Paipel PWÄRÄTÄ 18
18
Papilon a tala
18.1-19.4
Mürin ei, üa küna pwal eman chon läng a feitiu seni läng, a eäni watten manaman, o ren lingan a asaramala unusen fanüfan. A kökkö ren mwelian mi leüömong, “A tala, a tala Papilon mi lapalap. Iei a wiliti eu lenien anün rochopwak me ngün mi limengau. Sokopaten machang mi limengau me anioput ra nonom lon. Ais 13.21; 21.9; Jer 50.39; 51.8; Pwär 14.8 Pun chon ekewe mwü meinisin ra puchula ren ar ün ünüman wain, iei ewe wainen an mocheisou. Ekewe kingen fanüfan ra föri föförün lisowu ngeni, nge ekewe chon amömö won fanüfan ra pisekisekila ren chomongun an kewe föför mi ngau.” Ais 23.17; Jer 51.7
Mürin üa rongorong möngüngün eman seni läng a apasa,
“Oupwe towu, oupwe towu nei aramas seni lon Papilon!
Iwe, ousap eti le föri an kewe tipis,
pwe ousap angei och seni an kewe feiengau. Ais 48.20; Jer 50.8; 51.6,45
Pun an kewe tipis ra chukuchukutä tori läng,
nge Kot a chechemeni an kewe föför mi ngau. Ken 18.20-21; Jer 51.9
Oupwe föri ngeni i usun mine a fen föri ngenikemi.
Oupwe liwini ngeni fän ruu liwinin meinisin mine a föri.
Oupwe alölöü an we kap ngeni minen ün aükükün pöchökülan fän ruu
seni ewe minen ün a amolätä fän itemi. Kölf 137.8; Jer 50.29
Oupwe awora ngeni neminei chomong riaföü me letipeta,
usun chök watten ewe ling a püsin alinga ngeni me ewe pwapwan fanüfan a awora ngeni.
Pun a püsin ekieki lon letipan,
‘Ngang eman kiwin, üa mot won ai lenien mot!
Ngang üsap eman fin lipichsefäl.
Ngang üsap fokun tolong lon letipeta.’
Pokiten a eäni ei sokun ekiek, lon eu chök rän neminei epwe fokun tolong lon ekei feiengau:
samau, letipeta me mailengita.
Iwe, epwe karala ren ekkei,
pun ach Samol Kot, ewe mi apwüngü, a wor an pöchökül.” Ais 47.7-9
Iwe, ekewe kingen fanüfan mi eti i le föri föförün lisowu me mocheniangau repwe pupuchör o kechüeiti ewe telinimw, lupwen repwe küna ötüötün ewe ekkei mi kenala. 10 Ra ütä me toau, pun ra niuokus ar repwe eti lon an riaföü. Ra apasa, “A ifan me watten feiengauom! A ifan me amairün feiengauom! En telinimw Papilon mi watte o pöchökül. Lon eu chök awa ka küna apwüng!” Is 26.16-17
11 Ekewe chon amömö pisek won fanüfan ra pwal kechü o letipeta usun ewe telinimw, pun esap chüen wor eman mi kamö ar kewe pisek. Is 27.31,36 12 Esap chüen wor eman a kamö ar kolt, silifer, fau aüchea, föün pwei, ar mangaku mi pwechepwech, mangaku mi parachol, mangaku mi mitimit me mangaku mi parapar, sokopaten mwüch mi pwoöch, sokopaten pisek mi för seni ngiin äläfan me sokun mwüch mi liwinimong, pisek seni piras me mächä me ekewe fau iter marpel. 13 Esap chüen wor eman a kamö ar sinamon, nofitin mongö mi pwoarar, apach mi pwokus, säfei mi aüchea me lö mi pwokus. Esap chüen wor eman a kamö ar wain, apüra, pilawa mi amas me wiich, nöür kow me sip, nöür oris me waar woken, nöür amanau, pwal mwo nge aramas. Is 27.12,13,22 14 Ekewe chon amömö ra kapas ngeni ewe telinimw, “Ekewe mettoch meinisin mi mürina ka mochenia ngeni om kopwe eäni resap chüen nom. Woumw kewe meinisin me lingom ra feil senuk, nge kosap chüen künasefäliir!” 