40
1 Ko hono ʻaonga ʻoe falala ki he ʻotua. 6 Ko e feilaulau lelei lahi ʻae talangofua. 11 ʻOku ʻāsili ai ʻae lotu ʻa Tevita ʻi heʻene manatu ki heʻene kovi.
Ki he Takimuʻa, ko e Saame ʻa Tevita.
1 Naʻa ku tatali faʻa kātaki pe kia Sihova;
pea ne tokanga kiate au, ʻone ongoʻi ʻeku tangi.
2 Pea naʻa ne toʻo hake au mei he luo fakailifia,
mei he ʻumea pelepela,
ʻo ne fokotuʻu hoku vaʻe ki he maka,
ʻo fakamaʻu hoku ngaahi ʻaluʻanga.
3 Pea kuo ne ʻai ʻae hiva foʻou ki hoku ngutu, ʻio, ʻae fakafetaʻi ki hotau ʻOtua:
ʻe mamata ki ai ʻae tokolahi, pea manavahē, pea tenau falala kia Sihova.
4 ʻOku monūʻia ʻae tangata ko ia ʻoku falala kia Sihova,
pea ʻikai tokanga ia ki he kakai laukau, mo kinautolu ʻoku afe ki he loi.
5 ʻE Sihova ko hoku ʻOtua, ʻoku lahi hoʻo ngaahi ngāue fakaofo ʻaia kuo ke fai,
mo ho finangalo lelei kiate kimautolu:
ʻe ʻikai faʻa lau fakaholo ia kiate koe:
kapau te u fie fakahā ʻo lea ki ai, ʻoku lahi ʻaupito ia, ʻe ʻikai faʻa laua.
6 Ko e feilaulau mo e meʻa foaki naʻe ʻikai te ke finangalo ki ai;
ka ko hoku telinga kuo ke fakaava:
ko e feilaulau tutu mo e feilaulau koeʻuhi ko e angahala naʻe ʻikai te ke fekau.
7 Pea naʻaku toki pehē, “Vakai, ʻoku ou haʻu:
kuo tohi ʻi he tohi tākai ʻiate au,
8 ʻE hoku ʻOtua, ʻoku ou fiefia ke fai ho finangalo:
ʻio, ʻoku ʻi hoku loto hoʻo fono.”
9 Naʻaku malangaʻaki ʻae māʻoniʻoni ʻi he fakataha lahi:
vakai, naʻe ʻikai te u taʻofi hoku loungutu, ʻE Sihova, ʻoku ke ʻiloʻi.
10 Naʻe ʻikai te u fakafufū hoʻo māʻoniʻoni ʻi hoku loto;
naʻaku fakahā hoʻo angatonu mo hoʻo fakamoʻui:
naʻe ʻikai te u fakalilolilo ʻa hoʻo ʻaloʻofa mo hoʻo moʻoni mei he fakataha lahi.
11 ʻE Sihova, ʻoua naʻa ke taʻofi hoʻo ngaahi ʻaloʻofa ongongofua ʻiate au:
tuku ke tauhi maʻuaipē au ʻe hoʻo ʻaloʻofa mo hoʻo moʻoni.
12 He kuo kāpui au ʻe he ngaahi kovi taʻefaʻalaua:
kuo puke au ʻe heʻeku ngaahi hia, ko ia ʻoku ʻikai ai te u faʻa hanga hake;
ʻoku lahi hake ia ʻi he ngaahi tuʻoni louʻulu ʻo hoku ʻulu:
ko ia kuo liʻaki au ʻe hoku loto.
13 ʻE Sihova, ke ke finangalo lelei ke fakamoʻui au:
ʻE Sihova, ke ke fai vave ke tokoniʻi au.
14 Tuku ke mā mo puputuʻu fakataha ʻakinautolu kotoa pē ʻoku nau kumi hoku laumālie ke fakaʻauha ia;
tuku ke fakafoki kimui mo mā ʻakinautolu ʻoku nau holi ke u kovi.
15 Tuku ke paea ʻakinautolu ko e totongi ʻo ʻenau kovi, ʻakinautolu ʻoku pehē kiate au, “Ha ha.”
16 Tuku ke fiefia mo nekeneka ʻiate koe ʻakinautolu kotoa pē ʻoku kumi kiate koe:
tuku ke lea pehē maʻuaipē ʻakinautolu ʻoku ʻofa ki hoʻo fakamoʻui,
“Ke ongoongolelei ʻa Sihova.”
17 Ka ko au ʻoku ou masiva mo paea;
ka ʻoku finangalo ʻae ʻEiki kiate au:
ko koe ko hoku tokoni mo hoku fakamoʻui;
ʻoua naʻa ke fakatuai,
ʻE hoku ʻOtua.