Paipel JEREMAIA 16
16
Kot a apwüngü ekewe aramas
16.1-21
Iwe, ewe Samol mi Lapalap a üreniei, “Kosap pwüpwülü, esap pwal wor noum mwän ika noum fefin lon ena sokun leni. Üpwe ürenuk mine epwe fis ngeni ekewe mwän me fefin mi uputiu lon ei leni, pwal ngeni ekewe in me sam mi nöüniir me lon ei fanü: Repwe mäla ren samau mi afeiengau. Esap wor eman epwe kechü wor, resap pwal peias, nge repwe usun chök kiten mongö won pwül. Repwe mäla lon maun pwal ren lengita, nge ekewe machang me ekewe manmwacho repwe ochei somär.
Kosap tolong lon imwen chon letipeta, kosap feila rer pwe kopwe kechü o achipeer, pun ngang üa angei seni ekei aramas ai kinamwe, ai tong ellet me ai ümöümöch. Iwe, aramas tekia me aramas tekison repwe mäla lon ei fanü. Resap peias, esap pwal wor eman epwe kechüeitiir ika akinasa inisin ika räisöla möküran fän iter. Esap wor eman epwe uwato mongö pwe epwe achipa chokewe mi letipeta fän iten ewe mi mäla, inamwo ika i eman sam ika in. Esap pwal wor eman epwe ngeniir ünümer pwe repwe chip. Kosap pwal feila lon eu imw ia a fis kametip ie, pwe kopwe mot rer o etiir le mongö o ün. Kopwe rongorong mine ngang ewe Samol mi Unusen Manaman, ewe Koten Israel, üa apasa: Üpwe aükätiu kölün mweireir me pwapwa, pwal apwapwan mongön apwüpwülü me lon ei leni me fän mesom lon ränin manauom. Jer 7.34; 25.10; Pwär 18.23
10 Iwe, lupwen kopwe üreni ekei aramas ekei kapas meinisin, repwe aisinuk, ‘Pwota ewe Samol mi Lapalap a apwüngala ei sokun feiengau mi watte ngenikem? Met äm föföringau? Met sokun tipis aia föri ngeni ewe Samol mi Lapalap äm we Kot?’, 11 mürin kopwe üreniir, ‘Iei alon ewe Samol mi Lapalap: Ei a fis pokiten ämi kewe lewo ra likitieila, pwe repwe angang ngeni pwal ekoch kot o fel ngeniir. Ra likitieila, nge resap aleasochisi ai kewe allük. 12 Nge ämi oua fen föri föför mi ngau lap seni ämi kewe lewo. Oua en me chei ülöförean letipan mi ngau, nge ousap fokun aleasochisiei. 13 Iei mine üpwe aturukemiiwu seni ei fanü o aturukemiilong lon eu fanü ämi me ämi kewe lewo ousap silei me mwan. Ikenan oupwe angang ngeni pwal ekoch kot lerän me lepwin, pun ngang üsap kirikiröch ngenikemi.’ ”
14 Iei alon ewe Samol mi Lapalap, “Epwe war eu fansoun aramas resap chüen apasa, ‘Mwo manauen ewe Samol mi Lapalap mi emwenawu ekewe aramasen Israel seni lon ewe fanü Isip.’ 15 Nge repwe apasa, ‘Mwo manauen ewe Samol mi Lapalap mi emwenawu ekewe aramasen Israel seni ewe fanü efeng, pwal seni lon ekewe fanü meinisin ia a asürela ie.’ Pun ngang üpwe aliwinisefälireto ngeni püsin fanüer üa ngeni ar kewe lewo.”
16 Iei alon ewe Samol mi Lapalap, “Üpwe tinala chomong chon attau, repwe attaua ekei aramas. Mürin, üpwe tinala chomong chon tapweri man, repwe tapweriir won iteiten chukutekia me chukutekison, pwal me lon pwangen ekewe achau. 17 Pun üa küna mettoch meinisin ra föri. Resap tongeni op seniei, ar föför mi ngau esap pwal mon seniei. 18 Iwe, üpwe liwini ngeniir fän ruu liwinin ar föföringau me tipis, pokiten ra alimengaua fanüei ren ar kewe uluulun anümwäl esap wor manau lor usun ekewe somä, ra pwal amasoua fanüei ren ar kewe uluulun anümwäl mi anioput.”
19 Ai Samol mi Lapalap, en ai pöchökül me imwei imwen maun, en ai lenien op lon fansoun riaföü. Chon ekewe mwü repwe feito reöm seni lesopun fanüfan o apasa, “Esap wor och äm kewe lewo ra fel ngeni, ngei kot mi mwäl, ekewe uluulun anümwäl mi lomotongau. 20 Ifa usun, aramas ra tongeni föri püsin ar kot? Nge ika ina, iwe, sap ir kot.”
21 Iwe, ewe Samol mi Lapalap a apasa, “Iei mine lon ei fansoun üpwe föri pwe repwe silei ai manaman me ai pöchökül. Mürin repwe silei pwe itei ewe Samol mi Lapalap.”

16:9: Jer 7.34; 25.10; Pwär 18.23