40
3 ʻOku fakavaivai ʻa Siope ki he ʻOtua. 6 ʻOku ueʻi ia ʻe he ʻOtua ke ne fakahā ʻene māʻoniʻoni, mo hono mālohi, mo ʻene poto. 15 Ko e Piʻimote.
Pea naʻe folofola pe ʻa Sihova kia Siope, ʻo pehē,
“Ko ia ʻoku ne fakakikihi ki he Māfimafi te ne akonaki ia?
Ko ia ʻoku ne valokiʻi ʻae ʻOtua, tuku ke ne talia ia.”
¶ Pea naʻe toki tali ʻe Siope kia Sihova, ʻo ne pehē,
“Vakai kuo u kovi; ko e hā te u tali ʻaki koe?
Te u ʻai hoku nima ki hoku ngutu.
Kuo u lea ʻo tuʻo taha ka ʻe ʻikai te u toe lea:
ʻio, kuo tuʻo ua ka ʻe ʻikai te u toe lea atu.”
¶ Pea naʻe toki folofola ʻa Sihova kia Siope mei he ʻahiohio, ʻo pehē,
“Ko eni, ke ke nonoʻo ho noʻotangavala ʻo taau mo e tangata:
pea te u ʻeke kiate koe, pea ke fakahā mai kiate au.
Te ke fakataʻeʻaongaʻi ʻa ʻeku fakamaau foki?
Te ke fakahalaia au, koeʻuhi ke ke māʻoniʻoni koe?
Kuo ke maʻu ʻae nima ʻo hangē ko e ʻOtua?
Pe ʻoku ke faʻa mana koe ʻaki ʻae leʻo ʻo hangē ko ia?
10 “Ko eni, ke ke teuʻi koe ʻaki ʻae māfimafi mo e ngeia;
mo ke kofuʻaki koe ʻae nāunau mo e toulekeleka.
11 Tufaki ke mamaʻo ʻae tuputāmaki ʻo ho houhau:
pea vakai kiate kinautolu taki taha kotoa pē ʻoku laukau, ʻo fakavaivai ia.
12 Vakai kiate ia kotoa pē ʻoku fielahi, pea ʻohifo ia ki lalo;
pea molomoloki hifo ʻae kau angahala ʻi honau potu.
13 Fakafufū ʻakinautolu fakataha ʻi he efu;
pea nonoʻo honau mata ʻi he lilo.
14 Pea te u toki fakamoʻoni kiate koe,
ʻe faʻa fakamoʻui koe ʻe ho nima toʻomataʻu ʻoʻou.
15 “Ko eni, ke ke vakai ki he Piʻimote, ʻaia kuo u ngaohi mo koe;
ʻoku ne kai mohuku ʻo hangē ko e fanga pulu:
16 Vakai, ʻoku ʻi hono fasiʻatuʻa ʻa hono mālohi,
mo ʻene mafai ʻoku ʻi he pito ʻo hono kete.
17 ‌ʻOku ne ueʻi hono iku ʻo hangē ko e sita:
ko e uoua ʻo hono tenga ʻoku fefihitaki fakataha.
18 Ko hono ngaahi hui ʻoku tatau mo e ngaahi konga palasa mālohi;
ʻoku tatau hono ngaahi hui mo e ngaahi vaʻa ʻaione.
19 Ko e lahi ia ʻoe ngaahi ngāue ʻae ʻOtua:
ko ia naʻa ne ngaohi ia ʻoku ne faʻa fai ke fakaofi ʻene heletā kiate ia.
20 Ko e moʻoni, ʻoku tupu hake ʻi he ngaahi moʻunga ʻae meʻakai maʻana,
ʻaia ʻoku fakavā ai ʻae ngaahi manu kotoa pē ʻoe ngoue.
21 ‌ʻOku tokoto ia ʻi he lolo ʻakau malumalu,
ʻi he lilolilo ʻoe kaho, mo e ngaahi ano.
22 Ko e ngaahi ʻakau malumalu ʻoku ʻufiʻufi ia ʻaki honau ata;
ʻoku tuʻu takatakai ʻiate ia ʻae ngaahi uilou ʻoe vaitafe.
23 Vakai, ʻoku ne inu ʻae vaitafe ʻo maha, pea ʻikai toʻotoʻo:
ʻoku tui ia te ne faʻa mimisi hake ʻa Sioatani ki hono ngutu.
24 ‌ʻOku ne maʻu ia ʻaki hono mata:
ʻoku ne tuiʻi ʻae ngaahi tauhele ʻaki hono iku.