Paipel KÖLFEL 106
106
Än Kot kirikiröch ngeni nöün aramas me ar ü ngeni
106.1-48
Ousipwe mwareiti ewe Samol mi Lapalap.
Oupwe kilisou ngeni ewe Samol mi Lapalap, pun i a kirikiröch,
an tong ellet a nonom tori feilfeilachök. 1.Kron 16.34; 2.Kron 5.13; 7.3; Esr 3.11; Kölf 100.5; 107.1; 118.1; 136.1; Jer 33.11
Iö a tongeni apworausa än ewe Samol mi Lapalap föför mi manaman?
Iö a tongeni anafa an mwareiti i?
Ra feiöch chokewe mi aleasochisi an kewe allük
o föri mine a pwüng fansoun meinisin.
 
Ai Samol mi Lapalap, kopwe chechemeniei, lupwen ka pwäri om kirikiröch ngeni noum aramas.
Kopwe pwal ochueilong, lupwen ka amanaueer,
pwe üpwe tongeni küna feiöchün noum kewe mi fil
o eti chon mwum lon ar pwapwa,
üpwe pwal eti noum aramas kana le mwareituk.
 
Äm aia tipis usun chök äm kewe lewo.
Äm aia föri föför mi ngau o apwönüetä föför esepwüng.
Lupwen äm kewe lewo ra nom lon Isip, resap ekieki än Kot kewe föför mi amwarar,
resap pwal chechemeni an tong ellet mi lapalap,
nge ra ü ngeni Ewe mi Unusen Tekia me arun ewe Setipar. Eks 14.10-12
Nge Kot a amanaueer fän püsin itan
pwe epwe pwärätä an manaman mi pöchökül.
A allük ngeni ewe Setipar pwe a pwasatä,
a emwenirelong epin ewe matau usun lon eu fanüpwas.
10 A amanaueer seni chon pälüeniir
o angaseer seni chon oputeer.
11 Ewe sät a pwölüela ekewe chon ü ngeniir,
pwe esap wor eman mi chüen manau.
12 Mürin, ra lükü an kewe kapasen pwon
o kölün mwareiti i. Eks 14.31; Eks 15.1-21
13 Nge chon Israel ra müttir manlükala an kewe föför,
resap awiti an öüröür.
14 Ra fokun mwäräkich me lon ewe fanüapö
o sotuni Kot lon ewe fanüpwas.
15 Iei mine a ngeniir mine ra tüngor,
nge a pwal tinato eu mätter mi afeiengau leir. Num 11.4-34
16 Ikenan lon ewe fanüapö ekoch me leir ra lolowo ngeni Moses
me Aaron, ätewe ewe Samol mi Lapalap a apini.
17 Mürin, ewe pwül a sangfesen o oromala Tatan,
a pwal pwölüela Apiram me an we mwich.
18 Ekkei a pwal ngetewu me lein chokewe mi etiir
o kenala ekewe aramasangau. Num 16.1-35
19 Iwe, ra föri eu uluulun nienifön kow me lon Horep
o fel ngeni ewe uluulun anümwäl seni mächä.
20 Ra akasiwili ewe lingen Kot
ngeni uluulun eman kow mi mongö fetil.
21 Ra manlükala Kot ar Chon Amanau
mi föri föför mi manaman me lon Isip.
22 A föri föför mi amwarar me ikenan,
pwal mettoch mi eniwokus me arun ewe Setipar.
23 Iei mine Kot a apasa pwe epwe aroserela.
Nge Moses nöün we chon angang mi fil a ütä lefiler me Kot,
pwe epwe asepa an lingeringer, pwe esap aroserela. Eks 32.1-14
24 Mürin, ra oput ewe fanü mi mürina,
resap lükü an we pwon.
25 Ra ngününgün me lon imwer imw mangaku,
nge resap aleasochis ngeni alon ewe Samol mi Lapalap.
26 Iei mine Kot a aitietä pöün o pwon fän akapel ngeniir
pwe epwe nirela me lon ewe fanüapö, Num 14.1-35
27 epwe atoropasafeili mwirimwirir lein chon ekewe mwü
pwe repwe mäla lon ewe fanüen chon ekis. Lif 26.33
28 Mürin, ra fiti ekewe aramas mi fel ngeni Paal me lon Peor
o mongö ekewe föten anü ra eäni asor ngeni ekewe kot ese wor manau lor.
29 Ra asonga ewe Samol mi Lapalap ren ar kewe föför,
pwe eu mätter a terifetal leir.
30 Mürin, Pinehas a ütä o apwüngü ekewe mi tipis,
pwe ewe mätter a ükütiu.
31 Iwe, ren ei föför Pinehas a küna pwüng me ren Kot
seni eu täppin aramas tori eu täppin tori feilfeilachök. Num 25.1-13
32 Iwe, chon Israel ra asonga Kot me arun ekewe kolukun Meripa.
Moses a küna riaföü watte pokiter,
33 pun ra achouu lelukan
pwe a ssela an fos.
 
