62
Kot echök ach lenien op
62.1-12
Ngeni ewe mi emweni chon köl: Ei köl usun ngingin förien Jetutun köl. Echö än Tafit köl.
1 Üa likitü le witiwiti Kot pwe epwe amanauaei,
üa anomu ai apilükülük won i chök.
2 I chök a tümwünüei o amanauaei,
i a peniei pwe üsap fokun kuf.
3 Ifa ükükün fansoun ämi meinisin oupwe fiu ngeni eman chök aramas,
pwe oupwe aturala usun eu oror mi söön ika eu tit mi päpäifetal.
4 Oua chök ekiekin asapwilätiu i seni wisan mi tekia,
oua pwapwaäsini kapas chofana.
Oua eäni kapasen afeiöch,
nge oua otteki me lon lelukemi.
5 Üa likitü le witiwiti Kot echök,
pun üa anomu ai apilükülük won.
6 I chök a tümwünüei o amanauaei,
i a peniei pwe üsap fokun kuf.
7 Ai küna manau me ai ling ra longolong won Kot.
Kot ai achau mi pöchökül
me ai lenien op.
8 Ämi aramas, oupwe lükü Kot fansoun meinisin.
Oupwe pwäri ngeni ämi weires meinisin,
pun i ach lenien op.
9 Aramas tekison ra usun chök enienin asepwäl,
nge aramas tekia ra usun chök och minen chofana.
Are ra kilo, esap wor chour,
ra pän seni enienin asepwäl.
10 Ousap anomu ämi apilükülük won pisek oua angemwäli fän pöchökül,
ousap pwal eäni apilükülük pisek oua soläni.
Inamwo ika oua pisekisekila, ousap apilükülükü.
11 Eu mettoch Kot a kapas usun. Ruu mettoch üa rongorong usun,
pwe en Kot echök ka manaman.
12 Pwal en chök, ai Samol, ka eäni tong ellet.
Ellet ka liwini ngeni aramas ükükün ar föför. ✡ Hiop 34.11; Jer 17.10; Mat 16.27; Rom 2.6; Pwär 2.23