41
1 Ki he mālohi lahi ʻae ʻOtua ʻoku fakahā ʻi he levaiatani.
1 “ʻOku ke faʻa fusi hake ʻae levaiatani ʻaki ʻae mātaʻu?
Pe ko hono ʻelelo ʻaki ʻae afo ʻoku ke tukutuku hifo?
2 ʻOku ke faʻa ʻai ʻae mātaʻu ki hono ihu?
Pe vili ke ʻasi hono kouʻahe ʻaki ʻae talaʻi ʻakau?
3 Te ne fai ʻene ngaahi hū tāumaʻu kiate koe?
Te ne lea ʻaki ʻae ngaahi lea malu kiate koe?
4 Te ne fai ʻae fuakava mo koe?
Te ke maʻu ia ko hoʻo tamaioʻeiki ʻo taʻengata?
5 Te ke fakavā mo ia ʻo hangē ko e manupuna?
Pe te ke noʻotaki ia maʻa hoʻo kau taʻahine?
6 ʻE fai kātoanga ʻaki ia ʻe ho kaumeʻa?
Te nau vahevahe ia ki he kakai fakatau?
7 ʻOku ke faʻa fakapito hono kili ʻi he tao ukamea talatala?
Pe ko hono ʻulu ʻi he tao hoka ika?
8 Hilifaki ho nima kiate ia,
manatu ki he tau, pea ʻoua naʻa toe fai hā meʻa.
9 Vakai, ʻoku taʻeʻaonga ke ʻamanaki kiate ia:
ʻikai ʻe tō ki lalo ha tokotaha ʻi he mamata pe kiate ia?
10 ʻOku ʻikai ha tokotaha ʻoku loto lahi ʻe fie ueʻi ia ke tuʻu hake:
pea ka kuo pehē, ko hai koā ʻe faʻa tuʻu ʻi hoku ʻao?
11 Ko hai kuo ne tomuʻa fai kiate au koeʻuhi ke u totongi ia?
Ko e meʻa kotoa pē ʻoku ʻi lalo langi ʻoku ʻaʻaku ia.
12 “ʻE ʻikai te u fakapuli hono ngaahi konga,
pe ko hono mālohi, pe ko hono matamatalelei.
13 Ko hai te ne faʻa ʻilo ʻae mata ʻo hono kofu?
Pe ko hai ʻe faʻa haʻu kiate ia mo e palaiteli lou ua?
14 Ko hai te ne faʻa toʻo ʻae matapā ʻo hono mata?
ʻOku fakailifia hono ngaahi nifo ʻoku takatakai.
15 ʻOku viki ia ʻi hono ngaahi ʻuno,
ʻaia ʻoku tāpuni fakataha ʻo hangē ko e meʻa pulusi maʻu.
16 ʻOku fengūtaki pehē ʻae taha ki he taha,
ʻaia ʻoku ʻikai faʻa hū ai ʻae matangi ʻi hona vahaʻa.
17 ʻOku nau fehokotaki,
ʻo fepikitaki fakataha, pea ʻe ʻikai faʻa vaheʻi.
18 ʻI heʻene mafatua ʻoku ulo ai ʻae maama,
pea ʻoku tatau hono mata mo e laumata ʻoe pongipongi.
19 ʻOku ʻalu atu mei hono ngutu ʻae ngaahi maama ulo,
ʻoku puna mei ai kituʻa ʻae ngaahi kalofiama.
20 ʻOku ʻalu atu ʻi hono avaʻi ihu ʻae ʻohuafi,
ʻo hangē ko e kulo vai kuo lili, pe ko e fuʻu kulo.
21 ʻOku tutu ʻe heʻene mānava ʻae malala,
pea ʻoku ulo mai ʻae afi mei hono ngutu.
22 ʻOku nofo ʻae mālohi ʻi hono kia,
pea ʻoku liliu ʻae mamahi ko e fiefia ʻi hono ʻao.
23 Ko hono ngaahi ʻioʻi kakano ʻoku piki fakataha:
ʻoku mālohi ia ʻi ai;
ʻoku ʻikai faʻa ueʻi.
24 ʻOku mālohi hono loto ʻo hangē ko e maka;
ʻio, ʻoku fefeka ʻo hangē ko e konga ʻoe maka tokalalo ʻoe meʻa momosi.
25 ʻOka fokotuʻu hake ia ki ʻolunga, ʻoku manavahē ʻae kau mālohi:
ko e meʻa ʻi he faʻa maumau ʻoku nau fakamaʻa ʻakinautolu.
26 Ko e heletā ʻo ia ʻoku ne tā kiate ia ʻoku ʻikai tau;
pe ko e tao, pe ko e tokotoko, mo e kofutau.
27 ʻOku tatau kiate ia ʻae ʻaione mo e mohuku,
ʻae palasa mo e ʻakau popo.
28 ʻE ʻikai hola ia ʻi he ngahau:
ʻoku ne liliu ʻae ngaahi makatā ko e veve.
29 ʻOku ne ui ʻae ngaahi ngahau ko e mohuku mōmoa:
ʻoku kata ia ʻi he apoapo ʻoe tao.
30 ʻOku ʻi lalo ʻiate ia ʻae ngaahi maka māsila:
ʻoku ne folahi ki he pelepela ʻae ngaahi meʻa māsila.
31 ʻOku ne fakalili ʻae loloto ʻo hangē ko e kulo:
ʻoku ne ngaohi ke tatau ʻae tahi mo e ipu ʻoe meʻa tākai.
32 ʻOku ne fakangingila ʻae hala kimui ʻiate ia;
ʻe mahalo ʻe ha taha ʻoku hinehina ʻae loloto.
33 ʻOku ʻikai hano tatau ʻi he fonua,
ʻaia kuo ngaohi ke taʻemanavahē.
34 ʻOku ne vakai ki he ngaahi meʻa māʻolunga kotoa pē:
ko e tuʻi ia ki he ngaahi fānau kotoa pē ʻoe laukau.”