11
1 ʻOku valokiʻi ʻa Siope ʻe Sofaa koeʻuhi ko ʻene fakatonuhiaʻi ia ʻe ia. 6 ʻOku taʻefaʻaʻilo ʻae poto ʻoe ʻOtua. 13 Ko e monūʻia ʻoku maʻu ʻi he fakatomala.
Pea naʻe toki tali ʻe Sofaa mei Neama, ʻo ne pehē,
“ʻIkai ʻoku totonu ke tali ʻae ngaahi lea lahi ni?
Pea ʻe fakatonuhiaʻi koe ʻae tangata faʻa lau?
‌ʻE fakalongoʻi ʻae kakai ʻe hoʻo ngaahi loi?
Pea ʻi hoʻo manuki, ʻe ʻikai fakamā koe ʻe ha taha?
He kuo ke pehē, ‘Ko ʻeku akonaki ʻoku totonu pē,
pea ʻoku ou maʻa ʻi ho ʻao.’
Kae taumaiā ke folofola mai ʻae ʻOtua,
ʻo ne faʻai hono fofonga kiate koe;
Pea ne fakahā kiate koe ʻae ngaahi meʻa lilo ʻoe poto,
he ʻoku lahi hake ʻaupito ia ʻi he meʻa ʻoku hā mai!
Ko ia ke ke ʻilo, ʻoku siʻi ʻae totongi ʻoku ʻeke ʻe he ʻOtua ʻi he meʻa ʻoku taau mo hoʻo angahia.
 
“He te ke ʻilo ʻae ʻOtua ʻi he faʻa ʻeke?
He te ke faʻa kumi ke ʻilo haohaoa ʻae Māfimafi?
‌ʻOku māʻolunga ia ʻo hangē ko e langi; ko e hā ʻaʻau te ke fai?
ʻOku māʻulalo hifo ʻi heli; te ke faʻa ʻilo ʻae hā?
Ko hono fuofua ʻoku lōloa lahi ʻi he māmani,
pea lau lahi ia ʻi he tahi.
10 Kapau ʻe tuʻusi ʻe ia, pe tāpuni ke maʻu,
pe tānaki fakataha, ʻe taʻofi ia ʻe hai?
11 He ʻoku ne ʻiloʻi ʻae kakai vale:
ʻoku ne vakai foki ki he fai kovi; pea ʻe ʻikai te ne tokangaʻi?
12 He ʻoku fie poto ʻae tangata vale,
neongo ʻoku fanauʻi ʻae tangata ʻo hangē ko e ʻuhiki ʻoe ʻasi kai vao.
 
13 “Kapau te ke teu ho loto,
pea mafao atu ho nima kiate ia;
14 Kapau ʻoku ʻi ho nima ʻae angahala, siʻaki ia ke mamaʻo,
pea ʻoua naʻa nofo ʻae kovi ʻi ho ngaahi fale.
15 He ko ia te ke toki hanga hake ai ho mata ʻo taʻehanoʻila;
ʻio, te ke tuʻumaʻu, ʻo ʻikai manavahē:
16 He te ke fakangaloʻi hoʻo mamahi,
ʻo manatuʻi ia ʻo hangē ko e ngaahi vai kuo tafe atu:
17 Pea ʻe ʻāsinisini lahi hoʻo motuʻa ʻi he hoʻatāmālie ʻoe ʻaho;
te ke ulo atu, te ke tatau mo e pongipongi.
18 Pea te ke fiemālie koe, he ʻoku ai ʻae ʻamanaki lelei;
ʻio, te ke keli, ʻo mālōlō fiemālie pe.
19 Pea te ke tokoto foki, pea ʻe ʻikai fakamanavahēʻi koe ʻe ha taha;
ʻio, ʻe kumi meʻa meiate koe ʻe he tokolahi.
20 Ka ʻe vaivai ʻae mata ʻoe angahala,
pea ʻe ʻikai te nau hao,
pea ko e ifi ʻoe mānava ʻa ʻenau ʻamanaki.”