Paipel KÖLFEL 78
78
Usun än Kot allükülük ngeni nöün aramas resap allükülük
78.1-72
Echö än Asaf kölün kait.
Ämi nei aramas, oupwe aüselinga mine üpwe aiti ngenikemi.
Oupwe aüeto selingemi ngeni mine üpwe apasa.
Üpwe apasatä eu kapasen awewe.
Üpwe apasawu kapas monomon mi fis me lom, Mat 13.35
usun ekewe mettoch sa rongorong o silei,
semalapach kewe ra apworausa ngenikich.
Sisap aopa ekewe kapas seni nöüch,
nge sipwe apworausa ngeni ewe täppin aramas epwe feito me mürich
usun än ewe Samol mi Lapalap föför mi amwarar,
usun an kewe manaman me an kewe asisil a föriir.
 
A awora ekewe pwüüng fän iten ekewe mwirimwirin Jakop
o föri ekewe allük fän iten chon Israel.
A allük ngeni ach kewe lewo
pwe repwe aiti ngeni nöür kewe an kewe allük,
pwe ekewe täppin aramas me müriir repwe silei ekewe allük,
pwal ekewe mönükol resamwo uputiu,
mürin, pwal ir repwe apworausa ngeni nöür.
Ren ei repwe anomu ar apilükülük won Kot,
nge resap manlükala än Kot kewe föför.
Repwe pwal aleasochisi an kewe allük,
pwe resap wewe ngeni ar kewe lewo,
ewe täppin aramas mi ülöförea me lükümach,
ewe täppin aramas leluker esap pos,
resap pwal allükülük ngeni Kot.
 
Ekewe mwän seni ewe ainangen Efraim mi uwei nöür likapich
ra kulsefäl o sü lon ewe rän a fis maun.
10 Resap tümwünü än Kot pwon,
resap pwal mochen aleasochisi an kewe allük.
11 Ra manlükala mine a föri,
ekewe manaman a pwäri ngeniir.
12 Kot a föri föför mi amwarar fän mesen ar kewe lewo
lon ewe fanü Isip me lon ewe maasiesin Soan. Eks 7.8–12.32
13 A kinifeseni ewe matau o emwenirela tori epek,
a föri pwe ekewe koluk ra ütä usun chök eu tit. Eks 14.21-22
14 Lerän a emweniir ren eu kuchu,
nge lepwin a emweniir ren ekkei mi saramaram. Eks 13.21-22
15 A asangafeseni achau lon ewe fanüapö
o aünü ngeniir chomong koluk seni ekewe leni mi alolol.
16 A föri pwe öüwö a towu seni ewe achau,
nge koluk a puputiu usun chanpupu. Eks 17.1-7; Num 20.2-13
17 Nge ra chök sopwela le tipis ngeni Kot,
ra ü ngeni Ewe mi Unusen Tekia me lon ewe fanüapö.
18 Ra sotuni Kot seni mochenin letiper
ren ar tüngormau ener mongö ra mwäräräiti. Eks 16.2-15; Num 11.4-23; 31.35
19 Ra ü ngeni Kot ren ar kapas o apasa,
“Ifa usun, Kot a tongeni ngenikich mongö lon ewe fanüapö?
20 A wichi ewe achau pwe koluk a towu,
nge ekewe öüwö ra urourela.
Nge ifa usun, a pwal tongeni fangeto pilawa
ika amolätä fituk fän iten nöün aramas?”
 
