4
Nöün Salomon kewe meilap
4.1-19
Iwe, ewe king Salomon a nemeni unusen Israel. Ikkei ir nöün kewe meilap: Asaria nöün Satok we mwän i souasor mi lap.
Elihoref me Ahia nöün Sisa kewe mwän ir seketeri, nge Jehosafat nöün Ahilut we mwän i chon makei pworausen ewe mwü.
Penaia nöün Jehoiata we mwän i meilapen ewe mwichen sounfiu. Satok me Apiatar ir souasor.
Asaria nöün Natan we mwän i meilapen ekewe kepina. Saput nöün Natan we mwän i souasor me nöün ewe king souöüröür.
Ahisar i meilapen chon tümwünü imwen ewe king, nge Atoniram nöün Apta we mwän a wisen nemeni ewe mwichen chon angangen kinroosi.
Iwe, Salomon a filätä engol me ruoman kepina, pwe repwe nemeni ekewe engol me ruu kinikinin fanü lon Israel. Ir ra wisen amongöni ewe king me chon leimwan, eman leir nge eu maram lon eu ier. Iwe, ikkei iten ekewe kepina me ekewe kinikin ra nemeni: Penhur a nemeni ewe chukuchukutän Efraim,
Penteker a nemeni Makas, Salpin, Pet-semes me Elon-pethanan.
10 Penheset a nemeni Arupot pwal Soko me unusen ewe fanü Hefer.
11 Pen-apinatap a nemeni unusen ewe fanü Tor. Ätei a pwülüeni Tafat nöün Salomon we fefin.
12 Paana nöün Ahilut we mwän a nemeni Tanak, Mekito me unusen Pet-sean mi nom ünükün Saretan örün Jesrel, pwal seni Pet-sean tori Apel-mehola achöüala ngeni pekilan Jokmeam.
13 Pen-keper a nemeni Ramot-kiliat pwal ekewe sopun Jair lon Kiliat. Jair eman mwirimwirin Manasa. Iwe, a pwal nemeni ewe fanü Arkop mi nom lon Pasan me wone telinimw mi watte a wor tittir, nge lokkun asamalaper a för seni piras.
14 Ahinatap nöün Ito we mwän a nemeni ewe fanü Mahanaim,
15 Ahimas a nemeni ewe fanü Naftali. Ätei a pwülüeni Pasemat, i pwal eman nöün Salomon kewe fefin.
16 Paana nöün Husai we mwän a nemeni ewe fanü Aser me Pealot.
17 Jehosafat nöün Parua we mwän a nemeni ewe fanü Isakar.
18 Simei nöün Ela we mwän a nemeni ewe fanü Peniamin.
19 Keper nöün Uri we mwän a nemeni ewe fanü Kiliat fanüen Sihon ewe kingen chon Amor, pwal fanüen Ok ewe kingen Pasan. Keper i chök kepina lon unusen ei fanü.
Än Salomon tipachem me pisekisek
4.20-34
20 Iwe, chon Juta me chon Israel ra fokun chomong usun chök chomongun föün pien aroset. Ra momongö, ra ükkün o pwapwa. 21 Nge Salomon a nemeni ekewe mwü meinisin seni ewe chanpupu Oifrat tori fanüen ekewe chon Filistia, pwal tori kiännin Isip. Ra uwato ar takises ren o angang ngeni Salomon lon unusen ränin manauan. Ken 15.18; 2.Kron 9.26
22 Iwe, ükükün enen chon leimwen Salomon lon eu rän ina epwe ükükün ipükü walik me limu tuk pilawa mi mürina, pwal ina epwe ükükün ülüpükü fik me limu tuken sokun pilawa, 23 engol ätemwänin kow mi aümanau me rüe kow mi mongö seni lemäl, pwal ipükü sip lükün ekewe chia iter kasele me ropak, pwal chuko mi kitinup. 24 Salomon a nemeni unusen ewe fanü lotoun ewe chanpupu Oifrat, seni Tifsa tori Kasa, a pwal nemeni ekewe king meinisin mi nom lotoun ewe chanpupu Oifrat. Iwe, a wor an kinamwe ngeni ekewe mwü meinisin mi nom ünükün. 25 Lon unusen ränin manauen Salomon chon Juta me chon Israel ra nom lon kinamwe, seni Tan tori Persepa, eu me eu famili a nom fän püsin an irän wain me an irä fiik. 26 Mi pwal wor ükükün faik ngeröü lenien oris fän iten nöün Salomon oris mi nukei waan kewe woken me engol me ruungeröü chon wawa oris. 1.King 10.26; 2.Kron 1.14; 9.25 27 Iwe, ekewe kepina ra uwato ewe mongö fän iten ewe king Salomon, pwal fän iten chokewe meinisin mi mot ngeni an chepel, eman nge än eu maram. Iwe, ra tümwünü pwe esap wor och osupwang. 28 Ra pwal uwato parli me fetilipwas fän iten ekewe oris me ekewe oris mi fokun müttir lon ewe leni ia ra wisen uwato ie. Iwe, eman me eman a föri ükükün wisan.
29 Iwe, Kot a fang ngeni Salomon tipachem me ekialolol esor aükükün, a pwal ngeni chomong silelap usun chomongun föün pien aroset, 30 pwe än Salomon tipachem a lapalap seni än ekewe aramasen ötiu me än ekewe chon Isip tipachem. 31 Salomon a tipachem seni ekewe aramas meinisin, a tipachem seni Etan eman mwirimwirin Esr, pwal Heman, Kalkol me Tarta nöün Mahol kewe mwän. Iwe, iteüöchün a chöfetal lon ekewe mwü meinisin mi nom ünükün. Kölf 89 32 Salomon a pwal föri ükükün ülüngeröü mwiitun me engeröü limachö köl. SalF 1.1; 10.1; 25.1; SalK 1.1 33 A kapas usun irä, seni ewe irä setar mi nom won Lepanon tori ewe irä isop mi mär won tit. A pwal kapas usun ekewe man, ekewe machang pwal ekewe mantötö me ekewe ik. 34 Iwe, kingen ekewe mwü won unusen fanüfan ra rong usun än Salomon tipachem, ra tinala aramas pwe repwe aüseling ngeni.

4:21: Ken 15.18; 2.Kron 9.26

4:26: 1.King 10.26; 2.Kron 1.14; 9.25

4:31: Kölf 89

4:32: SalF 1.1; 10.1; 25.1; SalK 1.1