69
Siö fän riaföü
69.1-36
Ngeni ewe mi emweni chon köl: Ei köl usun ngingin ewe köl itan Kiop. Echö än Tafit köl.
Ai Kot, kopwe amanauaei!
Pun ekewe koluk ra feitä tori fän üei.
Üa kokotiu lon pwakak mi alolol,
esap wor ana ie üpwe ipwetiu ie.
Üa nonom lon koluk mi alolol,
nge ekewe no ra pwölüeila.
Üa fokun malülü ren ai siö,
chiorei a pinela,
mesei ra toputopula
ren ai witiwiti om kopwe alisiei.
 
Chokewe mi oputaei, nge esap wor popun,
ra chomong seni iteiten meten mökürei.
Chokewe mi mochen nieila ra pöchökül,
ra kapas chofana usi.
Ra pöchökül ngeniei
pwe üpwe aliwinala mettoch üsap soläni. Kölf 35.19; Joh 15.25
Ai Kot, en ka silei ai kewe föför mi mwäl,
nge ai kewe tipis üa föriir resap mon senuk.
 
Ai Kot, en ewe Samol mi Unusen Manaman,
kosap mwütätä pwe chokewe mi eänuk apilükülük repwe säw pokitei.
En ewe Koten Israel,
kosap mwütätä pwe chokewe mi fel ngonuk repwe itengau pokitei.
Pun üa itengau fän itom,
nge säw a pwölüeila.
Üa usun chök eman wasöla ngeni pwii kewe,
üa usun chök eman chon ekis ngeni nöün inei kewe.
 
Pun ai ekipwichi imwom mi pin a küküri leüti usun ekkei,
nge ekewe kapasen esit mi toruk ra pwal toriei. Joh 2.17; Rom 15.3
10 Iwe, lupwen üa atekisonaeitiu ren ai echikefel,
aramas ra asitaei.
11 Lupwen üa üföüf üf seni tuk,
ra chök takiriei.
12 Ir mi mot lon asamalapen ewe telinimw ra kapasen ämängau usi,
nge ekewe chon puch ra kölüei.
 
13 Nge ngang üa chök iotek ngonuk, ai Samol mi Lapalap.
Kopwe pälüeniei, ai Kot, lon fansoun mi fich me reöm.
Kopwe pälüeniei lon om tong ellet,
pun ka apwönüetä om we pwon pwe kopwe amanauaei.
14 Kopwe amanauaei seni ai kokotiu lon ewe pwakak.
Kopwe angasaei seni ekewe chon oputaei,
pwal seni ekewe koluk mi alolol.
15 Kosap mwütätä pwe ekewe no repwe pwölüeila,
kosap pwal mwüt ngeniei pwe üpwe kokotiu lon ewe lenien alolol,
ika mwocholong lon peias.
 
16 Ai Samol mi Lapalap, kopwe pälüeniei lon om tong ellet mi mürina.
Kopwe kul ngeniei lon om ümöümöch mi somwola.
17 Kosap amona mesom seni noum chon angang.
Kopwe müttir pälüeniei, pun ngang üa nom lon riaföü.
18 Kopwe kaneto rei o amanauaei,
kopwe angasaeila seni ekewe chon oputaei.
 
19 En ka silei usun ai küna turunufas,
usun ai säw me ai itengau,
ka pwal silei ekewe chon oputaei meinisin.
20 Ekewe kapasen turunufas ra atatakisi lelukei
pwe üa nom lon apilükingau.
Üa kütta ika eman epwe tongeei, nge esap wor eman,
üa pwal kütta ika eman epwe achipaei, nge esap wor eman.
21 Ra uwalong poison lon enei mongö,
nge lupwen üa kaka, ra aünüei finikar. Mat 27.48; Mark 15.36; Luk 23.36; Joh 19.28-29
22 Amwo ar kewe kametip repwe wiliti eu likatup ngeniir,
nge ar kewe chulapen mongö mi pin repwe wiliti eu sär mi awarato feiengau wor.
23 Amwo meser repwe toputop pwe resap tongeni küna mwer,
kopwe pwal föri pwe sökürür epwe pwor fansoun meinisin. Rom 11.9-10
24 Kopwe awarato om song wor,
om lingeringer epwe toriir.
25 Amwo lenier epwe pönüla,
amwo esap chüen wor eman epwe nonom lon imwer imw mangaku. Föf 1.20
26 Pun ir ra ariaföüü ätewe en ka wichi,
ra pwal alapala ar ariaföüü ätewe en ka akinasa.
27 Kopwe achuetä liwiningau won ar liwiningau,
nge kosap mwüt ngeniir pwe repwe küna manau.
28 Kopwe amoela iter seni ewe puken manau,
nge kosap makelong iter lein chon pwüng. Eks 32.32; Pwär 3.5; 13.8; 17.8
29 Nge ngang üa metek o nom lon apilükingau.
Ai Kot, kopwe atekiaeitä o amanauaei.
 
30 Üpwe mwareiti Kot ren echö köl,
üpwe ingeiti i ren ai kilisou.
31 Ei epwe apwapwai ewe Samol mi Lapalap lap seni ai üpwe eäni asor eman kow
ika eman ätemwänin kow fiti mächän me pachapachan.
32 Ekewe mi nom lon riaföü repwe küna ei o pwapwa.
Ämi mi fel ngeni Kot oupwe apilüköch.
33 Pun ewe Samol mi Lapalap a aüseling ngeni ekewe chon osupwang,
nge esap manlükala nöün aramas mi nom lon fötek.
 
34 Läng me fanüfan repwe mwareiti i,
pwal ekewe matau me meinisin mine a manau lon.
35 Pun Kot epwe amanaua Sion
o aüsefälietä ekewe telinimwen Juta.
Mürin, nöün chon angang repwe nonom ikenan o fanüeni ewe fanü.
36 Mwirimwirin nöün kewe chon angang repwe fanüeni ewe fanü,
nge chokewe mi echeni i repwe nonom won.

69:4: Kölf 35.19; Joh 15.25

69:9: Joh 2.17; Rom 15.3

69:21: Mat 27.48; Mark 15.36; Luk 23.36; Joh 19.28-29

69:23: Rom 11.9-10

69:25: Föf 1.20

69:28: Eks 32.32; Pwär 3.5; 13.8; 17.8