Paipel 1.SAMUEL 29
29
Ekewe chon Filistia resap lükü Tafit
29.1-11
Iwe, ekewe chon Filistia ra achufengeni ar mwichen sounfiu meinisin lon Afek. Nge ekewe chon Israel ra nom ren ewe puächen koluk mi nom lon Jesreel. Iwe, lupwen ekewe samolun chon Filistia ra pwerela fiti ar mwichen sounfiu lon iteiter pükü me ngeröü, Tafit me nöün aramas ra pwerela mürir fiti ewe king Akis. Nge ekewe meilapen sounfiun Filistia ra aisini, “Met ekei re Ipru ra föri ikei?” Iwe, Akis a pälüeniir, “Iei i Tafit, nöün Saul ewe kingen Israel meilapen sounfiu, a fen nonom rei fansoun langatam. Seni ewe fansoun a süto rei, üsap küna och mi ngau ren tori ikenai.” Nge ekewe meilapen sounfiun Filistia ra song ngeni Akis o üreni, “Kopwe aliwinala ewe mwän pwe epwe liwiniti ewe leni ka afanüa ngeni. Esap fokun etikich le feila maun, pun epwe tongeni ü ngenikich lupwen fansoun maun. Ifa usun, ren met ewe mwän epwe tongeni chä ngeni an samol? Esap chä ngeni ren an niela ekei mwän? Ifa usun, sap iei i Tafit, ätewe ekewe fefin ra kölüfengeni, lupwen ra pworuk, ‘Saul a niela ngeröü, nge Tafit a niela lap seni engol ngeröü?’ ” 1.Sam 18.7; 21.11
Mürin, Akis a kökköri Tafit o üreni, “Mwo manauen ewe Samol mi Lapalap, en ka wenechar. Me rei üa tipeeu ngeni om kopwe etiei le feila maun. Pun ngang üsap küna och mi mwäl reöm seni ewe rän ka feito rei tori ikenai. Nge ekewe samol resap tipeeu ngonuk. Iei mine kopwe liwinla iei fän kinamwe. Nge kosap föri och mine ekewe samolun sounfiun Filistia ra oput.” Tafit a aisini Akis, “Ifa usun, met echök üa föri? Met ka küna ngeniei ngang noum chon angang seni ewe fansoun üa popuetä angang ngonuk tori ikenai? Pwota üsap tongeni etuk, ai samol me ai king, le feila maun ngeni chon oputom?” Nge Akis a pälüeni Tafit, “Üa silei pwe esap wor om mwäl me rei, usun eman nöün Kot chon läng esap wor an mwäl. Nge ekewe meilapen sounfiun Filistia ra üra pwe kosap etikem le feila maun. 10 Iei mine ämi me nöün om we samol Saul kewe chon angang mi etuk oupwe fokun pwätä lesosorusichin lesor o feila, lupwen epwe ränila.” 11 Iei mine Tafit me nöün kewe aramas ra feila lesosorusich pwe repwe liwiniti ewe fanüen chon Filistia. Nge ekewe chon Filistia ra feila Jesreel.

29:5: 1.Sam 18.7; 21.11