Paipel 1 PETRUS 2
2
Ewe Fau mi Manau me ewe Mwü mi Pin
2.1-10
Iei mine oupwe pöütala sokun föför mi ngau meinisin. Ousap chüen eäni kapas chofona, ika angangen atuputup, ika lolowo, ika eäni kapasen turunufas. Oupwe usun chök ekewe mönükol mi upufö, fansoun meinisin oupwe fokun moneti ewe chönün oup mi wewe ngeni Kapasen Kot, esap nofit ngeni och, pwe ren ämi ün oupwe mämäritä o küna manau. Usun a mak lon ekewe Toropwe mi Pin, “Ämi oua püsin neni pwe ewe Samol a kirikiröch.” Kölf 34.8
Oupwe feito ren ach we Samol, i ewe fau mi manau, aramas ra pöütala, pun resap aücheani, nge a fil o aüchea me ren Kot. Pwal ämi oua usun chök fau mi manau. Oupwe mwüt ngeni Kot pwe epwe aükemiitä, pwe oupwe eu imwen ngün, ia oupwe angang ie lon wisen souasor mi pin, pwe oupwe eäni sokun asor Ngünmifel a tipeni, Kot a etiwa ren Kraist. Pun iei mine a mak lon ekewe Toropwe mi Pin,
“Üa filätä eföü fau mi fokun aüchea,
üa anomu lon Sion,
pwe epwe eföü föün lepwokuku.
Iö a lükü i esap fokun lichipüng.” Ais 28.16
Ei fau a fokun aüchea fän itemi mi lükü. Nge fän iten chokewe resap lükü:
“Ewe fau ekewe chon kaü imw ra pöütala, pun resap aücheani,
a wiliti ewe fau mi aüchea seni meinisin.” Kölf 118.22 A pwal mak,
“Iei ewe fau aramas repwe chepetek won,
eu achau mi afisätä än aramas repwe turula won.” Repwe chepetek, pun resap aleasochisi ewe kapas, pwe iei usun mine Kot a akota fän iter. Ais 8.14-15 Nge ämi eu ainang mi fil, eu mwichen souasor än ewe king, eu mwün aramas mi pin, nöün Kot kewe aramas, oua fil pwe oupwe arongafeili än Kot kewe föför mi manaman, i ewe mi körikemiiwu seni rochopwak, pwe oupwe tolong lon an saram mi amwarar. Eks 19.5-6; Ais 43.20-21; Tut 4.20; 7.6; 14.2; Tit 2.14; Ais 9.2 10 Me lom ousap nöün Kot aramas, nge ikenai oua nöün. Me lom ousap angei än Kot ümöümöch, nge ikenai oua angei an ümöümöch. Os 2.23
Nöün Kot chon angang
2.11-17
11 Ämi chiechiei mi achengicheng, üa tüngormau ngenikemi usun ämi chon ekis me choisä won ei fanüfan, ousap apwönüetä ekewe mochenian fituk mi fiu ngeni ngünümi. 12 Oupwe eäni föföröch lein ekewe chon lükün lamalam, pwe lupwen repwe atipisikemi pwe oua föri föför mi ngau, repwe küna ämi föför mürina o mwareiti Kot lon ewe Rän epwe wareto lon.
13 Fänäsengesin ach we Samol oupwe aleasochisi nöüwisen ekewe mwü: Oupwe aleasochisi ewe king, pun i ewe samol mi lap, 14 pwal ngeni ekewe kepina, i a awiser pwe repwe apwüngü chokewe mi föföringau o aitöchü chokewe mi föri mine a mürina. 15 Pun iei letipen Kot, pwe ren ämi föföröch oupwe aükätiu än ekewe chon tiparoch kapasen miritimang. 16 Oupwe manau usun aramas mi ngas, nge ousap aea ämi ngas le pwölüela ämi föför mi ngau, pwe oupwe manau usun nöün Kot chon angang. 17 Oupwe meniniti aramas meinisin, oupwe echeni chienemi kewe souläng, oupwe niuokusiti Kot o suföliti ewe king.
Än Kraist riaföü eu lenien apirü fän itach
2.18-25
18 Ämi chon amanau, oupwe aleasochisi ämi kewe masta o meninitiir, sap ngeni chök chokewe mi eäni kirikiröch me tipepwetete, nge pwal ngeni chokewe mi tipepöchökül. 19 Kot epwe afeiöchükemi are oupwe anomukemi fän weiresin ekewe riaföü esepwüng, pokiten oua mefi pwe iei letipen Kot. 20 Pun met lomotan ngenikemi are oupwe likitü lupwen ra wichikemi ren ämi föri föför esepwüng? Nge are oua likitü fän ämi riaföü lupwen oua föri mine a pwüng, Kot epwe afeiöchükemi. 21 Pun iei mine Kot a körikemi ren, pun Kraist a pwal riaföü fänäsengesimi o likiti ngenikemi eu lenien apirü, pwe oupwe tapwela mürin lon ipwan. 22 Esap föri och tipis, esap wor eman a rongorong eu kapas chofona seni lon awan. Ais 53.9 23 Lupwen ra kapasingau usun esap pwal pölüeni lon kapas mi ngau. Lupwen aramas ra ariaföüü esap pwal eniweer, nge a anomu an apilükülüköch won Kot ewe soukapwüng mi eäni pwüng lon kapwüng. Ais 53.7 24 Kraist a püsin uwei ach kewe tipis won inisin o uweiretä won ewe iräpenges, pwe kich sipwe mäla seni tipis o manau ngeni pwüng. Ren an kinas kana sia küna pöchökül. Ais 53.5 25 Pun me lom oua wewe ngeni sip kana mi mwalechela, nge ikenai oua liwinsefäl ngeni ewe Chon Fol me Chon Masa ngünümi. Ais 53.6

2:3: Kölf 34.8

2:6: Ais 28.16

2:7: Kölf 118.22

2:8: Ais 8.14-15

2:9: Eks 19.5-6; Ais 43.20-21; Tut 4.20; 7.6; 14.2; Tit 2.14; Ais 9.2

2:10: Os 2.23

2:22: Ais 53.9

2:23: Ais 53.7

2:24: Ais 53.5

2:25: Ais 53.6