Paipel JEREMAIA 7
7
Oupwe siwili manauemi me ämi föför
7.1-15
Iwe, ewe Samol mi Lapalap a üreni Jeremaia, pwe epwe feila o ütä leasamalapen ewe imwenfel. Epwe aronga ekei kapas ngeni ekewe chon Juta meinisin mi feito pwe repwe fel ngeni ewe Samol mi Lapalap, “Iei alon ewe Samol mi Unusen Manaman, ewe Koten Israel: Oupwe siwili manauemi me ämi kewe föför, pwe üpwe mwüt ngenikemi pwe oupwe nonom lon ei leni. Ousap lükü ekei kapasen atuputup ra apasa, ‘Aisap feiengau. Iei än ewe Samol mi Lapalap imwenfel, än ewe Samol mi Lapalap imwenfel, än ewe Samol mi Lapalap imwenfel.’
Oupwe wesewesen siwili manauemi me ämi kewe föför o wesewesen eäni pwüng lefilemi. Oupwe ükütiu le ariaföüü ekewe chon ekis, ekewe mi mäsen ika ekewe fefin mi mä pwülüer. Oupwe ükütiu le niela chokewe esap wor ar tipis me lon ei leni. Oupwe ükütiu le fel ngeni pwal ekoch kot, pun ren ei oupwe chök atoto feiengau womi. Are oupwe siwili manauemi, üpwe mwüt ngenikemi pwe oupwe nonom lon ei fanü üa ngeni ämi kewe lewo me lomlom, pwe repwe fanüeni tori feilfeilachök.
Nengeni, oua lükü kapasen atuputup esap wor lomotan. Oua solä, niela aramas, föri föförün lisowu, akapelmwäl, keni apach mi pwokus ngeni ewe anü Paal o fel ngeni pwal ekoch kot ousap sileer me mwan. 10 Mürin, oua feito o ütä fän mesei lon ei imw mi föü itei won o apasa, ‘Sisap feiengau,’ nge oua chök sopwela le föri ekei föför mi anioput meinisin. 11 Ifa usun, ei imw a föü itei won a wiliti eu lenien open chon solä me remi? Püsin ngang üa küna mine oua föri. Mat 21.13; Mark 11.17; Luk 19.46 12 Oupwe feila ren leniei we mi nom Silo, ewe ia üa akom le filätä pwe oupwe fel ngeniei ie. Oupwe nenengeni mine üa föri ngeni pokiten än ekewe aramasen Israel kewe föföringau. 13 Lupwen oua föri ekei föför meinisin, üa chök sopwela le fofos ngenikemi, nge ämi ousap mochen aüseling. Üa kökkörikemi, nge ousap mochen päpälüen. 14 Iei mine met üa föri ngeni Silo üpwe pwal föri ngeni ei imw mi föü itei won, oua anomu ämi apilükülük won. Üpwe pwal föri iei usun ngeni ei leni üa ngenikemi me ämi kewe lewo. Jos 18.1; Kölf 78.60; Jer 26.6 15 Iwe, üpwe asükemiila seni fän mesei usun üa asüela märärimi kewe ekewe chon Israel. Ngang ewe Samol mi Lapalap üa kapas.”
Kot a song ren angangen anümwäl
7.16-20
16 Ewe Samol mi Lapalap a üreniei, “En Jeremaia, kosap iotek fän iten ekei aramas, kosap siö ika iotek fän iter. Kosap tütüngor ngeniei fän iter, pun ngang üsap aüselingok. 17 Ifa usun, kosap küna mine ra föri me lon ekewe telinimwen Juta pwal lon ekewe alen Jerusalem? 18 Ekewe semirit ra os mwüch, ekewe sam ra soni ewe ekkei, nge ekewe fefin ra öüwa pilawa pwe repwe föri nokop fän iten ewe anü fefin ra aita ngeni kiwinen läng. Ra pwal ninätiu asorun ün ngeni pwal ekoch kot, pwe repwe ariaföüüei. Jer 44.17-19 19 Ifa usun, ngang ewe ra ariaföüü? Apwi, püsin ir, ra pwal püsin atoto säw wor. 20 Iei mine ngang Kot ewe Samol mi Lapalap üpwe awarato ai song me lingeringer won ei leni, won aramas me man, won ekewe irän lemäl, pwal won uän ekewe irän lepwül. Ai song epwe kü, nge esap tongeni kunula.”
