Paipel JOSUA 18
18
Ewe fanü a ainet me Silo
18.1-10
Mürin, unusen ewe mwichen aramasen Israel ra mwichefengen lon Silo o aüetä ewe imwenfe sen mangaku ikenan. Iwe, ewe fanü mi nom mwer a oola, nge mi chüen wor fisu ainang me lein ekewe ainangen Israel esap mwo ainet ngeniir fanüer. Iei mine Josua a üreni ekewe aramasen Israel, “Pwota ina saromangemi le feila o fanüeni ewe fanü ewe Samol mi Lapalap än ämi kewe lewo we Kot a ngenikemi? Oupwe filätä ülüman mwän seni eu me eu ainang. Üpwe tinirela pwe repwe fetalfeil lon unusen ewe fanü o makei tichikin lapalapan, nge repwe anomu lon ar ekiek meni kinikin epwe öchiti eu me eu ainang. Mürin, repwe liwinto rei. Repwe ineti ewe fanü lon fisu kinikin. Iwe, chon ewe ainangen Juta repwe chök nom lon fanüer me ör, nge chon ewe ainangen Josef repwe nom lon fanüer me efeng. Nge ämi oupwe alapalapa ewe fanü lon fisu kinikin o uwato ewe alapalap rei ikei. Mürin üpwe ütti üttiemi me fän mesen ewe Samol mi Lapalap ach we Kot. Nge esap wor kinikinin fanüen chon ewe ainangen Lefi me leimi, pun ewe wisen souasor ngeni ewe Samol mi Lapalap iei wiser. Nge chon ekewe ainangen Kat me Rupen pwal esopun ewe ainangen Manasa ra fen angei fanüer me peliötiuen ewe chanpupu Jortan, Moses nöün ewe Samol mi Lapalap chon angang a ngeniir.”
Iwe, lupwen ekewe mwän ra popuetä ar sai pwe repwe makei tichikin lapalapen ewe fanü, Josua a öüröüreer o üreniir, “Oupwe fetalfeil lon ewe fanü o makei tichikin lapalapan. Mürin oupwe liwinto rei. Iwe, üpwe ütti üttiemi me fän mesen ewe Samol mi Lapalap ikei lon Silo.” Iei mine ekewe mwän ra feila o fetalfeil lon ewe fanü. Ra makeelong lon eu puk lapalapen ewe fanü pwal eu me eu kewe telinimw lon ekewe fisu kinikin. Mürin ra liwinto ren Josua lon Silo ewe ia ra nom ie. 10 Nge Josua a ütti üttier fanü me fän mesen ewe Samol mi Lapalap lon Silo. Mürin a aineti ewe fanü o ngeni eu me eu kewe lusun ainangen Israel inetin.
Ewe fanü mi ainet ngeni chon ewe ainangen Peniamin
18.11-28
11 Iwe, aeuin kinikinin ewe fanü a ainet ngeni chon ewe ainangen Peniamin a aükük ngeni ükükün ar kewe famili. Kinikinin fanüer a nom lefilen fanüen chon ekewe ainangen Juta me Josef. 12 Iwe, kiännin fanüer me peliefeng a popuetä ren ewe chanpupu Jortan. Mürin a feitä won ewe chukuchukutä peliefengin Jeriko, a pwal feitä o pwerela ngeni lotou won ewe fanü mi chukuchukutä o müchütiu lon ewe fanüapön Pet-awen. 13 Nge seni ikenan ewe kiä a pwerela ngeni ör wenewen ngeni Lus tori won chukuchukutän Lus, iei Petel. Mürin, ewe kiä a feitiu won ewe chuk mi nom peliörün Pet-horon-fan tori Atarot-atar. 14 Nge lepelian me lotou ewe kiä a pwelitiu ngeni ör seni ewe chuk mi nom ör sasape ngeni Pet-horon, nge a müchütiu me Kiriat-paal, iei Kiriat-jearim, eu telinimwen chon ewe ainangen Juta. Iei kiännin me pelilotou. 15 Iwe, kiännin me peliör a popueta me lesopun Kiriat-jearim mi nom lotou o pwerela tori ekewe koluk mi puächetä me lon Neftoa. 16 Mürin, ewe kiä a feitiu fäsonun ewe chuk mi sapechöchö ngeni ewe lemolun Hinnom mi nom peliefengin müchütiuen ewe lemolun Refaim. A pwal fitätiu ewe lemolun Hinnom peliörün ekewe chukun chon Jepus o feitiu tori En-rokel. 17 Mürin, ewe kiä a pwelila ekis ngeni efeng o pwerela tori Ensemes. Seni ikenan a pwerela tori Kelilot mi sasape ngeni ewe palen Atumim. Mürin a feitiu tori ewe fau föün Pohan nöün Rupen we mwän. 18 A pwal pwerela peliefengin won ekewe chukuchukutä sasape ngeni ewe lemolun Jortan o feitiu tori ewe lemol. 19 Mürin, ewe kiä a pwerela peliefengin won ekewe chukuchukutän Pet-hokla o müchütiu me peliefengin ewe Setin Mäla amüchütiuen ewe chanpupu Jortan me ör. Iei kiännin me peliör. 20 Nge ewe chanpupu Jortan kiännin me peliötiu. Iei unusen pwelin kiännin fanüen chon ewe ainangen Peniamin a aükük ngeni ükükün ar kewe famili.
21 Iwe, ikkei iten ekewe telinimwen chon ewe ainangen Peniamin a aükük ngeni ükükün ar kewe famili: Jeriko, Pet-hokla me Emek-kesis, 22 Pet-arapa, Semaraim me Petel, 23 Awim, Para me Ofra, 24 Chefar-amoni, Ofni me Kepa, ükükür meinisin engol me ruu telinimw fiti wisoposopur. 25 Pwal Kipeon, Rama me Peerot, 26 Mispa, Chefira me Mosa, 27 Rekem, Irpeel me Tarala, 28 Sela, Haelef me Jepus, iei Jerusalem, Kipea me Kiriat-jearim, ükükür meinisin engol me rüanü telinimw fiti wisoposopur. Iei fanüen chon ewe ainangen Peniamin a aükük ngeni ükükün ar kewe famili.