Tongan Bible (Revised West Version) Siope 7
7
1 ʻOku fakahā ʻe Siope ʻoku totonu ʻene holi ki he mate. 12 ʻOku ne lea ki heʻene feinga, 17 Mo e leʻohi ia ʻe he ʻOtua.
“ʻIkai ʻoku ai ʻae kuonga kuo tuʻutuʻuni ki he tangata ʻi māmani?
pea tatau hono ngaahi ʻaho mo e ngaahi ʻaho ʻoe ngāue unga?
‌ʻO hangē ko e holi lahi ʻae tamaioʻeiki ki he malumalu,
pea hangē ko e ʻamanaki ʻae ngāue unga ki he totongi ʻo ʻene ngāue:
‌ʻOku pehē, kuo tuku ke ʻaʻaku ʻae ngaahi māhina mamahi,
pea kuo tuʻutuʻuni kiate au ʻae ngaahi pō fakamamahi.
‌ʻO kau ka tokoto hifo, ʻoku ou pehē,
‘te u tuʻu hake ʻafē, kuo ʻosi ʻae pō?’
Pea ʻoku ou fiu ʻi he fetafokifokiʻaki ʻo aʻu ki he maʻa ʻae ʻaho.
Kuo kofuʻaki hoku sino ʻae ʻuanga mo e ngaahi konga kelekele;
kuo mafahifahi hoku kili, pea kuo fakalielia.
Ko hoku ngaahi ʻaho ʻoku vave ʻi he faʻonga filo ʻoe tangata lalanga,
pea ʻoku fakaʻosi ia taʻehaʻamanaki lelei.
‌ʻOfa ke manatuʻi ko e matangi ʻa ʻeku moʻui:
ʻE ʻikai toe mamata ʻa hoku mata ki he lelei.
Ko e mata ʻo ia kuo ne mamata kiate au ʻe ʻikai toe mamata mai:
ʻoku ʻiate au ho fofonga, pea u ʻikai leva.
‌ʻO hangē ko e fakamovetevete ʻo mole atu ʻae ʻao:
ʻoku pehē, ko ia ʻoku ʻalu hifo ki he faʻitoka ʻe ʻikai toe ʻalu hake.
10 ‌ʻE ʻikai toe foki ia ki hono fale,
pea ʻe ʻikai toe ʻiloʻi ia ʻe hono potu.
 
11 “Ko ia ʻe ʻikai te u taʻofi ki hoku ngutu;
te u lea ʻi he ongosia ʻo hoku laumālie;
te u lāunga ʻi he mamahi ʻo hoku laumālie.
12 He ko ha tahi au pe ko e tofuaʻa,
koeʻuhi kuo ke fakanofo ha leʻo kiate au?
13 ‌ʻO kau ka pehē, ‘ʻE fakafiemālieʻi au ʻe hoku mohenga,
ʻe fakasiʻisiʻi hoku mamahi ʻe hoku tokotoʻanga;’
14 ‌ʻOku ke fakailifiaʻi au ʻaki ʻae ngaahi misi,
pea ke fakalilikaʻi au ʻi he ngaahi meʻa hā mai:
15 Ko ia ʻoku fili ai ʻe hoku laumālie ʻae sisina,
mo e mate ʻi heʻeku moʻui.
16 ‌ʻOku ou fakaliliʻa ki ai;
ʻe ʻikai te u fie moʻui ai pe:
tuku ai pe au; he ko e vaʻinga pe ʻa hoku ngaahi ʻaho.
17 He ko e hā ʻae tangata, ʻoku ke hakeakiʻi ai ia?
Pea koeʻuhi ke ke tukupau ho loto kiate ia?
18 Pea koeʻuhi ke ke ʻaʻahi ki ai ʻi he pongipongi kotoa pē,
mo ʻahiʻahiʻi ia ʻi he kihiʻi feituʻulaʻā siʻi kotoa pē?
19 ‌ʻE fēfē hono fuoloa mo e ʻikai te ke ʻalu ʻiate au,
pe tuku pe au ke ʻoua muʻa ke u folo hifo hoku ifo?
20 Kuo u fai angahala; ko e hā te u fai kiate koe, ʻa koe ko e fakamoʻui ʻoe kakai?
Ko e hā kuo ke fokotuʻu ai au ko e fakaʻilonga maʻau,
ke u hoko ai ko e kavenga, kiate au pe?
21 Pea ko e hā ʻoku ʻikai ai ke ke fakamolemole ʻeku angahala, pea toʻo atu ʻeku fai hala?
He ko eni teu mohe pe ʻi he efu;
pe te ke kumi au ʻi he pongipongi, ka ʻe ʻikai teu ʻi ai au.”