Paipel 2.KRONIKA 5
5
Lupwen Salomon a awesi ekewe angang meinisin won imwen ewe Samol mi Lapalap, a uwato ekewe pisek meinisin, ewe silifer me kolt me ekewe sokopaten pisek meinisin Tafit saman we a apini, o isenirelong lon ekewe lenien iseis pisek mi aüchea me lon ewe imwenfel. 2.Sam 8.11; 1.Kron 18.11
Salomon a uwala ewe pworofel lon ewe imwenfel
5.2-14
(1.King 8.1-9)
Mürin, ewe king Salomon a körato ren ekewe souakomwen Israel me mwänirelan ekewe ainang meinisin, pwal ekewe souemwenin ekewe eterekesin Israel. Iwe, a amwichafengeniir lon Jerusalem, pwe repwe uwato lon ewe imwenfel än ewe Samol mi Lapalap we pworofel seni ewe telinimwen Tafit, iei Sion. 2.Sam 6.12-15; 1.Kron 15.25-28 Iwe, ekewe re Israel meinisin ra mwicheto ren ewe king lupwen fansoun ewe chulapen likachoch lon ewe afisuen maram. Lupwen ekewe souakomwen Israel meinisin ra feito, ekewe mwän seni ewe ainangen Lefi ra ekietä wor ewe pworofel o mwäreela ren ewe imwenfel. Iwe, ekewe souasor me ekewe mwän seni ewe ainangen Lefi ra pwal uwala ewe imwenfel seni mangaku me ekewe pisek mi pin meinisin mi nom lon ren ewe imwenfel. Nge ewe king Salomon me ekewe chon Israel meinisin mi mwichefengen ren ra nom mwen ewe pworofel o eäni asor chomong sip me ätemwänin kow, pwe ekewe mönün asor resap chüen tongeni lea. Mürin, ekewe souasor ra uwalong än ewe Samol mi Lapalap we pworofel lon ewe imwenfel o anomu lon ewe rum mi unusen pin fän pöükässin ekewe kerop. Pöükässin ekewe kerop mi meresiwu ra pwölüela won ewe pworofel me ämwärin kewe. Ekewe ämwär ra kon langatam, pwe eman a tongeni küna lesopur seni ewe rum mi pin, ika a ü mwen ewe rum mi unusen pin, nge esap wor eman a tongeni küneer me lükün. Iwe, ekewe ämwär ra nom ikenan tori ikenai. 10 Iwe, esap wor och lon ewe pworofel, chilon chök ekewe rüepek fau mi chöpöp, Moses a isenirelong lon me arun ewe chuk Horep. Iei ewe ia ewe Samol mi Lapalap a eäni eu pwon ngeni ekewe aramasen Israel, lupwen ra towu seni ewe fanü Isip. Tut 10.5 11 Mürin, ekewe souasor ra towu seni lon ewe imwenfel. Ekewe souasor meinisin mi nom ra apiniir, ese lifilifil ika meni mwich ra choni. 12 Nge ekewe chon köl ir chon ewe ainangen Lefi: Asaf, Heman me Jetutun, nöür kewe mwän me märärir kewe ra üföüf üf mi pwechepwech o ütä peliötiuen ewe rongen asor. Ra eäni pisekin kaktai, kitar me ükülele, nge ipükü rüe souasor mi ettiki rappwa ra etiir. 13 Ekewe chon ettiki rappwa me ekewe chon köl ra chietäpök le mwareiti ewe Samol mi Lapalap o kilisou ngeni. Iwe, ra chietä ar köl fiti tikin rappwa, pisekin kaktai me sokopaten pisekin ettik o mwareiti ewe Samol mi Lapalap, “Kot a kirikiröch, an tong ellet a nonom tori feilfeilachök.” Lon ei otun imwen ewe Samol mi Lapalap a urela ren eu kuchu, 1.Kron 16.34; 2.Kron 7.3; Esr 3.11; Kölf 100.5; 106.1; 107.1; 116.1; 136.1; Jer 33.11 14 ina mine ekewe souasor resap chüen tongeni föri ar angang lon, pokiten ewe kuchu. Pun än ewe Samol mi Lapalap ling a aurala ewe imwenfel. Eks 40.34-35

5:1: 2.Sam 8.11; 1.Kron 18.11

5:2: 2.Sam 6.12-15; 1.Kron 15.25-28

5:10: Tut 10.5

5:13: 1.Kron 16.34; 2.Kron 7.3; Esr 3.11; Kölf 100.5; 106.1; 107.1; 116.1; 136.1; Jer 33.11

5:14: Eks 40.34-35