62
Iwe, üsap tongeni fanafanala fän iten Sion,
üsap pwal tongeni mosonoson fän iten Jerusalem
tori an pwüng epwe tittin usun akkar,
nge an küna manau epwe tin usun efoch töl mi pulopul.
Chon ekewe mwü repwe küna om pwüng,
nge ekewe king meinisin repwe nenengeni lingom.
Iwe, repwe aita ngonuk eu it mi fö,
ewe Samol mi Lapalap a aita ngonuk.
Kopwe wewe ngeni epa mwärämwär mi ling lepöün ewe Samol mi Lapalap,
kopwe pwal wewe ngeni epa mwärin king lepöün om we Kot.
Iwe, kosap chüen iteni “Pöütüla”,
fanüom esap pwal chüen iteni “Fanüapö”.
Nge kopwe iteni “Hefsipa” * Hefsipa wewen üa pwapwaiti,
fanüom epwe iteni “Piula” Piula wewen ewe mi pwüpwülü,
pun ewe Samol mi Lapalap a pwapwaituk,
epwe usun chök ngei pwülüen fanüom.
Iwe, usun eman alüal a pwülüeni eman föpwül,
iei usun noum mwän repwe usun chök nge pwülüom, en Jerusalem.
Nge usun eman mwän apwüpwülü söfö a pwapwa ngeni ewe fin apwüpwülü söfö,
iei usun om Kot epwe pwapwaituk.
 
Iwe, ngang üa anomu chon mas won tittum, Jerusalem,
resap fanafanala lerän me lepwin.
Ämi mi achema ngeni ewe Samol mi Lapalap an kewe pwon,
ousap asösö.
Ousap pwal mwüt ngeni Kot pwe epwe asösö, tori an epwe aüsefälietä Jerusalem
o föri pwe chon fanüfan meinisin repwe mwareiti.
Ewe Samol mi Lapalap a pwon fän akapel,
nge epwe apwönüetä ren an manaman,
“Üsap chüen ngeni chon oputemi enemi mongö,
nge chon ekis resap chüen ünümi ünümemi wain oua angang weires ngeni.
Nge chokewe chök mi fofot o kinikin repwe mongö üan ekewe irä
o mwareiti ewe Samol mi Lapalap,
pwal chokewe chök mi angang ngeni ekewe irän wain o ionifengeni uar
repwe ün seni ewe wain me lon ekewe leni lükün imwei mi pin.”
 
10 Ämi chon Jerusalem, oupwe towu me lon ekewe asamalap,
oupwe amolätä efoch al fän iten ekewe aramas mi liwinsefäl.
Oupwe föri efoch alalap, oupwe pwal aturawu föün lon.
Iwe, oupwe aürätä efoch asisil fän iten chon ekewe mwü.
11 Ewe Samol mi Lapalap a aronga ngeni aramas won unusen fanüfan,
“Oupwe üreni ekewe aramasen Jerusalem:
Nengeni, ämi Chon Amanau a war,
a uwato an liwin fän iten nöün aramas,
nge liwiningau fän iten chon oputan.” Ais 40.10; Pwär 22.12
12 Iwe, repwe iteni aramas mi pin,
pwal chokewe ewe Samol mi Lapalap a amanaueer.
Nge Jerusalem epwe eu leni aramas ra kütta pwe repwe nom ie,
eu telinimw esap pönüla.

*62:4: Hefsipa wewen üa pwapwaiti

62:4: Piula wewen ewe mi pwüpwülü

62:11: Ais 40.10; Pwär 22.12