Tii Pwicîri: Âmu Aamwari naa na cî 1 Ioane 1
Pâbéaa kâra tii
Ioane
Bétapoo popai
Wàilàapà na wii tii bèeni?
Munaa Ioane, pwi *apostolo, na ia é bwaa pwi nari âboro èpo na pàara kà Iésu.
É wii wiidà?
Nabibiu kâra *naja 85 ma 100, na é jèe pwi ijiao, â é pwi a pitûâ kâra wâra pwapwicîri wâ Éféso naa province Asia (napô Turquie nabà). Na pwi pàara bèepwiri, na é wii diri tèpa 5 tii kêe na tâa na *Tii Pwicîri—ê *Picémara Wâdé (Tii kà Ioane); 1, 2, 3 Ioane, ma tii Auinapàpari.
É wii tâî?
Târa ê pâ picaatâa kà tèpa cèikî naa goo Iésu, na rà tâa na province Asia.
Cina é wii?
É pacâmuri tèpa cèikî na Asia goro ê âjupâra. Ba wà pàra tàpé gée goorà, âna rà pacâmurirà goro pâ popai na pwâ. Ba rà ina pâ, wà Iésu, âna câé caa pwi âji âboro pwacèwiijè, â câé caa tâmogòori pâ tacai ma aré kà tèpa âji âboro. Â rà ina mwara pâ, piticèmuru naa goo ê naiijè ma diri pâ muru na jè côo. Êkaa na piticèmuru naa goo pai wârori ê wâro kâjè, wiàna wâdé, é wiàna èpà, ba ipaiwà. Â rà jèe ipa-imwüru pàra tàpé goro ê popai bèepwiri.
Dà êre ê tii bèeni?
É taniimiri tâjè wà Ioane pâ, nye âjupâra pâ, wà Iésu, âna é nye pwi âji âboro pwacèwiijè. Êco na wàé *Pwina naî Pwiduée wà Kériso. Napwa wà Pwiduée, âna é pwéelaa, ma pimeaari. Â jè tâmogòori pwiri gée goo Iésu, na é jèe pwanauri ê èpà kâjè. Â jè tâmogòori mwara gée goo ê Nyuâaê Pwicîri na é jèe naa tâjè wà Iésu.
Napwa wà pwi âji a cèikî naa goo Iésu, âna wâdé na é ciburà tâa goo ê cèikî, na jèe picòo têe gée na autapoo goo. Â wâdé mwara, na é naa ê wâro kêe ba kà pàra tàpé, pwacèwii Iésu.
Na wàrapwiri â é paari ê pai pimeaari kêe ba kà Pwiduée, ma pai tâmogòorié kêe.
Pai pitàgoo tii 1 Ioane
Popai kà Pwiduée na é naa wâro (1.1–4)
Jè wâro na pwéelaa wàijè tèpa naî Pwiduée (1.5–2.17)
Tèpa cicara Kériso (2.18–28)
Jè tèpa naî Pwiduée (3.1–24)
Tèpa péroféta a pwâ (4.1–6)
Majoroé pai pimeaarijè (4.7–21)
Cèikî naa goo Pwina naî Pwiduée (5.1–12)
É wii Ioane, ba na cimwü cèikî kâjè (5.13–21)
1
Popai kà Pwiduée na é naa wâro
Ioane 1.1Wà Pwi Popai, na é naa ê wâro* Pwi Popai na é naa ê wâro—Pai ina wèe pâ, Iésu Kériso. (Côo Ioane 1.1.), âna é tâa béaa kâra ê autapoo goo ê gòropuu. Â bà inapàparié tàwà nabà, ba bà jèe po têreê; â bà jèe po côoê; â bà jèe po tu naa gooé; â bà jèe po nünüma naa gooé. Ioane 1.14Ba é piâpàparié [tà tèpa âboro] â wàibà na bà côo pai tèepaa kêe, âna bà tèpa *paâjupâraê. Â bà picémara tàwà pâ, wâjaaé ê *wâro dàra gòiri. É tâa jaa wà Caa, na é jèe paarié tâbà. Êkaa na bà inaê tàwà, wâguwà mwara, ba na [jè capai tâmogòori ê wâro bèepwiri, â] o caapwi pwâranümajè. Â o caapwi pwâranümajè mwara, ma wà Caa, ma wà Pwina naîê, Iésu *Kériso. Ioane 16.24Â bà Bà—Wà Ioane, âna é wii ê tii goro ê auniimiri kàra ma wà tèpa apostolo bée. wii paé tàwà, ê tii bèeni, ba na o tâbawêe ê ipwàdée kâbà.
Wâdé na jè wâro na pwéelaa
1 Timotéo 6.16; Jacques 1.17Wàéni ê popai, na bà têre jii Iésu Kériso, na bà inapàpari tàwà ni: Wà Pwiduée, âna wàé ê pwéelaa, â nye ticè bàutê gooé. 1 Ioane 2.4Wiàna jè ina pâ, jè tâa goo wà Pwiduée, â wiàna jè bwaa gére wâro na ê bàutê, â jè tèpa pwâ, â câjè caa pâra wiâra ê *âjupâra [na ara Pwiduée]. Ba wà Pwiduée, âna é tâa na ê pwéelaa. Â wiàna jè wâro na ê pwéelaa, â o caapwi pwâranümajè goojè. Â é patâjii diri pâ èpà kâjè, wà Pwina naîê, Iésu Kériso, goro ê domii kêe [na joro na ia é bà ba kâjè] ba na jè o caapwi mwara ma wàé.
Psaume 32.5; Proverbes 28.13Wiàna jè ina pâ, nye ticè èpà na pwâranümajè, â jè nye pipwâgàrijè côwâ, â câé caa tâa goojè ê *âjupâra. 9-10 Â câé caa wâro goojè, ê popai kêe, â jè pâ nau tèpa tobapwâ wà Pwiduée. Êco na, wiàna jè inapàpari tà Pwiduée ê pâ èpà kâjè, â ée mwa pwanaurijè, ma patâjii diri ê èpà na tâa goojè. Ba é *tàrù, â é pwa ê pwina é ina.

1:1 Ioane 1.1

*1:1 Pwi Popai na é naa ê wâro—Pai ina wèe pâ, Iésu Kériso. (Côo Ioane 1.1.)

1:2 Ioane 1.14

1:4 Ioane 16.24

1:4 Bà—Wà Ioane, âna é wii ê tii goro ê auniimiri kàra ma wà tèpa apostolo bée.

1:5 1 Timotéo 6.16; Jacques 1.17

1:6 1 Ioane 2.4

1:8 Psaume 32.5; Proverbes 28.13