Kadede Kap Pjam Akan Pjalm 94
94
MAIN Kot, komui jaundepuk, Ieowa Kot jaundepuk, kom kotin janjaleda!
Kom kotida, komui jaunkapun en jappa, kom kotin depuk on wiawia en me aklapalap akan.
Main Ieowa, arai da me doo jan Kot akan, arai da me doo jan Kot akan pan poponmaju,
O pudupudada lokaia jued o arai da, me japun kan karoj en juaiki ar morjued?
Re kin tiakedi japwilim omui aramaj akan, o re kame omui jojo;
Re kin kamela li odi o men wai, o patik takain wor en me japoupou kan,
Rap inda: Ieowa jota kak kilan, o Kot en Iakop jota pan aja due.
Komail me pweipwei nan pun en aramaj akan, en dedeki! O komail lolepon akan, iad me komail pan lolekonala?
Me kotin wiadar jalon, o a jota pan ereki? Me kotin wiadar por en maj o, a jota pan kak majani?
10 Me kin kotin kaunda wei kan, a jota pan kaloke? Pwe i me kotin kalolekoni aramaj.
11 Ieowa kotin mani lamelam en aramaj akan, me re aklapalap.
12 Meid pai ol o, me kom kotin kaloke, Main, Ieowa, o me kom kotin padaki on jan nan ar majan akan.
13 Pwen kanonama ni a apwal akan, lao joujou en me doo jan Kot akan pan weweida.
14 Pwe Ieowa jota pan kotin kajela japwilim a aramaj akan, o a jota pan muei jan a jojo.
15 Pwe me pun, pan punpuneta, i me lelapok kan karoj pan weweideki.
16 Ij me pan jauaja ia on me morjued akan? O ij me pan jauaja ia on me dipan akan?
17 Ma Ieowa jota kotin jauaja ia, metar ekij nen i pan kolan wajan kapormen.
18 Ni ai indada: Nä i pan krijedi, omui kalanan, Main Ieowa, pan kolekol ia.
19 Ai injenjued laud nan monion i, a omui kotin kamait ia la kaperenda nen i.
20 Kom jota man paroki on mol o, me kin kajapunala japwilim omui majan.
21 Re kin onop on kamela me pun amen, o re kin kadeikada nta makelekel.
22 A Ieowa ai paip lapalap, o Kot iei paip, me i pan rukila ia.
23 A pan kotin depuk on ir ar me jued, o a pan kotin kame ir ala, pweki ar katiwo, Ieowa atail Kot pan kame ir ala.