Tongan Bible (Revised West Version) Saame 138
138
1 ʻOku fakafetaʻi ʻe Tevita ki he ʻOtua koeʻuhi ko e moʻoni ʻo ʻene folofola. 4 ʻOku ne kikite ʻo fakamālō ki he ʻOtua ʻae ngaahi tuʻi ʻa māmani. 7 ʻOku fakahā ʻene tui ki he ʻOtua.
Ko e Saame ʻa Tevita.
Te u fakamālō kiate koe ʻaki hoku loto kotoa pē:
ʻi he ʻao ʻoe ngaahi ʻotua te u hiva fakamālō kiate koe.
Te u lotu ʻo hanga atu ki ho faletapu māʻoniʻoni,
mo fakamālō ki ho huafa koeʻuhi ko hoʻo ʻaloʻofa mo hoʻo moʻoni:
he kuo ke hiki ke māʻolunga hake hoʻo folofola ʻi ho huafa kotoa pē.
‌ʻI he ʻaho ne u tangi ai naʻa ke talia au,
mo fakamālohi ʻaki au ʻae mālohi ʻi hoku laumālie.
‌ʻE Sihova, ʻe fakamālō kiate koe ʻae ngaahi tuʻi kotoa pē ʻo māmani,
ʻoka nau ka fanongo ki he ngaahi folofola ʻo ho fofonga.
‌ʻIo, tenau hiva ʻi he ngaahi hala ʻo Sihova:
he ʻoku lahi ʻae nāunau ʻo Sihova.
Ko e moʻoni ʻoku māʻolunga ʻa Sihova, ka ʻoku ʻofa ia ki he angavaivai:
ka ʻoku ʻilo ʻe ia ʻae laukau ki he mamaʻo.
Neongo ʻeku ʻeveʻeva ʻi he lotolotonga ʻoe mamahi, te ke fakaakeake au:
te ke mafao atu ho nima ke taʻofi ki he ʻita ʻa hoku ngaahi fili,
pea ko ho nima toʻomataʻu te ne fakamoʻui au.
‌ʻE fakahaohaoa ʻe Sihova ʻaia ʻoku kau kiate au:
ko hoʻo ʻaloʻofa, ʻE Sihova ʻoku tolonga ʻo taʻengata:
ʻoua naʻa ke liʻaki ʻae ngaahi ngāue ʻa ho nima ʻoʻou.