7
Mürin, ewe Samol mi Lapalap a üreni Moses, “Nengeni, üpwe awisok pwe kopwe usun chök eman kot ngeni Farao, nge Aaron pwiüm we epwe usun chök noum soufos. Kopwe asile ngeni Aaron mine üa allük ngonuk, nge Aaron pwiüm we epwe kapas ngeni Farao, pwe epwe mwüt ngeni ekewe aramasen Israel repwe towu seni fanüan. Nge ngang üpwe aföreai lelukan. Inamwo ika a chomong ai asisil me ai manaman üa föri lon Isip, Föf 7.36 Farao esap mochen aüselingakemi. Iei mine üpwe afeiengaua Isip ren apwüng mi lapalap, nge üpwe emwenawu nei aramasen Israel seni Isip lon tettelin en me an cho. Mürin ekewe chon Isip repwe mefi pwe ngang ewe Samol mi Lapalap, lupwen üpwe aitiela pei won Isip pwe üpwe afeiengaua o emwenawu ekewe aramasen Israel seni me leir.” Iwe, Moses me Aaron ra föri meinisin mine ewe Samol mi Lapalap a allük ngeniir. Lon ewe fansoun, lupwen ra kapas ngeni Farao, Moses a ierini walik, nge Aaron a ierini walik me ülüngat.
Wokun Aaron we
7.8-13
Iwe, ewe Samol mi Lapalap a üreni Moses me Aaron, “Ika Farao epwe ürenikemi, ‘Oupwe alükülükü wisemi ren ämi oupwe föri manaman,’ en kopwe üreni Aaron, ‘Kopwe angei wokum o monetiu fän mesen Farao pwe epwe wiliti eman serepenit.’ ” 10 Iei usun Moses me Aaron ra feila ren Farao o föri usun mine ewe Samol mi Lapalap a allük ngeniir. Iwe, Aaron a monetiu wokun we fän mesen Farao me nöün kewe nöüwis, nge a wiliti eman serepenit. 11 Mürin, Farao a titi ekewe soutipachem me soupöüt, pwal ir ekewe sourongen Isip. Iwe, ra föri usun mine Aaron a föri. 12 Iteiten eman me eman leir a monetiu wokun, iwe, ra wiliti serepenit. Nge wokun Aaron we a aromala wokur kewe. 13 Nge Farao a chök tipeföreala pwe esap mochen aüselinger, usun ewe Samol mi Lapalap a fen apasa.
Riaföü pokiten koluk mi cha
7.14-24
14 Mürin, ewe Samol mi Lapalap a üreni Moses, “Farao a chök tipeföreala, esap mochen mwüt ngeni ekewe aramas pwe repwe feila. 15 Lesosorun lesor kopwe feila souni Farao ünükün ewe chanpupu Nil, lupwen epwe feila ikenan. Iwe, kopwe uwei ewe wok mi wiliti eman serepenit me mwan. 16 Iwe, kopwe üreni, ‘Ewe Samol mi Lapalap, än chon Ipru we Kot a tinieito reöm pwe üpwe ürenuk, “Kopwe mwüt ngeni nei aramas pwe repwe feila o fel ngeniei lon fanüapö. Nge tori iei kosap mwo aüselingaei.” 17 Iei alon ewe Samol mi Lapalap, “Ren ei kopwe silei pwe ngang ewe Samol mi Lapalap: Üpwe wichi kolukun lon ewe chanpupu Nil ren woki mi nom lepei pwe epwe wiliti cha. Pwär 16.4 18 Iwe, ikenen lon ewe chanpupu Nil repwe mäla, nge ewe chanpupu epwe fokun pongau pwe ekewe chon Isip resap tongeni ün ewe koluk.” ’ ” 19 Iwe, ewe Samol mi Lapalap a üreni Moses, “Kopwe kapas ngeni Aaron pwe epwe angei wokun o aitiela pöün won kolukun Isip meinisin, won ekewe chanpupu me warawaren koluk, won ekewe nasen koluk me ekewe pwangen koluk meinisin, pwe repwe wiliti cha. Iwe, epwe chök cha won unusen ewe fanü Isip, pwal lon mwo nge sepi mi för seni mwüch me fau.”
20 Iwe, Moses me Aaron ra föri meinisin mine ewe Samol mi Lapalap a allük ngeniir. Aaron a aitiela wokun o wichi kolukun lon ewe chanpupu Nil, pwe kolukun meinisin a wiliti cha. Ei a föri me fän mesen Farao me nöün kewe nöüwis. 21 Iwe, ikenen lon ewe chanpupu Nil ra mäla, nge kolukun lon ra fokun pongau, pwe chon Isip resap tongeni ün seni. Iwe, a cha won unusen ewe fanü Isip. 22 Mürin, ekewe sourongen Isip ra pwal föri ei sokun manaman ren ronger. Iei mine Farao a chök tipeförea, pwe esap mochen aüselinga Moses me Aaron, usun mine ewe Samol mi Lapalap a fen apasa. 23 Iwe, Farao a liwiniti imwan, nge esap ekieki usun lon lelukan. 24 Nge chon Isip meinisin ra tufetal pwang ünükün ewe chanpupu Nil pwe repwe kütta ünümer koluk, pun resap tongeni ün seni ewe chanpupu Nil.
Riaföü ren kairü
7.25-8.15
25 Iwe, ewe Samol mi Lapalap a angauala kolukun lon ewe chanpupu Nil lon ükükün fisu rän.

7:3: Föf 7.36

7:17: Pwär 16.4