Paipel AISEA 24
24
Kot epwe apwüngü fanüfan
24.1-23
Iwe, ewe Samol mi Lapalap epwe atatakisi fanüfan o apööla. Epwe ataela won o atoropasa chon. Iwe, lon ewe feiengau epwe fis pwe aramas repwe wewefengen. Souasor repwe usun chök aramas kis, samol repwe usun chök nöür chon angang mwän me chon angang fefin, chon amömö repwe usun chök chon kamö, nge chon mwütawu repwe usun chök chon tüngor me chon liwinimang. Iwe, fanüfan epwe wesewesen tatakis me pön, pun ewe Samol mi Lapalap a apasa.
Iwe, fanüfan a aiolol o pwasala, unusen fanüfan a apwangapwangala. Läng a eti fanüfan le kirou. Fanüfan a limengau ren chon, pun ra puri än Kot kewe allük o aücheangaua an kewe pwüüng, ra pwal ataela an we pwon mi nom tori feilfeilachök. Iei popun fanüfan a fokun anümamau, nge chon ra angei liwinin ar tipis. Pwal iei popun chon fanüfan ra chokisikisila, ekoch chök leir ra chüen manau. Ewe irän wain a pwasala, ewe wain a rosola, nge chon letipepwapwa ra ngüngü. Iwe, tikitikin pisekin ettik a köüla, pwal mweireiren chon mweireir, nge tikitikin kitar a ükütiu. Aramas resap chüen köl lupwen ar ünümi wain, sakau a maras ngeni chon ün. 10 Iwe, lon ewe telinimw a chök fis fitikoko, iteiten imw ra kapüngüla pwe esap wor eman a tongeni tolong. 11 Aramas ra akürang won ekewe al, pun esap chüen wor ünümer wain. Iwe, pwapwa a wesila, esap chüen fis mwänek won ewe fanü. 12 Ewe telinimw a wesewesen tatakis, nge asamalapan ra tala. 13 Iei usun mine epwe fis won unusen fanüfan, pwal ngeni aramas meinisin. Epwe usun chök lesopolan fansoun kinikin, lupwen eman a fen wes le wichiki ekewe irän olif, pwal lupwen eman a fen kiniela uän ekewe irän wain.
14 Nge ir mi chüen manau repwe leüömong le köl fän pwapwa. Chokewe mi nom lotou repwe ingemwareiti lingen ewe Samol mi Lapalap, 15 nge chokewe mi nom ötiu repwe mwareiti i. Ekewe aramas mi nom aroset repwe mwareiti ewe Samol mi Lapalap, ewe Koten Israel. 16 Seni lesopun fanüfan sa rongorong ei köl, “Ewe mi Pwüng epwe ling.”
Nge ngang üa apasa, “Feiengauei! Üa apwangapwangala, üa apwangapwangala. Ekewe chon afangamä ra afangamä fän ar rawangau, ra chök akafangamä.” 17 Niuokus watte, pwang mi alolol me sär repwe sounikemi, ämi chon fanüfan. 18 Iwe, chokewe mi sü seni ewe niuokus watte repwe turulong lon ewe pwang mi alolol, nge chokewe mi tötä seni ewe pwang repwe tup lon ewe sär. Pun üt epwe fokun püngümongetiu, nge longolongun fanüfan epwe chechech. 19 Iwe, fanüfan epwe fokun mökküla, epwe fokun chechech o sangfesen. 20 Iwe, fanüfan epwe tokorikirik usun eman chon sakau, epwe mwaroro usun eu likachoch, lupwen asepwäl a eniti. Fanüfan a choutiu ren an tipis, epwe turula, nge esap chüen üsefälitä.
21 Lon ena fansoun ewe Samol mi Lapalap epwe apwüngü ekewe mwichen chon läng, epwe pwal apwüngü ekewe king mi nom won fanüfan. 22 Iwe, epwe achufengeni ekewe king lon eu pwang usun chon fötek, epwe pwal lokerelong lon imwen fötek. Nge mürin chomong rän repwe küna apwüng. 23 Mürin, maram me akkar repwe tinengauala ren ar säw, pun ewe Samol mi Unusen Manaman epwe nemenem won ewe chuk Sion, pwal lon Jerusalem. Iwe, ekewe souakomwen lon ewe telinimw repwe küna an ling.