Kot a apwüngü chon Juta pokiten ar ü ngeni
7.21-8.3
21 Iei alon ewe Samol mi Unusen Manaman, ewe Koten Israel, “Oupwe chök achu ämi mönün asoren kek ngeni ämi mönün ekewe sokopaten asor o ochei fituker meinisin. 22 Pun lupwen üa emwenawu ämi kewe lewo seni Isip, üsap kapas ngeniir ika allük ngeniir usun asoren kek me sokopaten asor. 23 Nge üa allük ngeniir pwe repwe aleasochisiei, mürin ngang üpwe ar Kot, nge ir repwe nei aramas. Repwe apwönüetä ai kewe allük pwe repwe feiöch ren. 24 Iwe, resap aleasochis ika aü selinger, nge ra chei püsin ar öüröür me ülöförean leluker mi ngau. Ra fen ingauala, nge resap öchüla. 25 Seni ewe rän ämi kewe lewo ra towu seni Isip tori ikenai üa chök titinala remi nei chon angang ekewe soufos meinisin. 26 Nge esap wor eman a aüselingaei ika aü selingan. Oua chök tipepöchökül o föri mine a ngau lap seni ämi kewe lewo.
27 Iei mine, Jeremaia, kopwe üreniir ekei kapas meinisin, nge ir resap aüseling ngonuk. Kopwe kökköriir, nge ir resap päpälüen. 28 Kopwe üreniir, ‘Ämi chon eu mwü ousap aleasochisi ewe Samol mi Lapalap ämi we Kot, ousap etiwa an emirit. Kapas mi let ra morola, ra ükütiu seni lon awemi.
29 Oupwe fichiela meten möküremi o pöütala.
Oupwe ngüngüres me won ungen ekewe chuk,
pun ewe Samol mi Lapalap a pöütala
o asechala ei täppin aramas mi nom fän an lingeringer.’ ” 30 Iei alon ewe Samol mi Lapalap, “Ekewe chon Juta ra föri mine a ngau me fän mesei. Ra anomu ar kewe uluulun anümwäl üa oput lon ewe imw a föü itei won, pwe repwe alimengaua. 31 Ra aüetä eu lenien fel itan Tofet mi nom lon ewe lemolun Hinom, pwe repwe kenala nöür ät me nengin. Ei sokun föför üsap allük ngeniir, esap pwal nom lon ai ekiek. 2.King 23.10; Jer 32.35; Lif 18.21 32 Iwe, epwe war ewe fansoun pwe ewe leni esap chüen iteni Tofet ika lemolun Hinom, nge epwe iteni lemolun ninni. Pun repwe peiaseni ekewe mi mäla lon Tofet, pokiten esap chüen wor lenien peias ekis meinisin. 33 Iwe, ekewe machang me ekewe manmwacho repwe ochei fituken ekei somä, nge esap wor eman epwe eniweer. 34 Iwe, üpwe aükätiu kölün mweireir me pwapwa pwal apwapwan mongön apwüpwülü me lon ekewe telinimwen Juta pwal won ekewe alen Jerusalem. Pun ewe fanü epwe wiliti eu fanü mi pöön. Jer 16.9; 25.10; Pwär 18.23

7:11: Mat 21.13; Mark 11.17; Luk 19.46

7:14: Jos 18.1; Kölf 78.60; Jer 26.6

7:18: Jer 44.17-19

7:31: 2.King 23.10; Jer 32.35; Lif 18.21

7:34: Jer 16.9; 25.10; Pwär 18.23