21 Iei mine, lupwen ewe Samol mi Lapalap a rongorong ar kewe kapas, a fokun song.
A tinala ekkei pwe a keni chon Israel,
nge an song a wattela ngeniir,
22 pun esap wor ar lükülük won Kot,
resap pwal lükü an manaman pwe a tongeni amanaueer.
23 Nge Kot a chök allük ngeni ekewe läng
o sukala ekewe asamen läng.
24 A apüngätiu wor mana, ekewe föün wiichen läng,
pwe repwe tongeni mongö, Joh 6.31
25 Aramas ra mongö enen ekewe chon läng.
A tinala rer chomong mongö.
26 A pwal föri pwe asepwälin ötiu a enien fän läng,
nge ren an manaman a emwenawu ewe asepwälin ör.
27 A apüngätiu wor fituk usun chök pwül moromor,
ekewe machang ra chomong usun chök chomongun föün pien aroset.
28 A apüngüretiu lukalapen lenier
pwelin ünükün imwer.
29 Iwe, ekewe aramas ra mongö o fokun mötüla,
pun Kot a ngeniir mine ra fokun mwäräräiti.
30 Nge mwen an esamwo wesöchüla ar mwärä,
lupwen ra chüen mongö ewe mongö,
31 Kot a song ngeniir, pwe a niela ekewe mi fokun pöchökül me leir
me ekewe alüal me lon Israel.
 
32 Iwe, ekei mettoch meinisin ra fis, nge ekewe aramas ra chök sopwela le tipis.
Kot a föri an kewe manaman, nge resap fokun lükü.
33 Iei mine Kot a föri pwe ränin manauer a wesila usun chök enienin asepwäl,
nge ierin manauer a chök sopolong lon niuokus watte.
34 Nge lupwen Kot a niela ekoch me leir,
ekewe mi chüen manau ra kütta i.
Ra ekieksefäl o tiliken le iotek ngeni.
35 Ra chechemeni pwe Kot ar achau,
pwe ewe Kot mi Unusen Tekia ar Chon Amanau.
36 Nge ar kewe kapas resap pwüng,
meinisin mine ra apasa a chök mwakel.
37 Leluker esap wenechar ngeni,
resap pwal allükülük won an we pwon. Föf 8.21
38 Nge Kot a tongeer,
a amusala ar tipis,
esap pwal aroserela,
Fän chomong a amwöchü an song,
nge esap amüchawu an lingeringer ngeniir.
39 A chechemeni pwe ir aramas echök,
ra usun chök asepwäl mi enila, nge esap chüen enito.
 