15 Ekewe chon amömö mi pisekisekila ren ar amömö pisekir me lon ewe telinimw repwe ütä me toau, pun ra niuokus ar repwe eti lon an riaföü. Repwe kechü o letipeta, Is 27.31,36 16 repwe apasa, “A ifan me watten feiengauan! A ifan me amairün feiengauen ewe telinimw mi watte! A soun üföüf üf mi pechepwech, parachol me parapar o foutei ngeni sokun fout seni kolt, fau aüchea me föün pwei! 17 Lon eu chök awa wöün meinisin a pöüt seni.”
Iwe, käptinin waan kewe sip meinisin me ekewe pasisö, ekewe säla me chokewe meinisin mi manau seni ar angang le matau ra ütä me toau 18 o pupuchör lupwen ra küna ötüötün ewe ekkei mi kenala ewe telinimw. Ra apasa, “Esap fokun wor pwal eu telinimw mi wewe ngeni ei telinimw mi watte!” 19 Iwe, ra wätä pwül won mökürer, ra kechü lon ar letipeta o apasa, “A ifan me watten feiengauan! A ifan me amairün feiengauen ei telinimw! Iei ewe telinimw ia chokewe mi wor waar sip mi sai le matau ra pisekisekila ren wöün. Lon eu chök awa mettoch meinisin mine a eäni a pöüt seni.” Is 27.30-34
20 En läng, kopwe fokun pwapwa pokiten ewe telinimw a tala. Oupwe fokun pwapwa ämi kewe chon pin, ämi kewe soukünö me ämi kewe soufos! Pun Kot a apwüngü ewe telinimw ren met a föri ngenikemi. Tut 32.43; Jer 51.48
21 Mürin eman chon läng mi pöchökül a ekietä eföü fau mi wewe ngeni eföü föün föir mi watte, a aturätiu lon ewe matau o apasa, “Iei usun en Papilon, ewe telinimw mi watte, kopwe fokun koturfochofochotiu fän pöchökül, o kosap chüen pwäsefäl. Jer 51.63-64; Is 26.21 22 Esap chüen wor eman epwe rongorong tikin kitar me ngingiin chon köl, pwal tikin likaangün me tikin rappwa me lon alom kewe. Esap chüen wor sousilelap lon sokun angang meinisin epwe pwäsefäl me lon en, esap pwal chüen wor eman mi rongorong ngüngün ewe lenien kata föün wiich. Is 26.13; Ais 24.8 23 Esap chüen wor eman epwe küna tinen eu lamp lon en, esap pwal chüen wor eman epwe rongorong möngüngün ekewe mwän apwüpwülü söfö me fin apwüpwülü söfö me lon en. Noumw kewe chon amömö a wor ar pöchökül won unusen fanüfan, nge ren om angangen rong ka atupu aramasen fanüfan meinisin!” Jer 7.34; 25.10
24 Papilon a küna kapwüng pokiten chaan ekewe soufos me ekewe chon pin a ninnila lon, ewer, chaan chokewe meinisin mi ninnila won fanüfan. Jer 51.49

18:2: Ais 13.21; 21.9; Jer 50.39; 51.8; Pwär 14.8

18:3: Ais 23.17; Jer 51.7

18:4: Ais 48.20; Jer 50.8; 51.6,45

18:5: Ken 18.20-21; Jer 51.9

18:6: Kölf 137.8; Jer 50.29

18:8: Ais 47.7-9

18:10: Is 26.16-17

18:11: Is 27.31,36

18:13: Is 27.12,13,22

18:15: Is 27.31,36

18:19: Is 27.30-34

18:20: Tut 32.43; Jer 51.48

18:21: Jer 51.63-64; Is 26.21

18:22: Is 26.13; Ais 24.8

18:23: Jer 7.34; 25.10

18:24: Jer 51.49