Tongan Bible (Revised West Version) Siope 29
29
ʻOku fakamamahiʻi ʻa Siope ʻe ia koeʻuhi ko ʻene monūʻia mo ʻene ongoongolelei ʻi muʻa.
Ka naʻe fai ai pe ʻe Siope ʻene lea mamafa, ʻo ne pehē,
“Taumaiā kuo u tatau eni mo e ngaahi māhina kuo hili ange,
ʻo hangē ko e ngaahi ʻaho naʻe maluʻi ai au ʻe he ʻOtua;
‌ʻI he kei ulo ʻa ʻene maama ki hoku ʻulu,
pea u ʻalu mo ʻene maama ʻi he fakapoʻuli;
‌ʻO hangē ko ʻeku nofo ʻi he ngaahi ʻaho ʻo ʻeku monūʻia,
ʻi he fakataha ʻae kakai ʻoe ʻOtua ʻi hoku fale;
‌ʻI he kei ʻiate au ʻae Māfimafi,
pea ʻiate au mo ʻeku fānau;
‌ʻI he tafe ʻae pota ʻi hoku hala,
pea lilingi mai ʻe he maka ʻae lolo lahi ʻaupito;
‌ʻI heʻeku ʻalu atu ʻi he loto kolo ki he matapā,
pea teuʻi hoku nofoʻanga ʻi he hala lahi!
Naʻe sio kiate au ʻae kau talavou, ʻonau toitoi:
pea tutuʻu ki ʻolunga ʻae kau mātuʻa.
Naʻe taʻofi ʻe he ngaahi ʻeiki ʻenau alea,
ʻo ʻai honau nima ki honau ngutu.
10 Naʻe longo pe ʻae houʻeiki,
pea piki honau ʻelelo ki honau ʻoʻaoʻingutu.
11 ‌ʻI he ongoʻi au ʻe he telinga, ne ne tāpuakiʻi au;
pea ʻi he mamata ʻae mata kiate au, naʻa ne fakamoʻoniʻi au:
12 He naʻaku fakahaofia ʻae masiva naʻe tangi,
ʻae tamai mate, mo ia naʻe ʻikai hano tokoni.
13 Ko e tāpuaki ʻo ia naʻe meimei mate ne hoko kiate au:
pea naʻaku fakafiefiaʻi ke hiva ʻae loto ʻoe fefine kuo mate hono ʻunoho.
14 Ne u ai ʻae māʻoniʻoni, pea ne ʻufiʻufi ʻaki au:
naʻe tatau ʻeku fakamaau mo e pulupulu mo e pale.
15 Ko e mata au ki he kui,
mo e vaʻe ki he ketu.
16 Ko e tamai au ki he masiva:
pea ko e meʻa naʻe ʻikai te u ʻiloʻi ne u kumi lahi ki ai.
17 Naʻaku fesiʻi ʻae kouʻahe ʻoe fai kovi,
ʻo toʻo ʻae meʻa faʻao mei hono nifo.
18 Pea u toki pehē, ‘Te u mate ʻi hoku pununga,
pea te u fakalahi hoku ngaahi ʻaho ke hangē ko e ʻoneʻone.
19 Naʻe mafola hoku aka ʻi he ngaahi veʻe vai,
pea toka ʻae hahau ki hoku vaʻa ʻi he pō kotoa.
20 Ko hoku ongoongolelei naʻe maʻuiʻui pe,
pea naʻe fakafoʻou ʻeku kaufana ʻi hoku nima.’
 
21 “Naʻe fakafanongo ʻae kakai kiate au, ʻo tatali,
pea fakalongo pē ʻi heʻeku akonaki.
22 Hili ʻeku lea naʻe ʻikai te nau tali;
pea naʻe tō ʻeku lea kiate kinautolu.
23 Pea naʻa nau tatali kiate au ʻo hangē ki he ʻuha:
pea nau fakamanga lahi honau ngutu ʻo hangē ki he ʻuha mui.
24 Ne u kata kiate kinautolu, pea ʻikai te nau faʻa tui;
pea ko e maama ʻo hoku mata naʻe ʻikai ke nau lī ki lalo.
25 Naʻaku fili honau hala, ʻo nofo ko e ʻeiki,
ne u nofo ʻo hangē ha tuʻi ʻi he kautau,
pea hangē ha taha ʻoku ne fakafiemālieʻi ʻae kakai mamahi.