Paipel 1.KING 3
3
Salomon a pwülüeni nöün Farao föpwül
3.1-2
(2.Kron 1.3-12)
Iwe, Salomon a föri eu pwonen atipeeu ngeni Farao ewe kingen Isip ren an pwülüeni nöün föpwül. A emwenato neminei o anomu lon ewe telinimwen Tafit, tori a wes le aüetä püsin imwan, pwal imwen ewe Samol mi Lapalap me ewe tit mi pwelifeili Jerusalem. Nge ekewe aramas ra chök eäni ar asor won ekewe lenien fel won ekewe leni tekia, pun esap mwo wor eu imwenfel mi kaütä fän iten ewe Samol mi Lapalap.
Salomon a tüngor an tipachem
3.3-15
Iwe, Salomon a echeni ewe Samol mi Lapalap o apwönüetä än Tafit saman we öüröür ngeni. Eu chök, a föri an asor o kenala apach mi pwokus won ekewe lenien fel won ekewe leni tekia. Lon eu rän ewe king Salomon a feila Kipeon pwe epwe asor ikenan, pun ina ewe lenien fel mi aüchea. A eäni engeröü mönün asoren kek won enan rongen asor. Lon ewe pwin ewe Samol mi Lapalap a pwä ngeni Salomon lon an tan me lon Kipeon o üreni, “Met ka mochen ngang üpwe fang ngonuk.” Salomon a üra, “En ka eäni tong mi lapalap ngeni noum chon angang Tafit semei we, pun i a allükülük o pwüng, a pwal wenechar lelukan ngonuk. Iwe, ka sopwela om tong mi lapalap ngeni ren om fang ngeni eman nöün mwän mi siwili lon wisan wisen king ikenai. Nge iei, ai Kot Samol mi Lapalap, en ka awisaei ngang noum chon angang pwe üpwe siwili Tafit semei we lon wisan wisen king. Nge ngang eman mi chök ier kükün, üsap sile nemenem. Iwe, ngang noum chon angang, üa nom lein noum aramas ka filiretä, eu mwichen aramas mi chowatte, esap wor eman a tongeni aleaniir ren chomongur. Iei mine kopwe fang ngeniei ngang noum chon angang eu leluk mi mirit, pwe üpwe tongeni nemeni noum aramas fän pwüng o alefila mine a öch me mine a ngau. Ifa usun ai üpwe tongeni nemeni noum ei mwichen aramas mi chowatte?”
10 Iwe, ewe Samol mi Lapalap a efich mine Salomon a eäni tüngor. 11 Iei mine a üreni Salomon, “Pokiten ka tüngor mirit pwe kopwe emweni aramas fän pwüng, nge kosap tüngor fän itom pwe kopwe manauatam ika pisekisek, ika tüngor mälan chon oputom, 12 iei mine üpwe apwönüetä om tüngor. Üpwe fang ngonuk eu leluk mi mirit o tipachem, pwe esap wor eman mi wewe ngonuk lon kewe fansoun ra la, pwal lon kan fansoun repwe feito. 13 Üpwe pwal fang ngonuk mine kosap tüngor. Üpwe fang ngonuk pisekisek me iteüöch, pwe esap wor eman king epwe wewe ngonuk lon unusen manauom. 14 Nge are kopwe aleasochisiei o apwönüetä ai kewe allük me pwüüng usun Tafit semom we a föri, mürin üpwe alangatamala ränin manauom.”
15 Iwe, Salomon a nela o mefi pwe Kot a fos ngeni lon an tan. Mürin, a feila Jerusalem, a ütä me mwen än ewe Samol mi Lapalap we pworofel o eäni asoren kek me asoren kinamwe ngeni. Mürin a föri eu kametip fän iten nöün kewe nöüwis meinisin.
Salomon a eäni tipachem lon an kapwüng
3.16-28
16 Lon eu rän, ruoman fefin mi amömö inisir fän iten lisowu ra feila ren ewe king o ütä fän mesan. 17 Iwe, eman me lein ekewe fefin a üra, “Ai samol, äm me ei fefin aia nom lon eu chök imw. Iwe, üa nöüni eman ät, lupwen neminewe a nom lon ewe imw. 18 Nge ülüngat rän mürin ai nöünöü, ei fefin a pwal nöüni eman ät. Äm chök ruoman aia nom lon ewe imw, esap wor chienem, fokun äm chök ruoman. 19 Iwe, nöün neminei ät a mäla lepwin, pun a chouni. 20 Mürin, neminei a pwätä lukenipwin, a angei nei nan ät mi kon ünüki lupwen ai annut, o akona fän mwärin, nge nöün ei ät mi mäla a akona fän mwäri. 21 Iwe, lupwen üa pwätä lesosor pwe üpwe oupu nei we, üa küna pwe ewe semirit a mäla. Nge lupwen üa nenengenöchü, üa silleni pwe esap wesewesen nei we.” 22 Nge pwal ewe eman fefin a üra, “Apwi, ei semirit mi manau nei, nge na mi mäla noum.” Mürin, ewe aemanün fefin a üra, “Apwi, ei semirit mi mäla noum, nge na mi manau nei.” Iei usun ra aninifengen me fän mesen ewe king.
23 Mürin, ewe king a apasa, “En ka apasa pwe ena semirit mi mäla sap noum, nge enan mi manau noum. Nge neminan a apasa pwe enan semirit mi manau nöün, nge ena mi mäla noum.” 24 Iwe, ewe king a üra pwe repwe uwato ren efoch ketilas. Nge lupwen ra uwato ren ewe ketilas, 25 ewe king a üra, “Oupwe tilenifeseni ewe semirit mi manau o ngeni ewe eman fefin epek, nge pwal ewe eman fefin epek.” 26 Mürin, ewe fefin mine nöün ewe mi manau a kapas ngeni ewe king, pokiten a fokun tongei nöün we, “Ai samol, kose mochen kopwe ngeni neminan ewe semirit mi manau, nge kosap fokun niela.” Nge ewe pwal eman a üra, “Esap wor eman leim epwe nöüni ewe semirit, oupwe chök tilenifeseni.” 27 Mürin, ewe king a apasa, “Ousap tilenifeseni ewe semirit, nge oupwe ngeni ewe aemanün fefin, pun ina i wesewesen inen ewe semirit.” 28 Iwe, lupwen chon Israel meinisin ra rongorong usun pwüngün ewe kapwüng ewe king a eäni, ra meniniti ewe king, pun ra mefi pwe Kot a fang ngeni tipachem, pwe epwe tongeni eäni kapwüng fän pwüng.