11
Eman mwirimwirin Tafit epwe nemenem fän pwüng
11.1-10
Iwe, ekewe mwirimwirin Tafit ra usun efoch irä mi pöküpökütiu. Nge usun ekoch fasar ra pwükütä seni ewe popun, iei usun eman king mi fö epwe ütä seni me lein ekewe mwirimwirin Tafit. Pwär 5.5; 22.16
Iwe, Ngünün ewe Samol mi Lapalap epwe nonom won,
ewe Ngün epwe ngeni tipachem me mirit, ekieköch me tufich.
Epwe pwal silei letipen ewe Samol mi Lapalap o niueiti i.
Iwe, epwe pwapwa ngeni an epwe aleasochisi ewe Samol mi Lapalap fän niuokus.
Iwe, esap eäni apwüng ren künan mesan, esap pwal apwüngala och ren rongeen selingan.
Nge epwe apwüngü chon wöüngau fän pwüng,
epwe pwal peni chon tipetekison won fanüfan, nge esap lifilifil.
Iwe, epwe afeiengaua fanüfan ren an kapas
usun sa afeiengaua eman ren efoch wok,
epwe pwal niela chon föföringau ren enienin ngasangasan. 2.Tes 2.8
Epwe nemeni nöün aramas fän pwüng me allükülük. Ef 6.14
Eman wolif me eman apanen sip repwe chiechifengen,
eman man itan lepart me eman apanen kuuch repwe nonomfengen,
eman apanen kow me eman laion me eman man mi öümanau repwe kinamwefengen,
nge eman semirit epwe emweniir.
Iwe, eman kow me eman pear repwe mongöfengen,
apaner repwe nonomfengen,
nge eman laion epwe mongö fetilipwas usun eman kow.
Eman mönükol epwe urumwot arun pwangen serepenit mi poison,
nge eman semirit epwe sökalong pöün lon pwangen noput,
nge resap feiengau rer.
Esap wor eman epwe afeiengaua eman ika ataela och
won chukun Kot mi pin,
pun än chon fanüfan silei ewe Samol mi Lapalap
epwe alolol usun chök alololun matau. Ais 65.25; Ap 2.14
10 Lon ena fansoun epwe fis pwe ewe king mi fö seni mwirimwirin Tafit epwe ütä usun chök efoch asisil fän iten chon ekewe mwü meinisin. Iwe, repwe chufengen lon telinimwan mi ling o asamolu. Rom 15.12
Chon Israel repwe liwiniti fanüer fän pwapwa
11.11-16
11 Lon ena fansoun ewe Samol epwe aitiela pöün fän aruuan pwe epwe aliwinato nöün aramas mi chüen manau seni Asiria, Isip, Patros, Itiopia, Elam, Papilon me Hamat, pwal seni lon ekewe fanü mi nom aroset me ekewe fanü mi nom lematau, pwe repwe liwiniti lenier. 12 Iwe, epwe aüetä efoch asisil ngeni chon ekewe mwü o pwäri ngeniir pwe a achufengenisefäli ekewe chon Israel me chon Juta mi toropasfeil o aliwinisefäliir seni lepwokukun fanüfan me rüanü. 13 Iwe, än chon Israel lolowo epwe wesila, nge ir mi ariaföüü chon Juta repwe kärila. Esap chüen wor än chon Israel lolowo ngeni chon Juta, nge chon Juta resap chüen oput chon Israel. 14 Repwe chufengen le maun ngeni chon Filistia mi nom lotou, o angei fän pöchökül pisekin ekewe aramas mi nom ötiu. Repwe liapeni ekewe chon Etom me chon Moap, nge chon Amon repwe aleasochis ngeniir. 15 Iwe, ewe Samol mi Lapalap epwe apwasatä ewe Setin Isip ren enienin asepwäl mi pwichikar, epwe pwal aitiela pöün won ewe chanpupu Oifrat o kinifeseni lon fisu kinikin, pwe aramas repwe tongeni feila epek, nge pecher resap chöchön. Pwär 16.12 16 Iwe, epwe wor efoch alalap seni Asiria fän iten nöün Kot kewe aramas mi chüen manau, usun a wor efoch al me lom fän iten chon Israel, lupwen ra towu seni Isip.

11:1: Pwär 5.5; 22.16

11:4: 2.Tes 2.8

11:5: Ef 6.14

11:9: Ais 65.25; Ap 2.14

11:10: Rom 15.12

11:15: Pwär 16.12