Tongan Bible (Revised West Version) Siope 30
30
1 ʻOku liliu ʻae ongoongolelei ʻo Siope ko e meʻa manuki lahi. 15 Pea mo ʻene monūʻia ko e tuʻutāmaki.
“Ka ko eni, ʻoku manukiʻi au ʻekinautolu ʻoku mui ʻiate au,
ka ko ʻenau ngaahi tamai ʻanautolu ne u fehiʻa ke lau fakataha mo e fanga kulī ʻo ʻeku ngaahi fanga manu.
‌ʻIo, ʻe ʻaonga fēfē kiate au ʻae mālohi ʻa honau nima,
ka kuo ʻauha ʻenau motuʻa lelei?
Ko e meʻa ʻi he masiva mo e honge naʻa nau ʻi he fakapoʻuli ʻo hangē ko e pō;
ʻo feholaki ki he toafa kuo masiva mo siʻaki.
Naʻa nau tuʻusi ʻae ngaahi ʻakau kona,
pea keli aka ke nau kai.
Naʻe kapusi ʻakinautolu mei he kakai,
(pea naʻa nau kalanga ki ai ʻo hangē ki ha kaihaʻa;)
Ke nau nofo ʻi he ngaahi lilifa ʻoe luo,
ʻi he ngaahi ʻana ʻoe fonua, mo e ngaahi maka.
Naʻa nau tangi mei he ngaahi ʻakau,
pea nau fakataha ʻi lalo ʻi he ngaahi ʻakau talatala.
Ko e fānau ʻae kau vale, ko e hako ʻoe kakai meʻa vale;
naʻe kapusi ʻakinautolu mei he fonua.
 
“Ka ko eni, kuo u hoko au ko ʻenau hivehivaʻanga,
ʻio, ko ʻenau lea manukiʻanga au.
10 ‌ʻOku nau fakaliliʻa kiate au, pea nau hola mamaʻo ʻiate au,
pea ʻikai te nau manavahē ke ʻaʻanu ki hoku mata.
11 Ko e meʻa ʻi heʻene vete ʻeku afo, ʻo tautea au,
ko ia kuo nau tukuange ai foki ʻae noʻo ʻi hoku ʻao.
12 ‌ʻOku tutuʻu ʻae kau talavou ʻi hoku toʻomataʻu;
ʻoku nau tekeʻi hoku vaʻe,
pea ʻoku nau fokotuʻu hake ʻo angatuʻu kiate au ʻae ngaahi hala ʻo honau fakaʻauha.
13 ‌ʻOku nau maumauʻi hoku hala,
ʻoku nau fiefia ʻi heʻeku mamahi,
ʻoku ʻikai hanau tokoni.
14 Naʻa nau feʻohofi mai ʻo hangē ʻi ha potu fālahi:
pea ʻi he maumau naʻa nau filifilihi ʻakinautolu kiate au.
15 Kuo tō kiate au ʻae ngaahi ilifia:
ʻoku nau tuli hoku laumālie ʻo hangē ko e matangi:
pea ʻoku mole atu ʻeku lelei ʻo hangē ko e ʻao.
 
16 “Pea ko eni, kuo lilingi hoku laumālie ʻiate au;
kuo puke au ʻe he ngaahi ʻaho ʻoe mamahi.
17 ‌ʻOku mahuhuhuhu ʻa hoku ngaahi hui ʻi he poʻuli:
pea ʻoku ʻikai ke mālōlō siʻi hoku ngaahi uoua.
18 Kuo fetongi hoku kofu ʻe he mālohi lahi:
ʻoku ne nonoʻo takatakai au ʻo hangē ko e kia ʻo hoku kofutuʻa.
19 Kuo ne lī au ki he pelepela,
pea kuo u tatau mo e efu mo e efuefu.
20 ‌ʻOku ou tangi kiate koe, ka ʻoku ʻikai te ke ongoʻi au:
ʻoku ou tuʻu hake, ka ʻoku ʻikai te ke tokangaʻi au.
21 Kuo ke liliu ʻo taʻeʻofa kiate au:
ʻoku ke tuʻu kiate au ʻaki ho nima mālohi.
22 ‌ʻOku ke ʻohake au ki he matangi mo ke fakaheka au ki ai,
pea ʻoku ke veteki ʻeku meʻa.
23 He ʻoku ou ʻilo pau te ke ʻomi au ki he mate,
pea ki he fale kuo tuʻutuʻuni ki he kakai moʻui kotoa pē.
 
24 “Ka ʻe ʻikai te ne mafao atu hono nima ki he faʻitoka,
neongo ʻoku nau tangi ʻi heʻene fakaʻauha.
25 ‌ʻIkai naʻaku tēngihia ia ʻaia naʻe mamahi?
ʻIkai naʻe mamahi hoku laumālie koeʻuhi ko e masiva?
26 ‌ʻI heʻeku ʻamanaki ki he lelei, naʻe hoko mai ʻae kovi:
pea ʻi heʻeku tatali ki he maama, ne hoko mai ʻae fakapoʻuli.
27 Naʻe lili hoku fatu, ʻo ʻikai toka:
naʻe taʻofi au ʻe he ngaahi ʻaho ʻoe mamahi.
28 Naʻaku ʻalu mamahi pe ʻi he taʻeulo ʻae laʻā;
ne u tuʻu hake ʻo tangi ʻi he fakataha.
29 Ko e tokoua au ʻoe fanga talākoni,
mo e kaumeʻa ʻoe fanga lulu.
30 Kuo ʻuliʻuli hoku kili ʻiate au,
pea kuo velehia hoku ngaahi hui ʻi he ʻafu.
31 Kuo liliu ʻeku haʻape ko e tangi,
pea ko ʻeku meʻa ifi ko e leʻo ʻokinautolu ʻoku tangi.