Paipel PWÄRÄTÄ 4
4
Än Kot lenien motun king lon läng
4.1-11
Mürin ei a pwal wor künaei, üa küna eu asam mi suk lon läng. Iwe, mwelien eman mi wewe ngeni tikin efoch rappwa, üa fen rongorong me mwan, a üreniei, “Kopwe feito ikei, pwe üpwe aiti ngonuk met epwe fokun fis mürin ei.” Lon ewe chök otun üa nom lon Ngün. Ikenan lon läng a wor eu lenien motun king, eman a mot won. Won mesen ewe mi mot a saramaram usun ekewe fau aüchea mi arauarau fetil me par iter jasper me karnelian, nge pwelin ünükün ewe lenien motun king a wor eu resim mi wewe ngeni anüen eföü fau aüchea itan emeralt. Is 1.26-28; 10.1 Iwe, pwelin ünükün ewe lenien motun king a wor rüwe me rüanü lenien motun king ia rüwe me föman souakom ra mot ie, ra üföüf üf mi pwechepwech o mwärämwär mwärämwär seni kolt. Seni ewe lenien motun king a towu inefi, ngüngü me chopun chopulap. Me mwen ewe lenien motun king a wor füfoch töl mi tin, ir ekewe füman Ngünün Kot. Eks 19.16; Pwär 8.5; 11.19; 16.18; Is 1.13; Pwär 1.4; Sek 4.2 Me mwen ewe lenien motun king a pwal wor och mi usun chök eu matau seni kilas, a kurufat usun ewe fau itan kristal.
Iwe, pwelin ünükün ewe lenien motun king me rüanü pekin a wor föman mönümanau, ra kula ren föün mas me mwer pwal me lükisökürür. Ewe aemanün mönümanau a wewe ngeni eman laion, ewe aruomanün a wewe ngeni eman ätemwänin kow, ewe aülümanün won mesan a wewe ngeni won mesen eman aramas, nge ewe afömanün a wewe ngeni eman ikel mi äkkäs. Is 1.5-10; 10.14 Eman me eman ekewe föman mönümanau a wor wonofoch pöükässin, nge won me fän pöükässiir ra kula ren föün mas. Lerän me lepwin resap ükütiu le kölü ei köl:
“A pin, a pin, a pin ewe Samol Kot mi Unusen Manaman,
i ewe a fen nonom, ewe a nom iei me ewe epwe feito me mürin.” Kölf 141.2
Iwe, ekewe föman mönümanau ra köl kölün ling me iteüöch me kilisou ngeni ewe eman mi mot won ewe lenien motun king, ewe mi manau tori feilfeilachök. Lupwen ra föri iei usun, 10 ekewe rüwe me föman souakom ra chapetiu me mwen ewe eman mi mot won ewe lenien motun king o fel ngeni ewe mi manau tori feilfeilachök. Ra isetiu mwäriir kewe me mwen ewe lenien motun king o apasa,
11 “Ach Samol me ach Kot, en ka fich ngeni
om kopwe angei ling me iteüöch me manaman.
Pun ka föri mettoch meinisin,
nge ren letipom ra fis o manau.”

4:3: Is 1.26-28; 10.1

4:5: Eks 19.16; Pwär 8.5; 11.19; 16.18; Is 1.13; Pwär 1.4; Sek 4.2

4:7: Is 1.5-10; 10.14

4:8: Kölf 141.2