5
Än Salomon pwonen atipeeu ngeni Hairam
5.1-18
(2.Kron 2.1-8)
Iwe, lupwen Hairam ewe kingen Tirus a rongorong pwe Salomon a siwili saman we lon wisan wisen king, a tinala nöün chon künö ren. Pun Hairam a fen pwipwi ngeni Tafit. Iwe, Salomon a tinala pworaus ren Hairam o üra, “Ka silei pwe Tafit semei we esap tongeni aüetä eu imwenfel fän iten ewe Samol mi Lapalap an we Kot, pokiten chon ekewe mwü mi nom ünükün ra maun ngeni, tori ewe Samol mi Lapalap a atolongeer meinisin fän nemenian. Nge iei ewe Samol mi Lapalap ai we Kot a fang ngeniei kinamwe lekiännin fanüei meinisin. Esap wor chon oputaei ika och mi afeiengauaei. Iei mine üa ekiekin aüetä eu imwenfel fän iten ewe Samol mi Lapalap ai we Kot, usun i a fen üreni Tafit semei we, ‘Noum mwän üpwe seikätä pwe epwe siwiliik lon wisom wisen king, ätei epwe aüetä eu imwenfel fän itei.’ 2.Sam 7.12-13; 1.Kron 17.11-12 Iei mine kopwe tinala noum chon angang, pwe repwe pökü ekewe irä setar won Lepanon fän itei. Iwe, nei kewe chon angang repwe eti noum kewe chon angang, nge ngang üpwe wisen möni noum kewe chon angang won ükükün ewe liwin ka filätä. Pun ka silei pwe esap wor eman me lein nei kewe chon angang a sile fotopen usun ekewe re Siton.”
Iwe, lupwen Hairam a rongorong alon Salomon, a fokun pwapwa o apasa, “Üpwe mwareiti ewe Samol mi Lapalap ikenai mi fang ngeni Tafit eman nöün mwän mi tipachem, pwe epwe nemenem won ei mwü mi iteföüla.” Mürin, Hairam a titila ei pworaus ren Salomon, “Üa rong ewe pworaus ka tinato rei. Üa molotä pwe üpwe föri meinisin mine ka mochen o awora ekewe irä setar me saipires. Nei kewe chon angang repwe uwätiu ekewe irä seni Lepanon tori aroset. Iwe, repwe rifengeniir usun ärai, pwe repwe pwer lematau tori ewe leni ka filätä. Ikenan repwe atomwerela, nge noum kewe chon angang repwe angeiir. Nge en kopwe apwönüetä ai mochen ren om kopwe amongöni chon leimwei.” 10 Iei mine Hairam a ngeni Salomon ekewe irä setar me saipires won ükükün an mochen, 11 nge Salomon a ngeni Hairam ina epwe ükükün ipükü rüe me limungeröü tuk wiich, pwal ina epwe ükükün ipükü engol me limungeröü kalon apüra seni föün olif, pwe enen chon leimwan iteiten ier. 12 Iwe, ewe Samol mi Lapalap a ngeni Salomon tipachem usun a pwon ngeni. A wor kinamwe lefilen Hairam me Salomon, nge ir me ruoman ra föri eu pwonen atipeeufengen.
13 Iwe, ewe king Salomon a achufengeni eu mwichen chon angangen kinroosi seni lein chon Israel meinisin iteiter ilik ngeröü mwän. 14 A kiniir lon ülüngat mwich, eu mwich nge engol ngeröü. A tinala eu mwich pwe epwe angang lon Lepanon lon ükükün eu maram, nge ruu mwich repwe nom lon lenier lon ükükün ruu maram, nge repwe akasiwil. Iwe, Atoniram a wisen nemeni ewe mwichen chon angangen kinroosi. 1.King 12.18 15 A pwal wor ükükün fik ngeröü nöün Salomon chon uwochou me walik ngeröü chon tuw fau lon ewe fanü mi chukuchukutä. 16 Lükün ekei chon angang a pwal wor ükükün ülüngat ngeröü ülüpükü souemwenin angang mi nemeniir o tümwünü ewe angang. 17 Iwe, fän än ewe king allük ra tuw fau mi watte o mürina, pwe repwe föri longolongun ewe imwenfel ren fau mi fal. 18 Iei usun nöün Salomon me nöün Hairam kewe chon kaü imw, pwal ekewe re Kepal ra falei ekewe fau o amolätä ekewe irä, pwe repwe aüetä ewe imwenfel.

5:5: 2.Sam 7.12-13; 1.Kron 17.11-12

5:14: 1.King 12.18