34 Iwe, chon Israel resap pwal arosala chon ekewe mwü
usun ewe Samol mi Lapalap a allük ngeniir.
35 Nge ra pwüpwülüfengen me chon ekewe mwü
o föri sokun föför usun mine ir ra föri.
36 Ra fel ngeni ar kewe uluulun anümwäl,
nge ekewe uluulun anümwäl ra wiliti eu likatup ngeniir.
37 Ra eäni asor nöür kewe ät me nengin
ngeni ekewe anün rochopwak.
38 Ra niela nöür kewe ät me nengin esap wor ar tipis,
o eäniir asor ngeni ekewe uluulun anümwäl än chon Kanaan.
Iwe, ewe fanü a limengau ren ei sokun föför.
39 Iei usun ra limengau ren ar föför
o kirikiringau ngeni Kot ren ar lapalap usun lapalapen eman fin lisowu.
 
40 Iei mine ewe Samol mi Lapalap a fokun song ngeni nöün aramas,
pwe a fokun anioputäsiniir.
41 A asechirela fän nemenien chon ekewe mwü,
pwe chokewe mi oputeer ra nemeniir.
42 Iwe, chon oputeer ra ariaföüür
o atolongeer fän ar nemenem.
43 Fän chomong Kot a angaserela,
nge ra chök sopwela le ü ngeni.
Iwe, ra sapwilitiu pokiten ar tipis.
44 Iei mwo nge Kot a chök ekieki ar riaföü,
lupwen a rongorong ar siö.
45 A chechemeni an pwon fän äsengesiir,
lon an tong ellet mi lapalap a liamamala ren mine a föri ngeniir.
46 A föri pwe chokewe meinisin mi liapeniir
o uweerela lon ekewe fanü mi toau repwe tongeer. Souk 2.14-18
47 Ai Samol mi Lapalap äm Kot, kopwe amanauakem
o achufengenikem seni me lein chon ekewe mwü,
pwe aipwe kilisou ngonuk
o mwareiti itom mi pin.
 
48 Oupwe mwareiti ewe Samol mi Lapalap, ewe Koten Israel
seni fansoun esepop tori fansoun esemüch.
Iwe, ekewe aramas meinisin repwe apasa, “Amen.”
Ousipwe mwareiti ewe Samol mi Lapalap. 1.Kron 16.35-36

106:1: 1.Kron 16.34; 2.Kron 5.13; 7.3; Esr 3.11; Kölf 100.5; 107.1; 118.1; 136.1; Jer 33.11

106:7: Eks 14.10-12

106:12: Eks 14.31; Eks 15.1-21

106:15: Num 11.4-34

106:18: Num 16.1-35

106:23: Eks 32.1-14

106:26: Num 14.1-35

106:27: Lif 26.33

106:31: Num 25.1-13

106:46: Souk 2.14-18

106:48: 1.Kron 16.35-36