Tongan Bible (Revised West Version) Saame 95
95
1 Ko e enginaki ke fakamālō ki he ʻOtua, 3 Koeʻuhi ko hono lahi, 6 Mo ʻene angalelei, 8 Pea ʻoua naʻa ʻahiʻahiʻi ia.
Haʻu, ketau hiva kia Sihova:
ketau kalanga ʻi he fiefia ki he maka ʻo ʻetau moʻui.
Ketau haʻu ki hono ʻao mo e fakafetaʻi,
mo kalanga ʻi he fiefia kiate ia ʻaki ʻae ngaahi saame.
He ko Sihova ko e ʻOtua lahi,
pea ko e Tuʻi lahi hake ia ʻi he ngaahi ʻotua kotoa pē.
‌ʻOku ʻi hono nima ʻae ngaahi potu māʻulalo ʻo māmani:
ko e mālohi ʻoe ngaahi moʻunga ʻoku ʻoʻona foki.
‌ʻOku ʻoʻona ʻae tahi, he naʻa ne ngaohi ia:
pea naʻe ngaohi ʻe hono nima ʻae fonua mōmoa.
Haʻu, ketau lotu mo punou:
ketau tūʻulutui ʻi he ʻao ʻo Sihova ko hotau tupuʻanga.
He ko hotau ʻOtua ia;
pea ko e kakai ʻakitautolu ʻo ʻene ngoue,
mo e fanga sipi ʻa hono nima.
Ko e ʻaho ni, ʻo kapau te mou fanongo ki hono leʻo,
“ʻOua naʻa mou fakafefeka homou loto,
ʻo hangē ko ia ʻi he fakahouhau lahi,
pea ʻi he ʻaho ʻoe ʻahiʻahi ʻi he toafa:
‌ʻAia naʻe ʻahiʻahiʻi au ʻe hoʻomou ngaahi tamai,
pea nau ʻahiʻahi kiate au,
ʻonau mamata ki heʻeku ngāue.
10 Naʻaku fehiʻa ki he toʻutangata ko ia ʻi he taʻu ʻe fāngofulu,
pea naʻaku pehē, ‘Ko e kakai eni ʻoku hē ʻi honau loto,
pea ʻoku ʻikai te nau ʻilo hoku ngaahi hala:
11 Pea ne u fuakava kiate kinautolu ʻi hoku houhau,
‘ʻE ʻikai tenau hū ki hoku mālōlōʻanga.’ ”