116
I KIN pok on Ieowa, pwe a kotin ereki nil ai o ai nidinid.
Pwe a kotin kapaike don ia karon a, i me i pan likwir won i arain maur i.
Jal en mela jali ia dier, o kamajak en pajed lel on ia, i lel oner kalokolok o mamauk.
I ap likwir won mar en Ieowa: Main Ieowa, kom kotin dorela maur i!
Ieowa me dir en mak o pun, o atail Kot me dir en kalanan.
Ieowa kin kotin apapwali me opampap akan; nai luetalar, i ap kotin dore ia lar.
Nen i pur on om moleilei, pwe Ieowa kotin jauaja uk mau.
Pwe kom me kotin dorelar maur i jan nan mela, o por en maj ai jan janejan, o nä i jan a pan krijedi.
I pan weweid mon Ieowa nan jap en me maur akan.
10 I liki, o i karepen ai padapadak; a i kin kalokolok laud.
11 I indinda ni ai injenjued: Aramaj karoj me likam!
12 Iaduen i pan kak depuk on Ieowa a kapai ia kan?
13 I pan ale dal en kamaur, o likwir on mar en Ieowa.
14 I pan kapwai on Ieowa ai inau janjal mon japwilim a aramaj akan karoj.
15 Meid kajampwal ren Ieowa melan japwilim a lelapok kan.
16 O Main Ieowa, nai japwilim omui ladu men, nai japwilim omui ladu, nain omui lidu; kom kotin kamueit pajan ai jal akan.
17 I pan maironki on komui danke, o likwir on mar en Ieowa.
18 I pan kapwai on Ieowa ai inau janjal mon japwilim a aramaj akan karoj,
19 Mon pera en tanpaj omui im jaraui, nan waron en Ierujalem. Aleluia!