1 KAIDIN kit Ieowa, kaidin kit, pwe mar omui, kom kotiki on waui, pweki omui kalanan o melel!

2 Menda men liki kan en inda: Ia arail Kot?

3 Atail Kot kotikot nanlan, a kak kotin wia karoj, me a kupura.

4 Arail dikedik en ani kan, me wia kidar jilper de kold, iei dodok en pa en aramaj.

5 Au arail mia, ap jaja lokaia, por en maj arail mia, ap jota kak kilan waja;

6 Jalon arail mia, ap jota ron waja; tum arail mia, ap jota ned waja;

7 Pa arail mia, ap jota kak koledi meakot; nä arail mia, ap jota kak alu; re jota kak lokaiaki kapin wor arail.

8 Me kin wiada pukat, me dueta irail, o pil karoj, me kin liki irail.

9 A koe Ijrael, liki Ieowa; i jauaj o pere parail.

10 Komail, kadaudok en Aron, liki Ieowa, i jauaj o pere parail.

11 Komail, me kin majak Ieowa, liki Ieowa, i jauaj o pere parail.

12 Ieowa kotin kupura kitail er, o a pan kotin kapai kitail la; a pan kotin kapaida kadaudok en Ijrael, kapaida kadaudok en Aron;

13 A pan kotin kapaida, me majak Ieowa, me tikitik o me laud akan.

14 Ieowa en kotin kapai komail da kokolata, pein komail o noumail jeri kan!

15 Komail me kapaidar ren Ieowa, me kotin kapikadar lan o jappa.

16 Lan me japwilim en Ieowa, a jappa me a kotiki oner aramaj akan.

17 Me melar akan jolar pan kapina Ieowa, pil karoj, me kodi wajan kaporemen;

18 A kitail pan kapina Ieowa jan met o kokolata. Aleluia!