Paipel MATEUS 16
16
Aramas ra tüngor ngeni Jesus pwe epwe föri eu manaman
16.1-4
(Mark 8.11-13; Luk 12.54-56)
Iwe, ekoch ekewe Farisi me Satusi ra feito ren Jesus, pun ra mochen särei i, iei mine ra tüngor ngeni pwe epwe föri eu manaman, pwe asisilan pwe Kot a tipeeu ngeni. Mat 12.38; Luk 11.16 Nge Jesus a pölüeniir, “Lupwen ewe akkar a tuputiu oua apasa, ‘Epwe ränöch lesor, pun a parapar fän läng.’ Nge lesosorusich oua apasa, ‘Epwe räningau, pun a par o roch fän läng.’ Oua tongeni osuni usun ränöch me räningau ren ämi nenengeni fän läng, nge ousap tongeni awewei ekewe asisilen fansoun ikenai! A ifan me ngauen me kirikiringauen ei täppin aramasen ikenai! Oua tüngor ngeniei, pwe üpwe föri eu manaman. Nge esap wor eu manaman epwe pwä ngenikemi me lükün ewe chök manaman mi fis ngeni Sona.” Mürin Jesus a likitiir o feila seniir. Mat 12.39; Luk 11.29
Jesus a üreni nöün chon kaiö pwe repwe afäliir ren ekewe Farisi me Satusi
16.5-12
(Mark 8.14-21)
Iwe, lupwen ekewe chon kaiö ra feila pekilan epek ewe noom, ra manlükala ar repwe uwou amötür pilawa. Jesus a üreniir, “Oupwe tümwünüfichi o afälikemi ren ewe iis än ekewe Farisi me Satusi.” Luk 12.1 Iwe, ekewe chon kaiö ra popuetä le kapasfengen lefiler, “A apasatä ei ititin fos, pun sisap uwou pilawa.” Nge Jesus a silei met ra kapasfengen won lefiler, iei mine a aisiniir, “Pwota oua kapasfengen usun an esap wor remi pilawa? Mwa met me kisikisin ämi lükülük! Ifa usun, ousamwo wewela? Ousap chechemeni lupwen üa kinikisietiu ekewe limeföü pilawa fän iten ekewe limengeröü mwän? Fitu chüük oua amasoua ren ekewe lusun mongö? Mat 14.17-21 10 Nge ifa usun, ekewe füföü pilawa fän iten ekewe rüanüngeröü mwän? Fitu chüük oua amasoua ren ekewe lusun mongö? Mat 15.34-38 11 Pwota ousap wewela, pwe üsap kapas ngenikemi usun pilawa? Oupwe afälikemi ren ewe iis än ekewe Farisi me Satusi!” 12 Mürin ekewe chon kaiö ra weweiti, pwe Jesus esap üreniir pwe repwe afäliir ren ewe iis mi nom lon pilawa, nge repwe afäliir ren än ekewe Farisi me Satusi afalafal.
Petrus a pwärätä usun Jesus
16.13-20
(Mark 8.27-30; Luk 9.18-21)
13 Iwe, Jesus a feila ngeni ewe fanü arap ngeni ewe telinimw Seserea Filipi. Ikenan a aisini nöün kewe chon kaiö, “Met aramas ra apasa usun Nöün Aramas iö i?” 14 Ra pölüeni, “Ekoch aramas ra apasa pwe Johannes Soupapatais, pwal ekoch ra apasa pwe Elias, nge pwal ekoch ra apasa pwe Jeremaia ika eman ekewe soufos.” Mat 14.1-2; Mark 6.14-15; Luk 9.7-8 15 Mürin Jesus a aisiniir, “Nge ämi, met oua apasa usi?” 16 Simon Petrus a pölüeni, “En Kraist ewe Nöün Kot mi manau.” Joh 6.68-69 17 Jesus a pölüeni, “Ka feiöch, Simon nöün Sona. Pun ei kapas mi let esap aitien eman aramas ngonuk, nge Semei lon läng a amefi ngonuk. 18 Iei mine üpwe ürenuk Petrus: En eu achau. Iwe, ei achau iei ewe longolong üpwe aüetä ai mwichefel won, nge mäla esap mwo nge tongeni akufu. 19 Ngang üpwe ngonuk ekewe kien Mwün Läng. Mine en kopwe pinei won fanüfan epwe pinepin lon läng, nge mine en kopwe mwütätä won fanüfan epwe pwal mwümwütä lon läng.” Mat 18.18; Joh 20.23 20 Mürin Jesus a allük ngeni ekewe chon kaiö pwe resap üreni eman pwe i ewe Kraist.
Jesus a kapas usun an riaföü me mäla
16.21-28
(Mark 8.31–9.1; Luk 9.22-27)
21 Seni lon ena fansoun Jesus a popuetä le pwäri ngeni nöün kewe chon kaiö, pwe i epwe fokun feila Jerusalem, iwe, epwe küna riaföü me ren ekewe souakom, ekewe souasor mi lap me ekewe Sensen Allük. Repwe niela, nge mürin ülüngat rän epwe manausefälitä. 22 Iwe, Petrus a emwenala Jesus ekis o popuetä le apwüngü, “Ai Samol, Kot epwe ümöümöch ngonuk! Ei esap fokun fis ngonuk!” 23 Nge Jesus a kul ngeni Petrus o üreni, “Kopwe sü seniei Satan, en eu lenien chepetek ngeniei. Pun om ekiek esap pop seni Kot, nge a pop seni aramas.”
24 Mürin Jesus a üreni nöün kewe chon kaiö, “Are eman a mochen etiei, epwe pölükü manauan, epwe mwärei an iräpenges o tapweto müri. Mat 10.38; Luk 14.27 25 Pun iö a mochen amanaua manauan, epwe pöüt seni. Nge iö a pölükü manauan fän itei, epwe küna manau. Mat 10.39; Luk 17.33; Joh 12.25 26 Epwe met lomoten än eman aramas epwe feiöchüni feiöchün unusen fanüfan, nge manauan epwe pöüt seni? Esap wor och eman aramas a tongeni fangala pwe epwe angesefäli manauan. 27 Pun Nöün Aramas epwe war lon lingen Saman fiti nöün kewe chon läng. Mürin epwe liwini ngeni iteiten eman me eman aramas usun ar föför. Mat 25.31; Kölf 62.12; Rom 2.6 28 Enlet, üpwe ürenikemi pwe mi wor ekoch aramas ikei resap mäla, pwe repwe mwo küna Nöün Aramas epwe war lon wisan wisen king o nemenem.”

16:1: Mat 12.38; Luk 11.16

16:4: Mat 12.39; Luk 11.29

16:6: Luk 12.1

16:9: Mat 14.17-21

16:10: Mat 15.34-38

16:14: Mat 14.1-2; Mark 6.14-15; Luk 9.7-8

16:16: Joh 6.68-69

16:19: Mat 18.18; Joh 20.23

16:24: Mat 10.38; Luk 14.27

16:25: Mat 10.39; Luk 17.33; Joh 12.25

16:27: Mat 25.31; Kölf 62.12; Rom 2.6