Paipel 1.SAMUEL 20
20
Tafit me Jonatan ra anükü ar pwipwifengen
20.1-42
Mürin, Tafit a sü seni Naiot lon Rama, a feila ren Jonatan o aisini, “Met ü föri? Met ai pupungau? Nge met ai tipis ngeni semom we, pwe a küttaei pwe epwe nieila?” Nge Jonatan a üreni Tafit, “Kosap ekieki ena sokun. Kosap fokun mäla. Nengeni, semei esap föri och mettoch mi watte ika kükün, are esap akomwen pwäri ngeniei. Pwota semei epwe aopala ei föför seniei? Esap ina usun.” Nge Tafit a pälüeni, “Semom we a fokun silei pwe en ka fokun echeniei. Ina popun a ekieki pwe esap öch om kopwe silei an we föför, pwe kete letipeta ren. Nge ellet, mwo manauen ewe Samol mi Lapalap me manauom, a chök wor eu ipw lefilei me mäla.” Mürin, Jonatan a üreni Tafit, “Meinisin mine ka apasa üpwe föri fän itom.” Nge Tafit a üreni Jonatan, “Lesor pwinin elingeling. Ngang üpwe wisen eti ewe king le mongö. Kopwe mwüt ngeniei pwe üpwe feila o op lemäl tori lekuniolun ewe aülüngatin rän. Num 28.11 Are semom we a mefi pwe üsap nom, mürin kopwe üra, ‘Tafit a fokun tüngoreei pwe üpwe mwüt ngeni an epwe feila Petleem an we telinimw. Pun ei otun unusen an we famili a kan afisi an asor iteiten ier me ikenan.’ Iwe, are semom we epwe apasa, ‘A mürina,’ mürin ngang üa tongeni kinamwe. Nge are epwe song ren, kopwe silei pwe a ekiekin afeiengauaei. Iei mine kopwe kirikiröch ngeniei ngang noum chon angang, pun ka fen eäni eu pwon mi pin ngeniei. Nge are a wor ai pupungau, kopwe püsin nieila, pun pwota kopwe emwenieila ren semom pwe i epwe nieila?” Iwe, Jonatan a üra, “Kosap fokun ekieki ena sokun. Are üpwe silei pwe semei we a ekiekin afeiengauok, ifa usun, üsap pwäri ngonuk?” 10 Mürin, Tafit a aisini Jonatan, “Iö epwe asile ngeniei are semom epwe pälüenuk fän song?” 11 Iwe, Jonatan a üreni Tafit, “Etto, sipwe feila lemäl.” Iei mine ra feilapök lemäl.
12 Mürin, Jonatan a üreni Tafit, “Ewe Samol mi Lapalap, ewe Koten Israel, epwe ach chon pwärätä. Ei otun lesor ika lon aülüngatin rän üpwe engingi semei. Are epwe ekiöch ngonuk, üpwe tinala pworaus o pwäri ngonuk. 13 Nge are semei a ekiekin afeiengauok, ewe Samol mi Lapalap epwe nieila, are üsap pwäri ngonuk o tinukela pwe kopwe feila fän kinamwe. Ewe Samol mi Lapalap epwe etuk usun a eti semei. 14 Are ngang üpwe chüen manau, kopwe eäni ngeniei än ewe Samol mi Lapalap kirikiröch. Nge are üpwe mäla, 15 kosap aükätiu om kirikiröch seni chon leimwei tori feilfeilachök, pwal lupwen ewe Samol mi Lapalap epwe ärawu seni won fanüfan chon oputom meinisin.” 2.Sam 9.1 16 Iei usun Jonatan a eäni eu pwon ngeni ewe familien Tafit o üra, “Ewe Samol mi Lapalap epwe ngeni chon oputen Tafit chappen ar föför.” 17 Iwe, Jonatan a föri pwe Tafit a pwonsefäl won an tong ngeni, pun Jonatan a echeni Tafit usun an echeni püsin manauan.
18 Mürin Jonatan a üreni Tafit, “Lesor pwinin elingeling. Repwe mefi pwe kosap nom, pun leniom epwe pön. 19 Nge lon ewe aülüngatin rän repwe fokun mefi pwe kosap nom. Mürin kopwe feila ren ewe leni ia ka op ie me mwan. Kopwe op ikenan ünükün ewe ioien fau. 20 Iwe, üpwe likapichi ngeni lepekin ewe ioien fau ülüföü föün esefich, usun üpwe likapichi ngeni eu lenien ännen. 21 Mürin üpwe tinala eman ät o üreni pwe epwe kütta ekewe föün esefich. Are üpwe üreni ewe ät, ‘Nengeni, ekewe esefich ra nom pekitoom, kopwe angeer,’ mürin ka tongeni feito. Pun mwo manauen ewe Samol mi Lapalap, kopwe manau, nge kosap feiengau. 22 Nge are üpwe apasa ngeni ewe ät, ‘Nengeni, ekewe föün esefich ra nom pekiloom,’ mürin kopwe feila, pun ewe Samol mi Lapalap a tinukela. 23 Nge mine en me ngang sa kapasfengen usun, ewe Samol mi Lapalap epwe chon pwärätä lefilach tori feilfeilachök.”
