Paipel AISEA 25
25
Kölün mwareiti än Kot ümöümöch
25.1-12
Ai Samol mi Lapalap, en ai Kot.
Üpwe ingeituk, üpwe pwal mwareiti itom,
pun ka föri mettoch mi amwarar.
Ka apwönüetä mine ka akota me lomlom
fän allükülük me wenechar.
Ka föri pwe ewe telinimw a wiliti eu ioien mettoch mi tatakis,
ewe telinimw mi pöchökül tittin a tala.
Ekewe imwen kingen chon ekis ra tala,
esap wor eman epwe aüsefäliretä.
Iei mine aramasen ekewe mwü mi pöchökül repwe alingok,
aramasen ekewe telinimw mi mwänewüs repwe niuokusituk.
Pun en eu lenien pöchökül fän iten chon osupwang
me chon mwelele lon ar riaföü.
En eu lenien op lupwen fansoun mölümöl,
pwal eu lenien nür lupwen fansoun pwichikar.
Iwe, än ekewe aramas mi mwänewüs angangen afeiengau a usun eu mölümöl a mölümöliti eu tit,
pwal usun chök pwichikaren akkar won eu leni mi pwasapwas.
Ka aükätiu akürangen chon ekis,
nge än ekewe aramas mi mwänewüs kölün win a ükütiu,
usun nürün eu kuchu a epeti pwichikaren akkar.
Won ewe chuk Sion ewe Samol mi Unusen Manaman epwe amolätä eu kametip fän iten aramas meinisin won fanüfan, eu kametip ia epwe wor ie sokopaten mongö mi anö, pwal wain mi mürina. Iwe, won ei chuk epwe angei seni aramas meinisin pwölüpwölün won meser, epwe angei seni chon ekewe mwü meinisin ewe pwölüpwölün letipeta a nonom wor. Iwe, Kot ewe Samol mi Lapalap epwe aükätiu mäla, pwe esap chüen wor tori feilfeilachök. Epwe talü chönün mas seni won mesen aramas meinisin o angei seni nöün aramas kana ar itengau ekis meinisin won fanüfan. Iei alon ewe Samol mi Lapalap. 1.Kor 15.54; Pwär 7.17; 21.4 Iwe, lon ena rän aramas repwe apasa, “Ellet, iei i ach Kot sa anomu ach lükülük won pwe epwe amanauakich, iei i ewe Samol mi Lapalap sa anomu ach apilükülük won. Ousipwe pwapwa o mwänek ren an amanauakich.”
10 Iwe, pöün ewe Samol mi Lapalap epwe pwölü ei chuk Sion, nge epwe puri Moap usun eman a puri fetilipwas lon eu pwangen pi. Ais 15.1–16.14; Jer 48.1-47; Is 25.8-11; Am 2.1-3; Sef 2.8-11 11 Iwe, Moap epwe aitiela pöün me lon ewe pwang, usun eman aramas a aitiela pöün lupwen a ä. Nge Kot epwe atekisonätiu än Moap lamalamtekia me tufichin angangen pöün. 12 Iwe, epwe ataela an kewe imwen maun me tittir mi tekia, epwe fokun atururela lepwül.

25:8: 1.Kor 15.54; Pwär 7.17; 21.4

25:10: Ais 15.116.14; Jer 48.1-47; Is 25.8-11; Am 2.1-3; Sef 2.8-11