3
Ewe pworaus fän iten ewe mwichefel lon Sartis
3.1-6
“Kopwe makkei ngeni ewe chon künöön ewe mwichefel lon Sartis: Iei alon ewe eman mi eäni ekewe füman ngünün Kot me ekewe füföü fü. Üa silei om kewe föför, pwe mi wor itom itä ka manau, nge ka mä. Kopwe nela! Kopwe apöchöküla mine a chüen wor reöm me mwen an epwe wesewesen mäla. Pun üa küna pwe om kewe föför resap unusöch mwen mesen ai we Kot. Iei mine kopwe chechemeni mine ka kaiö o mine ka rongorong, kopwe aleasochis o aier seni om tipis. Nge are kosap nela, üpwe feito womw usun eman chon solä, nge kosap silei ewe otun üpwe feito reöm. Mat 24.43-44; Luk 12.39-40; Pwär 16.15 Nge mi wor ekoch me leimi lon Sartis, ir resap alimengaua üfer. Iwe, repwe chiechi ngeniei fän üfer mi pwechepwech, pun ra fich ngeni. Iö mi pwora ngeni mine a ngau epwe üföüf ei sokun üf mi pwechepwech, iwe, üsap amola itan seni ewe puken iten chon manau. Nge üpwe pwärätä pwe i nei mwen mesen Semei, pwal mwen mesen nöün kewe chon läng. Eks 32.32-33; Kölf 69.28; Pwär 20.12; Mat 10.32; Luk 12.8
Are a wor selingen eman, epwe rongorong mine Ngünmifel a üreni ekewe mwichefel!”
Ewe pworaus fän iten ewe mwichefel lon Filatelfia
3.7-13
“Kopwe makkei ngeni ewe chon künöön ewe mwichefel lon Filatelfia: Iei alon ewe eman mi pin o let, ewe mi amwöchü ewe ki än Tafit. Iwe, met a suki ngeni ewe ki esap wor eman a tongeni öpüngala, nge met a öpüngala esap wor eman a tongeni suki. Ais 22.22; Hiop 12.14 Üa silei om kewe föför. Nengeni, üa anomu mwomw eu asam mi suk, esap wor eman a tongeni öpüngala. Pun üa silei pwe a kisikis om tufich, nge ka aleasochisi ai kewe kapas, o kosap amamäsini itei. Nengeni, chokewe seni ewe mwich än Satan, ir mi apasa pwe ir chon Juta, nge sap ir chon Juta, pwe ra chofona, üpwe föri pwe repwe feito o chapetiu arun pecheöm. Ir meinisin repwe mefi pwe ngang üa echenuk. Ais 49.23; 60.14; 43.4 10 Pokiten ka tümwünü ai kewe kapas, pwe kopwe likitü fän mosonotam, üpwe pwal tümwünuk seni ewe fansoun riaföü epwe feito won unusen fanüfan, pwe epwe sotuni aramas meinisin mi nom won fanüfan. 11 Üpwe warekai. Kopwe kamwöchünük won mine ka eäni, pwe esap wor eman epwe angei senuk mwärum. 12 Iö mi pwora ngeni mine a ngau üpwe föri pwe epwe efoch ür lon än ai we Kot we imwenfel, nge esap chüen towu seni. Iwe, üpwe makkei won iten ai we Kot, pwal iten än ai we Kot we telinimw, ewe Jerusalem mi fö, epwe feitiu me läng seni ai we Kot, üpwe pwal makkei won itei we mi fö. Pwär 21.2; Ais 62.2; 65.15
13 Are a wor selingen eman epwe rongorong mine Ngünmifel a üreni ekewe mwichefel.”
Ewe pworaus fän iten ewe mwichefel lon Laotisea
3.14-22
14 “Kopwe makkei ngeni ewe chon künöön ewe mwichefel lon Laotisea: Iei alon ewe eman mi iteni Amen, ewe Chon Pwärätä mi allükülük o let, i popun förien Kot meinisin. SalF 8.22 15 Üa silei om kewe föför, üa silei pwe kosap pat, kosap pwal pwiich. Amwo kopwe pat ika pwiich. 16 Nge pokiten ka nom lefilen pat me pwiich, iei mine üpwe kusufukowu seni lon awei. 17 Pun ka apasa, ‘Ngang üa pisekisek o wöü, esap wor ai osupwang.’ Nge en kosap silei pwe ka mwelele o attong, ka wöüngau me chun o selela. 18 Iei mine üpwe ürenuk mine kopwe föri: Kopwe kamö seniei kolt mi limelim ren ekkei, pwe kopwe pisekisekila. Kopwe pwal kamö üf mi pwechepwech, pwe kopwe üföüf o pwölüela asäwen om selela. Kopwe pwal kamö säfeen mas, pwe kopwe säfeeni mesom pwe kopwe tongeni küna mwomw. 19 Üa apwüngü o amiriti chokewe meinisin üa tongeer. Iei mine kopwe achocho o aier seni om tipis. SalF 3.12; Ipr 12.6 20 Nengeni, üa ü lükün asam o fichifich. Are eman epwe rongorong mweliei o suki ewe asam, üpwe tolong ren o mongö ren, nge i epwe mongö rei. 21 Iö mi pwora ngeni mine a ngau üpwe mwüt ngeni pwe epwe etiei le mot won ewe lenien motun king, usun pwal ngang üa pwora o mot ren Semei won an lenien motun king.
22 Are a wor selingen eman epwe rongorong mine Ngünmifel a üreni ekewe mwichefel!”

3:3: Mat 24.43-44; Luk 12.39-40; Pwär 16.15

3:5: Eks 32.32-33; Kölf 69.28; Pwär 20.12; Mat 10.32; Luk 12.8

3:7: Ais 22.22; Hiop 12.14

3:9: Ais 49.23; 60.14; 43.4

3:12: Pwär 21.2; Ais 62.2; 65.15

3:14: SalF 8.22

3:19: SalF 3.12; Ipr 12.6