Paipel KÖLFEL 68
68
Ewe Koten Sinai me an we mwichefel
68.1-35
Ngeni ewe mi emweni chon köl: Echö än Tafit köl.
Kot epwe ütä o atoropasafeili chon oputan,
chokewe mi oputa i repwe sü me mwan.
Usun asepwäl a ässala ötüötün ekkei, iei usun epwe ässirela.
Usun kiris a telila ren ekkei,
iei usun ekewe aramasangau repwe rosola me fän mesen Kot.
Nge ekewe chon pwüng repwe uren pwapwa, repwe mwänek me fän mesen Kot,
repwe mweireir fän pwapwa.
 
Oupwe köl ngeni Kot, oupwe kölün mwareiti itan.
Oupwe chietä echö köl ngeni ewe mi wawa ekewe kuchu,
itan ewe Samol mi Lapalap. Oupwe mwänek me fän mesan.
 
Kot ewe mi nom lon imwan mi pin,
i semen ekewe mi mäsen me chon tümwünün ekewe fefin mi mä pwülüer.
Kot a ngeni ekewe mi akaleman ar famili,
a emwenawu ekewe chon fötek pwe repwe ngasala fän pwapwa,
nge ekewe chon ü ngeni Kot repwe nom lon eu fanü mi pwasapwas o pwichikar.
 
Ai Kot, lupwen ka akom mwen noum aramas,
lupwen ka pwerela lon ewe fanüapö,
fanüfan a chechech, ekewe läng ra apüngätiu üt me fän mesen Kot.
Ewe chuk Sinai a chechech me fän mesen Kot,
ewe Koten Israel. Eks 19.18
Ai Kot, ka apüngätiu ütomong ekis meinisin.
Ka amürinala fanüom, lupwen a pwasala.
10 Noum kewe aramas ra küna lenier me lon.
Lon om kirikiröch, ai Kot, ka tümwünü ekewe chon wöüngau.
 
11 Ewe Samol a atowu ewe kapas.
A fokun lapalap ewe mwichen fefin mi arongafeili ewe pworausen win,
12 “Ekewe king me nöür kewe mwichen sounfiu ra süla.”
Ekewe fefin mi nom leimw ra inetifengeni mine ekewe sounfiu ra liapeni lon maun.
13 Uluulun lisom, pöükässir ra pwölüpwöl ngeni silifer,
nge ülöüler ra molupolup ren kolt mi mürina.
Pwota ekoch me leimi ra chök nonom lefilen ekewe lenien sip?
14 Lupwen Ewe mi Unusen Manaman a atoropasafeili ekewe king won ewe fanü,
snow a püngütiu won ewe chuk Salmon.
 
15 Ewe chuk Pasan eu chuk mi tekia.
Eu chuk mi wor chomong chukun.
16 En chuk mi chukuchukutä, pwota ka nennetiu fän lolowo
won ewe chuk Kot a filätä pwe epwe nonom won.
Ewer, iei ewe leni ewe Samol mi Lapalap epwe nonom ie tori feilfeilachök.
 
17 Ewe Samol a feito seni ewe chuk Sinai ngeni ewe leni mi pin
fiti ngeröün wan woken mi pöchökül.
18 A feitä won ewe chuk mi tekia
o emwenätä chon oola lon an mwich mi tapwela mürin,
a pwal angei lifang seni aramas, fokun seni chokewe mi ü ngeni,
Kot ewe Samol mi Lapalap epwe nonom ikenan. Ef 4.8
19 Sipwe mwareiti ewe Samol
mi mwärei ach wosochou iteiten rän.
Kot ach Chon Amanau.
20 Ach Kot eman Kot mi amanauakich,
Kot ewe Samol
a angasakich seni mäla.
 
21 Nge Kot epwe amökkü möküren chon oputan,
epwe amökkü mongosaponen ätewe mi chök föföri tipis.
22 Iwe, ewe Samol a apasa, “Üpwe aliwinato chon oputom seni Pasan.
Üpwe aliwinireto seni epin matau,
23 pwe pecheöm epwe fetal lon char,
nge noum kewe kolak repwe asomwa inetir seniir.”
 
24 Ai Kot, aramas ra küna om fetal fän win,
ra küna än ai Kot me ai king fetalelong lon imwan mi pin.
25 Ekewe chon köl ra akom, ekewe chon ettik pisekin ettik ra nom mürin,
nge ekewe föpwül mi ettik pisekin kaktai ra nom lukalaper,
26 “Oupwe mwareiti Kot lon ewe mwich mi lap.
Oupwe mwareiti ewe Samol mi Lapalap, ämi mwirimwirin Jakop.”
27 Peniamin ewe ainang mi kükün me leir a akom mwer,
ekewe samolun Juta lon mwicheicher ra tapw müriir,
nge ekewe samolun Sepulon me Naftali ra kükümwir.
 
28 Ai Kot, kopwe aworato om manaman.
Ai Kot, kopwe pwärawu ngenikem om pöchökül usun ka fen föri me mwan.
29 Pokiten om we imwenfel lon Jerusalem
ekewe king repwe uwato lifang ngonuk.
30 Kopwe apwüngü Isip, ewe manmwacho mi nom lein ekewe wowo.
Kopwe apwüngü ekewe mwü, ewe pwiin ätemwänin kow me nöür kewe nienifön kow,
tori repwe chapetiu me mwom o fang ngonuk ar silifer.
Kopwe atoropasafeili chon ekewe mwü mi pwapwaiti maun.
31 Chon künö repwe feito seni Isip.
Chon Itiopia repwe aitietä pöür lon ar iotek ngeni Kot.
 
32 Oupwe köl ngeni Kot, ämi chon ekewe mwü won fanüfan,
oupwe kölün mwareiti ewe Samol,
33 ewe mi saifeil lon ekewe läng,
ekewe längin lomlom.
I ewe mi fos fän mwelian mi leüömong.
34 Oupwe asilefeili än Kot manaman,
lingan a nom won Israel,
nge an manaman a nom lon ekewe läng.
35 Kot a men eniwokus, lupwen a towu seni imwan mi pin.
I ewe Koten Israel
mi ngeni nöün kewe aramas manaman me pöchökül.
Sipwe mwareiti Kot!

68:8: Eks 19.18

68:18: Ef 4.8