4
Wâro na wâdé tà Pwiduée
1 Tèpa béeò naa goo Kériso, bà tubanabwé [goro ê auniimiri bèeni]: Bà jèe pacâmuriwà goo ê pai wâro na wâdé tà Pwiduée, â guwà jèe wârori. Â nabàni, âna bà tacoo goowà, naa na nee Pwi Ukai Iésu, pâ, na guwà pwa cèna piwéna. 2 Ba guwà nye tâmogòori ê pâ aupitûâri, na ia bà jèe naa tàwà, naa na nee. 3 1 Tésalonika 5.23; 1 Pétéru 1.16Wà Pwiduée, âna nümee na guwà wârori ê wâro na wâdé têe, naa na diri pâ ére.
Gà cibwaa ipuu mara pâ âboro imudi;
4 1 Korénito 6.13Gà piwéaari bwàti ê naiigà* Gà piwéaari bwàti ê naiigà—é, Gà wéaari ma papwicîri tô wâdàgà., ba na gà o pwicîri ma wâdé na ara Pwiduée;
5 Gà cibwaa nama dàtigà ê pâ câbawâdé kâra naiiri âboro, na èpà, pwacèwii tàpé na càra caa tâmogòori Pwiduée;
6 Gà cibwaa ipwa tûâ tà pwi a cèikî béegà, ma ipuu ma ê wâdèe.
Wà Pwiduée, âna ée pwa wârimuru tà tàpé na rà wàrapwiri, wàra pai jèe ina kâbà tàwà. 7 1 Pétéru 1.15–16Ba câé caa todàjè, ba na jè wâro imudi; â é todàjè, ba na jè wâro ba kêe. 8 Luka 10.16; 2 Korénito 1.22Â wà pwina é tétâjii ê popai bèepwiri, âna câé caa tétâjii aupitûâri kâra âboro, â é nye tétâjii wà Pwiduée, na é naa tàwà ê Nyuâaê Pwicîri kêe.
Nama pimaina too pimeaari kàwà
9 Ioane 13.34Napwa naa goo ê pai pimeaari kàwà, âna, ticè muru na go ina tàwà naa goo. Ba guwà jèe nye tâmogòori, gée goo Pwiduée, ê pai meaari tèpa béewà naa goo Kériso. 10 Â [bà tâmogòori pâ] guwà dau meaari ba maina tèpa cèikî wâ Macédoine. Â bà ina tàwà pâ, wâdé na guwà dau pwa cèna piwéna.
11 Éféso 4.28Guwà imudàra ma guwà piwâro na tàbwàti ma wà pàra tàpé.  guwà cibwaa pwa ma âranümawà ê wâro kà pwi jèpwi.  guwà wakè bwàti, wàra pai jèe ilari kâbà jiiwà. 12 Â, na wàrapwiri, â wà tàpé na càra caa tèpa cèikî, âna rà o câbawâdé ê pai wâro kàwà. Ba o câguwà caa tèpa ija wii pwâraw↠2e phrase—é, Ba na ticè cè jè muru cèna tiàu jiiwà..
Pai wâjué côwâ kà Pwi Ukai
Rà mwa wâro côwâ tèpa bà
13 Tèpa béeò naa goo Kériso, nümabà na guwà tâmogòori ê pwina tapacîri wà tèpa [cèikî na ia rà jèe] bà. Ba na, o câguwà caa pikîri, pwacèwii tàpé na càra caa tèpa cèikî. 14 Roma 14.9; 1 Korénito 15.3–4,12Ba jè cèikî pâ, é bà wà Iésu, â é wâro côwâ gée na aubà. Êkaa na bà tâmogòori pâ, wiàna é bà wà pwi a cèikî naa gooé, â wà Pwiduée, âna é nama é wâro côwâ‡ É nama é wâro côwâ—Grec: É popaé me. pwacèwii Iésu.
15 1 Korénito 15.51–52Üu, wàéni ê popai kà Pwi Ukai na bà ina tàwà: Na tòotù na ée mwa wâjué me côwâ wà Pwi Ukai, âna wà tèpa âboro kêe na rà jèe bà, âna [rà o mwa wâro côwâ gée na aubà, â rà o pâmariê. Â] o càra caa tapacîri wà tàpé na rà bwaa wâro. [Ba jè mwa capai pitànaima ma wàé.] 16 Na pwi tòotù-bà, âna jè o mwa têre cè pwâra uu cèna maina—pwâratùra kà pwi ukai kà tèpa *angela, ma ê airi tutu kà Pwiduée. Â wà Pwi Ukai, âna ée mwa tàbàtù boome gée napwéretòotù. Â wà tèpa cèikî naa gooé, na rà jèe bà, âna rà mara cimadò gée na aubà.
17 Â gée na càùé, â wàijè tàpé na jè bwaa wâro, âna o cau dàgòtùjè too, naima ma wàilà, too naa na pâ nee, dari wà Pwi Ukai, â o ipitijè ma wàé. Â jè o mwa pitànaima ma wà Pwi Ukai dàra gòiri awé. 18 Guwà ipagòowà, goro ê popai bèepwiri!
4:3 1 Tésalonika 5.23; 1 Pétéru 1.16
4:4 1 Korénito 6.13
*4:4 Gà piwéaari bwàti ê naiigà—é, Gà wéaari ma papwicîri tô wâdàgà.
4:7 1 Pétéru 1.15–16
4:8 Luka 10.16; 2 Korénito 1.22
4:9 Ioane 13.34
4:11 Éféso 4.28
†4:12 2e phrase—é, Ba na ticè cè jè muru cèna tiàu jiiwà.
4:14 Roma 14.9; 1 Korénito 15.3–4,12
‡4:14 É nama é wâro côwâ—Grec: É popaé me.
4:15 1 Korénito 15.51–52