Paipel KÖLFEL 100
100
Sipwe kilisou ngeni Kot
100.1-5
Echö köl fän iten asoren kilisou.
Oupwe eäni eu mweireiren pwapwa ngeni ewe Samol mi Lapalap, ämi chon fanüfan meinisin.
Oupwe angang ngeni ewe Samol mi Lapalap fän pwapwa,
oupwe feito fän mesan ren kölün pwapwa.
 
Oupwe silei pwe ewe Samol mi Lapalap i Kot.
I ewe a förikich, nge kich sa nöün.
Sa nöün aramas me nöün sip lon an we mälämäl.
 
Oupwe tolong lon asamen imwan fän kilisou,
oupwe tolong lon rumwen imwan kewe fän kölün mwareiti i.
Oupwe kilisou ngeni o mwareiti itan.
Pun ewe Samol mi Lapalap a kirikiröch,
an tong ellet a nonom tori feilfeilachök,
nge an allükülük a tori ekewe täppin aramas meinisin. 1.Kron 16.34; 2.Kron 5.13; 7.3; Esr 3.11; Kölf 106.1; 107.1; 118.1; 136.1; Jer 33.11

100:5: 1.Kron 16.34; 2.Kron 5.13; 7.3; Esr 3.11; Kölf 106.1; 107.1; 118.1; 136.1; Jer 33.11