Paipel 1.SAMUEL 21
21
Tafit a sü seni Saul
21.1-22.5
Iwe, Tafit a feila Nop ren ewe souasor Ahimelek. Nge Ahimelek a feito fän chechech pwe epwe churi Tafit o aisini, “Pwota ka akaleman chök, nge esap wor eman a etuk?” Iwe, Tafit a üreni Ahimelek, “Ewe king a awisa ngeniei och angang o üreniei pwe üsap asile ngeni eman usun ewe angang i a tini ngeniei ika ewe wis a awisa ngeniei. Iei mine üa pwon ngeni ekewe mwän repwe etiei pwe üpwe churiir lon eu leni. Ifa usun, met a wor reöm? Ika mi wor reöm limefoch pilawa ika met echök a wor ikei, kopwe ngeniei.” Nge ewe souasor a üreni Tafit, “Esap wor rei och sokun pilawa, nge pilawa mi pin chök. Ifa usun ekewe mwän, ra tümwünü inisir seni fefin?” Iwe, Tafit a pälüeni ewe souasor, “Ellet, fefin resap kan ngenikem iteiten fansoun, lupwen aia feila ngeni äm sai. Pisekin ekewe mwän ra pin pwal mwo nge lupwen iteiten äm sai. Ifa usun, esap fen lapala pinin pisekir ikenai?” Iei mine ewe souasor a ngeni Tafit ewe pilawa mi pin. Pun esap wor pilawa ikenan, nge ewe pilawa mi pin chök, a kärän chök angei seni fän mesen ewe Samol mi Lapalap pwe epwe akasiwil ngeni pilawa mi umufö lon ewe ränin. Mat 12.3-4; Mark 2.25-26; Luk 6.3
Iwe, lon ewe ränin a wor eman mwän me lein nöün Saul chon angang a nom ikenan, pun a nomotiu lon ewe imw mi pin fän mesen ewe Samol mi Lapalap. Iten ei mwän Toek eman re Etom, i meilapen nöün Saul chon tümwünü man.
Iwe, Tafit a üreni Ahimelek, “Ifa usun, mi wor reöm efoch siles ika efoch ketilas ka tongeni ngeniei? Pun ngang üsap uwei efoch nei ketilas ika ai pisekin maun, pokiten än ewe king angang a fokun tawat.” Nge ewe souasor a üra, “A nom ewe ketilas nöün Koliat ewe re Filistia en ka niela me lon ewe lemolun Ela. A tükütük lon echö mangaku o nom lükün ewe üf itan efot. Are ka mochen angei, kopwe angei, pun esap wor efoch lükün ena mi nom ikei.” Nge Tafit a üra, “Esap wor efoch ketilas mi mürina lükün na, kose mochen kopwe ngeniei.” 1.Sam 17.51
10 Lon ewe ränin Tafit a süla seni Saul o feila ren Akis ewe kingen Kat. 11 Nge nöün Akis chon angang ra aisini Akis, “Ifa usun, esap iei i Tafit kingen ewe fanü Israel? Sap i ewe mwän ekewe fefin ra kölüfengeni usun lon ar pworuk: Saul a niela ngeröü, nge Tafit a niela lap seni engol ngeröü?” 1.Sam 18.7; 29.5 12 Iwe, Tafit a ekieki ekei kapas lon lelukan o fokun niuokusiti Akis ewe kingen Kat. Kölf 56 13 Iei mine Tafit a siwili sokun me fän meser, a pwomweni pwomwen eman mi umwes o kitipöppö, lupwen ra amwöchü. A pwal sukusukuw asamalapen tittin ar telinimw o asürätiu atufan won ölüsan. Kölf 34 14 Mürin, Akis a üreni nöün kewe chon angang, “Nengeni, ewe mwän a umwes. Pwota oua fen emwenato rei? 15 Ifa usun, esap wor rei mwän mi umwes, pwe oua pwal emwenato rei ei mwän pwe epwe aweiresiei ren an sokuni sokun chon umwes me fän mesei? Ifa usun, ei mwän epwe nom lon imwei?”

21:6: Mat 12.3-4; Mark 2.25-26; Luk 6.3

21:9: 1.Sam 17.51

21:11: 1.Sam 18.7; 29.5

21:12: Kölf 56

21:13: Kölf 34