Tongan Bible (Revised West Version) Saame 10
10
1 ʻOku lāunga ʻa Tevita ki he ʻOtua ʻi he angamālohi ʻoe angahala. 12 ʻOku ne kole ʻae tokoni. 16 ʻOku ne fakahā ʻene tui.
Ko e hā ʻoku ke fakamamaʻo ai, ʻE Sihova?
Ko e hā ʻoku ke fakafufū ai koe ʻi he ngaahi ʻaho ʻoe mamahi?
‌ʻI he fielahi ʻae angakovi ʻoku ne fakatangaʻi ʻae masiva:
tuku ke moʻua ʻakinautolu ʻi he ngaahi filioʻi ʻaia kuo nau fakakaukau ki ai.
He ʻoku polepole ʻae angahala ʻi he holi ʻa hono loto,
ʻo ne fakamālō ki he manumanu ʻaia ʻoku fehiʻa ki ai ʻa Sihova.
Ko e angahala, ʻi he fielahi ʻa hono mata, ʻe ʻikai te ne kumi ki he ʻOtua:
ʻoku ʻikai kau ki he ʻOtua ʻene ngaahi mahalo kotoa pē.
‌ʻOku fakamamahi maʻuaipē hono ngaahi ʻaluʻanga;
ʻoku māʻolunga lahi hake hoʻo ngaahi fakamaau ʻo ʻulia ʻiate ia:
pea ʻoku ne ifi atu ki hono ngaahi fili kotoa pē.
Kuo pehē ʻe ia ʻi hono loto, “ʻE ʻikai te u ngaue:
koeʻuhi ʻe ʻikai te u ʻi he mamahi mei he toʻutangata ki he toʻutangata.”
‌ʻOku fonu hono ngutu ʻi he kape, mo e kākā, mo e loi:
ʻoku ʻi hono lalo ʻelelo ʻae pauʻu, mo e kovi.
‌ʻOku nofo ia ʻi he ngaahi toitoiʻanga ʻoe ngaahi potu kakai:
ʻoku fakapoongi ʻe ia ʻae māʻoniʻoni ʻi he ngaahi potu fakalilolilo:
ʻoku siosio pau hono mata ʻi he fufū ki he masiva.
‌ʻOku tokoto tatali pe ia ʻi he potu lilo, ʻo hangē ko e laione ʻi hono ʻana:
ʻoku tali tokoto ia ke ne pō ʻae masiva:
ʻoku ne pō ʻae masiva, ʻi heʻene fakatauveleʻi ia ki heʻene hele.
10 ‌ʻOku ne tulolo ʻo fakavaivai ia,
koeʻuhi ke hinga ai
ʻae masiva ʻi heʻene mālohi.
11 Naʻe pehē ʻe ia ʻi hono loto, “Kuo ngalo ʻi he ʻOtua:
ʻoku fufū ʻe ia hono fofonga
ʻe ʻikai ʻaupito te ne mamata ki ai.”
12 Tuʻu hake, ʻE Sihova;
ʻE ʻOtua, hiki hake ho nima:
ʻoua naʻa fakangalongaloʻi ʻae angavaivai.
13 Ko e hā ʻoku manuki ai ʻe he angakovi ki he ʻOtua?
Naʻe pehē ʻe ia ʻi hono loto, “ʻE ʻikai te ke ʻeke ki ai.”
14 Kuo ke ʻafioʻi ia; he ʻoku ke ʻafioʻi ʻae pauʻu mo e fakafāsifasi,
ke totongi ia ʻaki ho nima:
ʻoku tuku ia kiate koe ʻe he masiva;
ko koe ko e tokoni ʻoe tamai mate.
15 Fesiʻi ʻe koe ʻae nima ʻoe tangata angahala mo angakovi:
kumi ʻene ngaahi kovi kotoa pē ke ʻoua ke ʻosi.
16 Ko e Tuʻi ʻa Sihova, ʻo taʻengata pea taʻengata:
kuo ʻauha ʻae hiteni mei hono fonua.
17 ‌ʻE Sihova, kuo ke ongoʻi ʻae holi ʻae angavaivai:
pea te ke teuʻi honau loto,
te ke ʻange ho fofonga ke ʻafioʻi:
18 Ke fakamaau ʻae ngaahi tamai mate mo e kakai kuo taʻomia,
koeʻuhi ke ʻoua naʻa toe fakailifiaʻi ʻe he tangata ʻoe fonua.