Tongan Bible (Revised West Version) Saame 85
85
1 ʻOku ongoʻi ʻe he tangata tohi saame ʻae ʻofa ʻae ʻOtua, pea ʻoku ne kole ke maʻu pe kiate ia. 8 ʻOku ne fuakava te ne tatali ki ai, ʻi he loto falala ki he angalelei ʻae ʻOtua.
Ki he Takimuʻa, ko e Saame ki he ngaahi foha ʻo Kola.
‌ʻE Sihova, kuo ke finangalo lelei ki ho fonua:
kuo ke toe ʻomi ʻa Sēkope mei he pōpula.
Kuo ke fakamolemole ʻae hia ʻa hoʻo kakai,
kuo ke ʻufiʻufi ʻenau angahala kotoa pē.
Sila.
Kuo ke toʻo ʻo ʻave ho houhau kotoa pē:
kuo ke fakatafoki koe mei he kakaha ʻo ho houhau.
Fakatafoki ʻakimautolu, ʻE ʻOtua ʻo ʻemau moʻui,
pea ke fakangata ho houhau kiate kimautolu.
Te ke houhau kiate kimautolu ke taʻengata?
Te ke toloi atu ho houhau ki he toʻutangata kotoa pē?
‌ʻIkai te ke toe fakaakeake ʻakimautolu:
koeʻuhi ke fiefia hoʻo kakai ʻiate koe?
Fakahā kiate kimautolu hoʻo ʻaloʻofa, ʻE Sihova,
mo ke tuku kiate kimautolu ʻa hoʻo fakamoʻui.
Te u fanongo ki he folofola ʻae ʻOtua ko Sihova:
he te ne folofolaʻaki ʻae melino ki hono kakai, pea ki heʻene kau māʻoniʻoni:
kaeʻoua naʻa nau toe tafoki ki he kovi.
Ko e moʻoni ʻoku ofi ʻene fakamoʻui kiate kinautolu ʻoku manavahē kiate ia,
koeʻuhi ke nofo ʻae monūʻia ʻi hotau fonua.
10 Kuo fakafetaulaki ʻae ʻaloʻofa mo e moʻoni;
ko e māʻoniʻoni mo e melino kuo na toutou fekita.
11 ‌ʻE tupu hake ʻae moʻoni mei he kelekele;
pea ʻe sio hifo ʻae māʻoniʻoni mei he langi.
12 ‌ʻIo, ʻe foaki ʻe Sihova ʻaia ʻoku lelei;
pea ʻe tuku mai hono fua ʻe hotau fonua.
13 ‌ʻE muʻomuʻa ʻiate ia ʻae māʻoniʻoni,
ʻo ne fokotuʻu hotau vaʻe ʻi hono hala.