Paipel KENESES 15
15
Än Kot pwon ngeni Apram
15.1-21
Iwe, wesin ewe maun ewe Samol mi Lapalap a kapas ngeni Apram lon künaan, “Kosap niuokus Apram. Ngang tittum, nge liwinum epwe fokun watte.” Nge Apram a apasa, “Ai Samol me ai Kot, met ka tongeni ngeniei, nge esap wor nei. Nei chon angang Elieser seni Tamaskus epwe wöüni wöüi meinisin.” Iwe, Apram a pwal apasa, “Nengeni, kosamwo ngeniei eman nei. Iei popun eman nei kewe chon angang mi uputiu lon imwei epwe wöüni wöüi.” Mürin, ewe Samol mi Lapalap a kapassefäl ngeni Apram, “Elieser esap wöüni woum, nge püsin eman noum mwän epwe wöüni.” Nge Kot a üreni Apram pwe epwe towu me lon imwan. Mürin a kapas ngeni, “Kopwe netä läng o aleani ekewe fü. Ifa usun, ka tongeni aleaniir? Iei usun mwirimwirum kana repwe chomong usun chomongun ekewe fü.” Rom 4.18; Ipr 11.12 Iwe, Apram a lükü ewe Samol mi Lapalap o küna pwüng me ren Kot pokiten an lükülük. Rom 4.3; Kal 3.6; Jas 2.23
Mürin, Kot a üreni, “Ngang ewe Samol mi Lapalap. Üa emwenukowu seni Ur lon ewe fanü Papilon, pwe üpwe ngonuk ei fanü pwe kopwe fanüeni.” Nge Apram a aisini, “Ai Samol me ai Kot, met üpwe silei ren pwe üpwe fanüeni ei fanü?” Iwe, a pälüeni, “Kopwe uwato rei eman kow esamwo nöünöü, eman liefefinin kuuch me eman ätemwänin sip ir me ülüman ülüngat ierir, pwal ruoman lisom, eman watte me eman kükün. 10 Iwe, Apram a uwato ren Kot ekewe man meinisin, a kinifeseniir lon ruu kinikin o anomu eu kinikin won eu pekin, nge eu kinikin won pwal eu pekin. Nge ekewe machang esap kinifeseniir. 11 Iwe, lupwen machang mi mwacho ra sotiu won fituken ekewe man, Apram a asürela.
12 Nge lupwen akkar a arap ngeni an epwe tup, och möürüchou a tori Apram, pwal och niuokus me rochopwak mi fokun watte a püngütiu won. Hiop 4.13-14 13 Iwe, ewe Samol mi Lapalap a üreni Apram, “Iei kopwe fokun silei pwe mwirimwirum kana repwe wasöla lon eu fanü sap fanüer. Aramas repwe nöüniir amanau ikenan, repwe küna riaföü lon ükükün föpükü ier. Eks 1.1-14; Föf 7.6 14 Nge ngang üpwe apwüngü chon ewe fanü ra nöüniir amanau. Iwe, mürin repwe towu seni ewe fanü fän pisek mi chomong. Eks 12.40-41; Föf 7.7 15 Nge en kopwe mäla o peias fän kinamwe lon om chinlap. 16 Iwe, lon arüanün tettel mwirimwirum kewe repwe liwinsefälito ikei, pun esamwo tori otun ai üpwe apwüngü än ekewe chon Amor föföringau.”
17 Nge lupwen akkar a tuputiu, lupwen a kirochola, och ötüötün um me efoch töl mi ngetenget a fetal lefilen ekewe kinikinin fituken man. 18 Iwe, lon ewe rän ewe Samol mi Lapalap a föri eu pwon ngeni Apram o apasa, “Üpwe ngeni mwirimwirum kana ei fanü, seni ewe chanpupun Isip tori ewe chanpupu mi watte itan Oifrat, Föf 7.5 19 ewe fanüen chon Ken, chon Kenis me chon Katmon, 20 ewe fanüen chon Hit, chon Peris me chon Refa, 21 pwal tori fanüen ekewe chon Amor, chon Kanaan, chon Kirkas me chon Jepus.”

15:5: Rom 4.18; Ipr 11.12

15:6: Rom 4.3; Kal 3.6; Jas 2.23

15:12: Hiop 4.13-14

15:13: Eks 1.1-14; Föf 7.6

15:14: Eks 12.40-41; Föf 7.7

15:18: Föf 7.5