Tii Pwicîri: Âmu Aamwari naa na cî 1 Korénito 6
6
Rà pitòocia pàra tèpa cèikî naa na wâra pitèimuru
[Go têre pâ] câguwà caa pitêrewà, â guwà pâra naa na wâra pitèimuru kà tàpé na càra caa tâmogòori Pwiduée. Càcaa pâri ma guwà wàrapwiri! Wâdé na guwà nama pitùra goo, na ara [tèpa cèikî béewà, ba wàépwiri] ê Ba kà Pwiduée. Auinapàpari 3.21Gona câguwà caa tâmogòori pâ, jè o mwa pitèi ê gòropuu diri, wàijè tèpa naî Pwiduée? Â wiàna wàrapwiri, â gorodà na càcaa pâriwà ma guwà pitèi ê nyi nari muru, na càcaa pwamuru naa goo?
 gona câguwà caa tâmogòori pâ wàijè kaa, âna jè mwa tèi tèpa *angela* Jè mwa tèi tèpa angela—é, Jè mwa pitûâ naa goo wà tèpa angela, é, Jè mwa pitûâ naa goo pâ duée, ma pitèirà. Ê popai angela naa na grec, âna pwiri tèpa angela kà Pwiduée, é, tèpa duée.?  wiàna wàrapwiri, â o nye pârijè mwara ma jè tèi ê pâ nari muru na wâro kâjè ni gòropuu.
[Êkaa na guwà nabwé na] guwà pa pâ ê pâ pitòocia kàwà bèepwiri, naa na wâra pitèimuru. Ba wà tàpé na rà pitèiwà, âna piticèmuru naa goorà naa na ê wâra pwapwicîri. Gona nye ticè jè ârapàarawà cèna é tàpo tàmanga, ma é pinapéaati bwàti tà tèpa cèikî béewà? Â po dau kamu ba kàwà! Ba [wiàna càcaa wâdé na] ru pitòocia tupédu a cèikî, â [nye dau èpà kaa, na] rà wàrapwiri, na ara tàpé na càra caa cèikî!
Guwà cibwaa wàrapwiri!
Jèpwi mwara, wiàna guwà pitòocia naa na wâra pitèimuru, â paari pâ guwà tàgére pitanami [naa goo ê pai wârori kàwà ê wâro na wâdé tà Kériso. Â go ina tàwà pâ]: Wiàna rà pwa tàwà cèna èpà, â wâdé na guwà pidàpwicâariwà! Â wiàna rà mura jiiwà ê jè muru, â guwà cibwaa putàmu! Ê pwina dau èpà, âna nye piwâguwà côwâ, na pwa na èpà tà tèpa cèikî béewà, ba guwà murarà! 9-10  Galatia 5.19–21; Éféso 5.5; Auinapàpari 22.15Guwà ipwacôoco! Wà tàpé na èpà ê wâro kàra, âna o ticè kàra naa na *Mwaciri kà Pwiduée:
 
Wà tèpa ipwirié;
Wà tèpa pitànyiri;
Wà tèpa iau;
Wà tèpa mura;
Wà tàpé na rà pwamaina pâ duée imudi;
Wà tàpé na rà pwa-imudiri muru goro pâ naiirà (tèpa ipuu imudi ma wà pàra tàpé, ma wà tèpa toomura, ma wà tèpa paao na rà ipuu ma tèpa paao, naa na pai pwa na càcaa wâdé).
 
