Paipel KÖLFEL 79
79
Eu iotekin tüngor alilis, lupwen Jerusalem a tala
79.1-13
Echö än Asaf köl.
Ai Kot, chon ekewe mwü ra tolong lon fanüom.
Ra apiningaua pinin imwom we mi pin
o atatakisi Jerusalem. 2.King 25.8-10; 2.Kron 36.17-19; Jer 52.12-14
Ra ngeni ekewe machang mi mwacho somän noum kewe chon angang pwe ochar,
ra ngeni ekewe manmwacho fituken noum kewe chon pin.
Ra ninätiu char usun koluk pwelin ünükün Jerusalem,
nge esap wor eman a peiaseni ekewe somä.
Äm aia uren takir me ren chon ekewe mwü mi nom ünüküm,
ra turunufasekem o esitakem.
 
Ai Samol mi Lapalap, ifa ükükün fansoun om kopwe song ngenikem? Epwe tori feilfeilachök?
Ifa usun, om lingeringeritikem epwe chök ngetenget usun ekkei?
Kopwe song ngeni chon ekewe mwü resap sileek,
pwal ngeni chokewe resap iotek ngonuk.
Pun ra niela noum aramas
o ataela fanüer.
 
Kosap ukun ngenikem tipisin äm kewe lewo.
Kopwe amüttirato om ümöümöch ngenikem,
pun äm aia apilükingau.
Kopwe alisikem, ai Kot äm Chon Amanau,
pwe itom epwe ling.
Kopwe angasakem o amusala äm tipis pokiten itom.
10 Pwota chon ekewe mwü repwe ais, “Ifa i chök ar we Kot?”
Kopwe öküna ngenikem usun om kopwe ngeni chon ekewe mwü
chappen ar nimanauei noum kewe chon angang.
 
11 Kopwe aüselinga ngüngün ekewe chon fötek.
Fän om manaman mi lapalap kopwe angasala ir mi feil ngeni mäla.
12 Ai Samol, kopwe liwini ngeni chon ekewe mwü fän fisu
ar kewe kapasen turunufas ra turunufaseek ren.
13 Mürin, äm noum aramas, ewe mwichen sipen om mälämäl,
äm aipwe kilisou ngonuk tori feilfeilachök.
Seni eu täppin aramas tori eu täppin äm aipwe mwareituk.

79:1: 2.King 25.8-10; 2.Kron 36.17-19; Jer 52.12-14