Tongan Bible (Revised West Version) Saame 93
93
1–5 Ko e lahi, mo e māfimafi mo e māʻoniʻoni ʻoe puleʻanga ʻo Kalaisi.
‌ʻOku pule ʻa Sihova, ʻoku kofuʻaki ia ʻae nāunau lahi;
ʻoku kofuʻaki ʻa Sihova ʻae māfimafi,
ʻaia kuo ne nonoʻo ʻaki ia kuo fokotuʻumaʻu foki ʻa māmani,
pea ʻe ʻikai faʻa ueʻi ia.
KUO fokotuʻumaʻu ho ʻafioʻanga talu mei muʻa:
ʻoku talu mei muʻa ʻae ʻafiona.
‌ʻE Sihova, kuo hiki hake ʻe he ngaahi vaitafe,
kuo hiki hake ʻe he ngaahi vaitafe honau leʻo;
ʻoku hiki hake ʻe he ngaahi vaitafe lahi honau ngaahi peau.
Ko Sihova ʻoku ʻi ʻolunga ʻoku mālohi lahi hake ia ʻi he ʻuʻulu ʻoe ngaahi vai lahi,
ʻio, ʻi he ngaahi peau mālohi ʻoe tahi.
‌ʻOku moʻoni ʻaupito hoʻo ngaahi fakamoʻoni:
ʻE Sihova, ʻoku taau mo ho fale ʻae māʻoniʻoni ʻo lauikuonga.