Diri tàpé na wàrapwiri ê wâro kàra, âna o ticè autâa kàra na Mwaciri kà Pwiduée. 11  Tito 3.3–7Béaa, âna rà wàrapwiri wà pàra tàpé gée goowà. Êco na wà Pwiduée kâjè, âna é jèe pitòrigariwà, ba na guwà tèpa âboro pwicîri kêe. Â é jèe nuwa tâjii ê èpà kàwà, [â é jèe tòpò pinaanapô naa nabibiu kàwà ma wàé] â é jèe nama guwà *tàrù na araé. Â é cau wàrapwiri diri, naa na nee Pwi Ukai Iésu Kériso, â na é naigé mee ê Nyuâaê Pwicîri.
Jè papwicîri naiijè
12  1 Korénito 10.23Pwiri guwà mwa tòpi pâ: «Nye ticè na papwicîri jiio.» Â nye âjupâra. Êco na càcaa êdiri pâ muru na wâdé ba kâjè. Â jè cibwaa nama jè tèpa *ênawéna kîri kâra muru [na jè pwa]. 13  1 Tésalonika 4.3–5Guwà ina mwara pâ: «Ê utimuru, âna târa nanaajè, â ê nanaajè, âna târa ê utimuru. Â ê du pwiibà, âna wà Pwiduée, âna ée mwa nama tiàu Ê utimuru, âna târa nanaajè… Pai ina wèe pâ, rà niimiri pâ, ticèmuru naa goo ê pwina rà pwa goro ê naiirà. Êco na, pwiri ê popai bèepwiri, âna popai kà Paulo..» Êco na [go ina tàwà pâ]: Jè cibwaa pwa-imudiri ê naiijè. Ba ê naiijè, âna kà Pwi Ukai, â wà Pwi Ukai, âna [é pitûâ] kâra ê naiijè. 14  Roma 8.11; 1 Korénito 15.20; 2 Korénito 4.14Â wà Pwiduée, âna ée mwa nama é wâro côwâ ê naiijè gée na aubà, goro ê pàtàmee, pwacèwii na ia é pwa tà Pwi Ukai kâjè.
15  Éféso 5.30Gona câguwà caa tâmogòori pâ, ê naiijè, âna ére gée goo ê naii Kériso? Â câjè caa tòpò ê naii Kériso naima ma ê naiiri ê ilàri gòronaigé. Bwa! Nye po dau pwacoé na wàrapwiri. 16  Mataio 19.5Wâdé na guwà tâmogòori pâ, wà pwi âboro na ru pitâa ma tô jè ilàri gòronaigé, âna jèe pâ nau caapwi ê naiiru. Ba jèe wii [naa goro ê du duadà] naa na ê *Tii Pwicîri pâ: Wàilu, âna ru pâra nau caapwi.Genèse 2.24 17  Ioane 17.21–23; Roma 8.9–11Â wà pwi âboro na é wâgoo wà Pwi Ukai, âna ru pâ nau caapwi ma wàé.
18 Wiàna gà pwa-imudiri naiigà, ma pipuu ma cè âboro imudi, â gà tubamiiri ê naiigà côwâ.  nye ticè cè jè èpà, cèna wàrapwiri 2e phrase—Grec: Pàra èpà na jè pwa, âna wâgòroigé jii ê naiijè..  wâdé na gà upiri! 19 Gona gà jèe ipwanauri pâ, wà Pwiduée, âna é jèe naa tâgà ê Nyuâaê Pwicîri, na é wâro googৠ1re phrase—Grec: Gona câguwà caa tâmogòori pâ, ê naiiwà, âna ê wâra pwapwicîri kâra Nyuâaê Pwicîri??  câgà caa pwi âboro'gà côwâ, ba ê naiigà, âna wâ kâra ê Nyuâaê Pwicîri. 20  1 Korénito 7.23; 1 Pétéru 1.18–19Ba [é jèe pipanuâê wà Kériso, ba na gà pwi âboro kêe—ba] dau maina wârigà. Êkaa na gà papwicîri ê naiigà, ba na gà pwamaina wà Kériso* 2e phrase—é, Gà pwamainaê goro ê naiigà. Pàra Tii Pwicîri naa na grec, âna rà ina pâ: Gà pwamainaê goro ê naiigà bau ê pwâranümagà, ba du muru na kà Pwiduée.!

6:2 Auinapàpari 3.21

*6:3 Jè mwa tèi tèpa angela—é, Jè mwa pitûâ naa goo wà tèpa angela, é, Jè mwa pitûâ naa goo pâ duée, ma pitèirà. Ê popai angela naa na grec, âna pwiri tèpa angela kà Pwiduée, é, tèpa duée.

6:9-10 Galatia 5.19–21; Éféso 5.5; Auinapàpari 22.15

6:11 Tito 3.3–7

6:12 1 Korénito 10.23

6:13 1 Tésalonika 4.3–5

6:13 Ê utimuru, âna târa nanaajè… Pai ina wèe pâ, rà niimiri pâ, ticèmuru naa goo ê pwina rà pwa goro ê naiirà. Êco na, pwiri ê popai bèepwiri, âna popai kà Paulo.

6:14 Roma 8.11; 1 Korénito 15.20; 2 Korénito 4.14

6:15 Éféso 5.30

6:16 Mataio 19.5

6:17 Ioane 17.21–23; Roma 8.9–11

6:18 2e phrase—Grec: Pàra èpà na jè pwa, âna wâgòroigé jii ê naiijè.

§6:19 1re phrase—Grec: Gona câguwà caa tâmogòori pâ, ê naiiwà, âna ê wâra pwapwicîri kâra Nyuâaê Pwicîri?

6:20 1 Korénito 7.23; 1 Pétéru 1.18–19

*6:20 2e phrase—é, Gà pwamainaê goro ê naiigà. Pàra Tii Pwicîri naa na grec, âna rà ina pâ: Gà pwamainaê goro ê naiigà bau ê pwâranümagà, ba du muru na kà Pwiduée.