40 Fän chomong ra ü ngeni i me lon ewe fanüapö
o achouu me lon ewe fanüpwas.
41 Ra sotuni Kot fän chomong
o asonga Ewe mi Pin me lon Israel.
42 Resap chechemeni an manaman ika ewe rän,
lupwen a amanaueer seni chon oputeer,
43 resap pwal chechemeni an kewe föför mi amwarar
me an kewe manaman a föri lon Isip me lon ewe maasiesin Soan.
44 Iwe, Kot a awili lölön ekewe chanpupu ngeni cha,
pwe ekewe chon Isip resap tongeni ün seniir. Eks 7.17-21
45 Kot a tinato pwiin nikken leir pwe repwe küür,
pwal kairü mi ataela irän fanüer. Eks 8.20-24; Eks 8.1-6
46 A amongöü ngeni ekewe müün fotar irä,
nge ekewe lifichimas ra eni uän ar tanipi. Eks 10.12-15
47 A ataela ar tanipin wain ren ütten fau
me ar irä sikamor ren patapat.
48 A niela nöür pwiin kow ren ütten fau,
pwal nöür pwiin sip ren inefi. Eks 9.22-25
49 Ren an song mi fokun watte ngeniir,
ren an lingeringer me an koput a esen ngeniir
pwe repwe tolong lon riaföü.
Ei a usun chök eu mwichen chon läng mi feito o afeiengaueer.
50 Esap chüen engila lon an song,
esap pwal achika manauer seni mäla,
nge a asechirela pwe repwe mäla ren mätter.
51 A niela ekewe mwänichi meinisin lon Isip,
ir mwen pöchökülen mwirimwirin Ham me lon ewe fanü. Eks 12.29
52 Mürin, Kot a emwenawu nöün aramas usun eman chon mas a emweni nöün pwiin sip,
o emweniir lon ewe fanüapö. Eks 13.17-22
53 A emwenirela fän kinamwe pwe resap niuokus,
nge ewe matau a pwölüela ekewe chon oputeer. Eks 14.26-28
54 Iwe, a emwenirela ngeni fanüan we mi pin,
ngeni ewe chuk püsin i a liapeni. Eks 15.17; Jos 3.14-17
55 A asüela chon ekewe mwü me mwer.
A aineti ngeni ekewe ainangen Israel fanüer pwe repwe fanüeni
o ngeniir imwer. Jos 11.16-23
56 Nge ir ra sotuni ewe Kot mi Unusen Tekia
o ü ngeni.
Resap aleasochisi an kewe allük, Souk 2.11-15
57 nge ra tokola seni Kot o kirikiringau usun chök semelaper kewe,
ra lomotongau usun chök efoch esefich mi pwor.
58 Pun ra asonga Kot ren ar lenien fel won ekewe leni tekia,
ra pwal föri pwe a lingeringeritiir ren ar kewe uluulun anü mi fal.
59 Iwe, lupwen Kot a küna ei, a fokun song
o wesewesen pöütala chon Israel.
60 A likitala lenian me lon Silo,
ewe imw mangaku ia Kot a nom ie me lein ekewe aramas. Jos 18.1; Jer 7.12-14; 26.6
61 A föri pwe ewe pworofel, asisilen an manaman me ling,
epwe oolong lepöün chon oputeer. 1.Sam 4.4-22
62 A lingeringeriti nöün aramas
o mwüt ngeni chon oputeer pwe repwe nirela ren ketilas.
63 Nöür alüal ra mäla lon maun.
Esap chüen wor alüal repwe pwüpwülü ngeni nöür föpwül.
64 Nöür souasor ra mäla ren ketilas,
nge nöür fefin mi mä pwülüer resap tongeni ngüngüres.
 
65 Mürin, ewe Samol a pwök usun eman a pwök me annut.
A usun eman mwän mi pöchökül a akkapwas pokiten an ün wain.
66 Iwe, a akufu chon oputan pwe ra sü
o asäweer ren säw esemüch.
 
67 Mürin, Kot a pöütala ekewe mwirimwirin Josef,
esap filätä ewe ainangen Efraim.
68 Nge a filätä ewe ainangen Juta,
pwal ewe chuk Sion a efich.
69 Ikenan a aüetä imwan mi pin o tekia usun tekian ekewe läng,
a pwal anüküchara usun fanüfan
pwe epwe nom tori feilfeilachök.
 
70 Kot a filätä nöün chon angang Tafit
o angei i seni ekewe lenien sip.
71 A emwenato Tafit seni an tümwünü ekewe pwiin sip
pwe epwe chon masen nöün aramas,
ekewe chon Israel. 1.Sam 16.11-12; 2.Sam 7.8; 1.Kron 17.7
72 Iwe, Tafit a tümwünüür ren wenecharen lelukan,
a fokun angangöch lon an emweniir.

78:2: Mat 13.35

78:12: Eks 7.812.32

78:13: Eks 14.21-22

78:14: Eks 13.21-22

78:16: Eks 17.1-7; Num 20.2-13

78:18: Eks 16.2-15; Num 11.4-23; 31.35

78:24: Joh 6.31

78:37: Föf 8.21

78:44: Eks 7.17-21

78:45: Eks 8.20-24; Eks 8.1-6

78:46: Eks 10.12-15

78:48: Eks 9.22-25

78:51: Eks 12.29

78:52: Eks 13.17-22

78:53: Eks 14.26-28

78:54: Eks 15.17; Jos 3.14-17

78:55: Jos 11.16-23

78:56: Souk 2.11-15

78:60: Jos 18.1; Jer 7.12-14; 26.6

78:61: 1.Sam 4.4-22

78:71: 1.Sam 16.11-12; 2.Sam 7.8; 1.Kron 17.7