a ngau,
pwe üsap eti ekewe aramasangau lon ar föföringau,
üsap pwal etiir le mongö ener mi annö.
 
Eman aramasöch epwe wichiei are apwüngüei fän kirikiröch,
nge üsap mwüt ngeni ekewe aramasangau pwe repwe asamoluei.
Pun lon ai iotek üa pälüeni ar kewe föför mi ngau fansoun meinisin.
Lupwen ekewe samol repwe koturutiu seni ekewe achau,
ekewe aramas repwe mefi pwe ai kewe kapas ra let.
Usun eman a tuw pwül o atatakisi,
iei usun chür repwe toropas mesen ewe lenien sotup.
 
Nge ngang üa chök anomu ai apilükülük womw, en ai Samol mi Lapalap ai Kot.
En ai lenien op.
Kosap asechieilong lon mäla.
Kopwe tümwünüei seni ewe sär ra anomu fän itei,
pwal seni än ekewe chon föföringau likatuputup.
10 Ekewe aramasangau meinisin repwe turulong lon püsin ar kewe sär,
nge ngang üpwe feila seniir, pun üsap tup lon.

141:2: Pwär 5.8