Tongan Bible (Revised West Version) Saame 16
16
1 ʻOku hola ʻa Tevita ki he ʻOtua ke ne fakamoʻui ia. 5 ʻOku ne fakahā ʻene ʻamanaki ki he toetuʻu mo e moʻui taʻengata.
Ko e Saame mahuʻinga ʻa Tevita.
‌ʻE ʻOtua, ke ke fakamoʻui au: he ʻoku ou falala kiate koe.
‌ʻE hoku laumālie, naʻa ke pehē kia Sihova, “Ko hoku ʻEiki koe:
ʻoku ʻikai aʻu atu ʻeku angalelei kiate koe;”
Ka ki he kau māʻoniʻoni ʻoku ʻi māmani,
pea ki he angalelei, ʻoku ʻiate kinautolu ʻeku fiefia kotoa pē.
‌ʻE ʻāsili ai ʻae mamahi ʻokinautolu ʻoku kumi ʻotua kehe:
ko ʻenau ngaahi feilaulau inu ʻoe toto ʻe ʻikai te u ʻatu,
pe toʻo hake honau ngaahi hingoa ki hoku loungutu.
Ko hono lelei ʻo hoku tofiʻa mo ʻeku ipu ʻa Sihova:
ʻoku ke tauhi hoku talotalo.
Kuo falō kiate au ʻae ngaahi afo ʻi he ngaahi potu matamatalelei;
ʻio, kuo u maʻu ʻae tofiʻa lelei.
Te u fakafetaʻi kia Sihova, ʻaia kuo ne akonakiʻi au:
ko hoku kofuua foki ʻoku na akonakiʻi au ʻi he ngaahi feituʻu pō.
Kuo u fokotuʻu maʻuaipē ʻa Sihova ʻi hoku ʻao:
ko e meʻa ʻi heʻene ʻi hoku nima toʻomataʻu, ʻe ʻikai ai te u ngaue.
Ko ia ʻoku fiefia ai hoku loto, pea nekeneka mo hoku ʻelelo:
ʻe mālōlō foki ʻa hoku sino ʻi he ʻamanaki lelei.
10 Koeʻuhi ʻe ʻikai te ke tuku hoku laumālie ʻi hētesi;
pea ʻe ʻikai te ke tuku ho tokotaha māʻoniʻoni ke ne ʻilo ʻae ʻauʻauha.
11 Te ke fakahā kiate au ʻae hala ʻoe moʻui:
ʻoku fonu ʻae fiefia ʻi ho ʻao;
ʻoku ʻi ho nima toʻomataʻu ʻae ngaahi fiemālie ʻo taʻengata.