24 Iei mine Tafit a op lemäl. Nge lupwen a tori pwinin elingeling, ewe king a mot ngeni chepel pwe epwe mongö. 25 Iwe, ewe king a mot won lenian kükü ngeni ewe etiip usun me mwan, Jonatan a mot sasape ngeni, Apner a mot ünükün, nge lenien Tafit a pön.
26 Iwe, Saul esap apasa och lon ewe ränin, pun a ekieki, “Eli a fis och ngeni pwe a nom lon tettelin chon limengau.” 27 Nge lon ewe aruuen rän lesosorun mürin ewe pwinin elingeling lenien Tafit a chüen pön. Iwe, Saul a aisini Jonatan, “Pwota Tafit esap etto nänew ika ikenai pwe epwe eti ei mongö?” 28 Nge Jonatan a pälüeni Saul, “Tafit a fokun tüngorei pwe üpwe mwüt ngeni an epwe feila Petleem. 29 Iwe, a üra, ‘Kose mochen mwüt ngeniei pwe üpwe feila, pun ai famili a eäni och asor lon ewe telinimw, nge pwi a allük ngeniei pwe üpwe nom ikenan. Iei mine, are üa küna ümöümöch me reöm, kopwe mwüt ngeniei pwe üpwe feila o churi pwii kana.’ Iei popun pwe esap nom lon lenian ren om we chepel.”
30 Mürin, Saul a song ngeni Jonatan o üreni, “En nöün eman fefin mi lükümach o tipeförea. Üa silei pwe ka peni Tafit, ka püsin asäwok ren pwal inelapom. 31 Pun lon ükükün tamen manauen Tafit won fanüfan wisom wisen king me mwum esap fisitä. Iei mine kopwe müttir titi Tafit o emwenato rei, pun epwe fokun ninnila.” 32 Mürin, Jonatan a aisini Saul, “Pwota epwe ninnila? Meta a föri?” 33 Nge Saul a posu ngeni Jonatan wokun siles pwe epwe niela. Mürin, Jonatan a silei pwe saman a fokun ekiekin niela Tafit. 34 Iwe, Jonatan a ütä seni ewe chepel fän an lingeringerin song, nge esap mongö lon ewe aruuen ränin ewe maram, pun a lolilenäsini Tafit, pokiten saman a aitengaua.
35 Lesosorun sorotän ewe rän Jonatan a feila lemäl pwe epwe churi Tafit usun a pwon ngeni, nge eman kükün ät a eti. 36 Iwe, Jonatan a üreni ewe ät, “Kopwe säla o kütta ekewe föün esefich üpwe likapichirela.” Nge lupwen ewe ät a säla, Jonatan a likapichiela eföü föün esefich pekilan ewe ät. 37 Lupwen ewe ät a tori ewe leni, ia Jonatan a likapichiela ewe föün esefich ie, Jonatan a kökköla mürin, “Ifa usun, ewe föün esefich esap nom pekiloom? 38 Kopwe müttir, kosap mang, kosap chök ütä.” Iwe, ewe ät a angei ewe föün esefich o feito ren an samol, 39 nge esap silei wewen. Jonatan chök me Tafit ra silei wewen ei lapalap. 40 Iwe, Jonatan a ngeni ewe ät an pisekin maun o üreni, “Kopwe feila o uweerela lon ewe telinimw.” 41 Mürin än ewe ät feila, Tafit a ütä me ünükün ewe ioien fau, a chapetiu lepwül o tütiu fän ülüngat. Iwe, ra mitirifengeniir o kechüfengen, tori Tafit a kon leüömong le kechü. 42 Iwe, Jonatan a üreni Tafit, “Kopwe feila fän kinamwe. Sa eäni ewe pwonen pwipwifengen fän akapel iten ewe Samol mi Lapalap, pwe i epwe chon pwärätä lefilach pwal lefilen mwirimwiri me mwirimwirum tori feilfeilachök.” Mürin, Tafit a feila, nge Jonatan a liwiniti ewe telinimw.

20:5: Num 28.11

20:15: 2.Sam 9.1